Yothega ya Mwene Davidi

Sawuli nuukwa, Davidi okala mwene. Oliye aanna yaka 30. Emahiyu dhaala, Davidi omoona muhiyana dhaala oowoma. Davidi onona wihina muhiyana ole ithaniwa Bate-Seba ni wihina aateliwe ni munyakoddo ithaniwa Uriya. Naarive dhigaali ndo, Davidi omwithanela Bate-Seba vaade vaye ni omugoniha. Nuwindo, Bate-Seba okanna wari. Davidi afuna akoye yothega yaye, bumwahaya oliye othoma omutela Bate-Seba, teto oliye osayela makalelo wihina mamune apiwe okoddoni. Vano Uriya nuukwa, Davidi omutela Bate-Seba.

Mbwenye Yehova ahoona dhithu dhaatedhene Davidi eriliyena. Bumwahaya, oliye omuruma namavuhulela Nata wi awoge ni Davidi egi: ‘Mulobwana dhaala ooreela ahithabwa okanna mambila owinjhiva, mbwenye mulobwana oohawa anna nimbila nimodha baahi athabwiye odhivela. Ohunona ethu erilena mulobwana ole ooreela? Oliye wiiya nimbila nne na mulobwana ole oohawa.’ Davidi nuwiwa otakaleliwa vanlubale ni owoga wihina mulobwana ole ooreela oofwanelela opiwa. Nuwindo, Nata omwakula egi: ‘Siyeyo mmwerelinyu Uriya.’ Davidi wukuuwa vanlubale ni owoga wihina ahithega. Mwaha wa yothega eyo, Yehova weenya wihina dhimpadduwele dhithu dhowinjhiva dhabure ni emudhi yaye. Mbwenye woona wihina Davidi ahiyeviha, ahiwoga dhithu eeriliyena ni ahithwaruwa, Yehova omulevelela.

Nuuvira yaka dhowinjhiva, Davidi afuna amage tempulu ya Yehova. Mbwenye Yehova omuthoma Salomawu, mwaana Davidi wihina amage tempulu. Davidi obajha wegeredha dhithu wihina Salomawu amagena tempulu ni owoga egi: ‘Woona wi Salomawu muzombwe teto tempulu ya Yehova enohowela okala yowoma, ginere omukavihera.’ Davidi opeleka korowa dhowinjhiva wihina dhimagiwena tempulu. Wawithana anamamaga owinjhiva ni wugela oru, parata ni tabwa wihina dhimagiwena tempulu. Mudhidhi vang’ono ahinakwe, Davidi owoga ni Salomawu egi: ‘Yehova ohugiloba wihina guvahedhe dezenyu enoniha makalelo enakale tempuluya. Kuwoove mwanaga, mwaha Yehova aneere wukavihera. Okale akopolo ni obajhe omaga tempulu!’