Jeyoyada Aali Ooliba Murima

Jezabeli ahikanna mwaana ithaniwa Ataliya. Ataliya aali abure ninga amaye, teto ahiteliwa ni mwene ooJuda. Mamune nuukwa, mwaana a Ataliya okala mwene. Mbwenye mwanaye nuukwa, Ataliya othoma okala musano ooJuda. Bumwahaya oliye waapa athu aatene yanna ofuru wokala mwene, vamodha ni adhuleya. Mwaha wa yeyo, athu aatene yoomoova.

Namakutha munlubale Jeyoyada vamodha ni mwariye Jeyozeba yahinona wihina dhithu eerana Ataliya dhaali dhabure. Mbwenye aliwa yaali ooliba murima. Aliwa omukoya mutempulu mudhule Ataliya, iithaniwa Jeyowaji ni omusamalelaga.

Jeyowaji aganna yaka 7, Jeyoyada watugumanya alobwana aatene athima ooJuda ni owoga egi: ‘Musugwerege musiwo dhotempulu ni kammuhiye muthu ovolowa.’ Vano, Jeyoyada weeriha wihina Jeyowaji akale mwene ooJuda ni omuwariha kara yomwene. Nuwindo nlogo nooJuda okuwa negi: ‘Mwenihu oye!’

Musano Ataliya wiwa nlogo nikuwaga ni othamagela otempulu. Numoona mwene muxa, oliye obajha okuwa egi: ‘Muhugipanganela wihina mugipe! Muhugipanganela wihina mugipe!’ Nuwindo, alobwana amodha omuthukulela Ataliya ode wa tempulu ni ompa. Vano nlogo nooJuda nahivuluwa mmadani mwa musano ole abure, mbwenye kiyavuluwile wa dhithu dhabure oliye eeriliyena. Ki vano Jeyoyada eere ddi?

Jeyoyada vamodha ni nlogo opaganya wihina yamulabelege Yehova baahi. Nuwindo, aliwa ogujhula tempulu ya Bahali ni dhikwamuthu dhaatedhene. Vano, Jeyoyada wasakula anamakutha, alevita ni anamasugwera wihina elabege mutempulu mwa Yehova. Ndo, nlogo nere ohogolowela omulabela Yehova mwamakalelo apama. Nuwindo, Jeyoyada naalobwana amodha omuthukula Jeyowaji omudhowana opalasiyu ni omukaratiha vampaddoni va mwene. Nlogo naatene nooJuda ohagalala vanlubale, mwaha yerege omulabela Yehova ehimovaga Ataliya newene ehivoloweliwaga ni webedha wa Bahali. Uhoona? Oliba murima wa Jeyoyada wahakavihera athu owinjhiva!