Yehova Ahinvilelana Jonasi

Ninive yaali luwani yakala oSiriya. Athu yakala oNinive yahithabwa okala abure. Bumwahaya Yehova adhe amurumege namavuhulela Jonasi wihina awaddele athu ale wi ethwaruwe. Mbwenye ohiya Jonasi odhowa oNinive, oliye ogwela mwanddeya, othawela luwani emodha yithaniwa Tarsi yathambwe olapela ni oNinive.

Mudhidhi agaali mmwanddeyani, obajha nipevo na kopolo. Aliba yeddiha mwanddeya ole obajha woova vanlubale. Aliwa obajha olobela wa amulugu ewa wihina enone mwahaya bwaddi nipevo nne ndhe nikumelelege. Vano, Jonasi owoga naliwa egi: ‘Nibili thaaga. Mwaha Yehova eere ogiruma mbwenye miyo othawa. Mwagivokedha muniya, nipevo nna nnere omaala.’ Omambelelowene aliba weddiha mwanddeya kiyafuna omwiwelela, mbwenye Jonasi odidela owoga ethu emodhave. Aliwa nunvokedha Jonasi muniya, nipevo nne omaala.

Jonasi obajha oddadda, ubuwelaga wihina eere okwa. Vano oliye olobela wa Yehova. Mudhidhi mmodhave Yehova oruma oba enlubale wihina emmidhe Jonasi. Mbwenye oliye kaakwile. Agaali mbani mwa oba ele, Jonasi olobela egi: ‘Babani Yehova, ginoolibela wihina okuma peeno odhowa osogolo ginerege wuwilelani.’ Jonasi ahimala malabo mararu agaali mbani mwa oba. Vano Yehova weriha wihina oba ele emwaamulele Jonasi vamutxesani.

Eyo enatapulela wihina Jonasi kakwanihedhe ele Yehova aamurumiliye? Naari. Yehova ohogolowela omuruma Jonasi wihina adhowe oNinive. Jonasi omwiwelela Yehova. Vano nufiya, oliye obajha wawaddela athu egi: ‘Muwari mwa malabo 40 Ninive anere ogujhuliwa.’ Mbwenye opadduwa ethu yootikiniha. Aninivita othwaruwa! Mwene ooNinive owoga egi: ‘Nimulobe Mulugu wihina anilevelele. Nathwaruwa podi wera kanaanipe.’ Yehova nuwoona wihina Aninivita yahithwaruwa, oliye othoma ohugujhula luwani ele.

Mbwenye Jonasi otakaleliwa vanlubale. Oliye kaavilelena Aninivita, ninga eerilena Yehova. Oliye okumamo muluwani mune oonyanyuwene, odhowa okarati vati va nikupu dhaala. Mbwenye mwananikupu nne wumma, mwaha wa yeyo Jonasi otakaleliwa vanlubale. Vano, Yehova omuhudhiha ethu yathima Jonasi. Oliye owoga egi: ‘We onoweddela thagaraga mwananikupu nna teto ohutakaleliwa nuukwa. Kunoonelamo wihina Aninivita ehithabwa okanna thima opitha nikupu nna?’