OHUDHERA 17
Dhikalelo baani anna Yesu?
Nahudheraga dhithu erilena Yesu mwilaboni ya vati, nnowanda woona dhikalelo dhaye. Ndo nnowandana nuliye vamodha ni Babe, Yehova. Dhikalelo ndo siivi? Nnaamutajhihe aavi Yesu mwigumini mwehu?
1. Yesu analigana ni Ababe Yehova nimakalelo baani?
Yesu akala ni Babe muwari mwa yaka dhowinjhivadhene ni ohusuza dhithu dhowinjhiva. Bumwahaya Yesu oona, ubuwela ni erana dhithu ninga Yehova. (Omwileri João 5:19.) Mwebaribarene Yesu anotajhiha pamadhene dhikalelo dha ababe, bumwahaya adhe awogege egi: ‘Ole anagoona anowawoona Ababa.’ (João 14:9) Wahudheraga dhikalelo dha Yesu, onerege othabwa omunona Yehova. Motajhiha, woona makalelo Yesu anathuwathuweliye athu enoniha makalelo Yehova anuthuwathuweliye.
2. Yesu oonihe aavi wi onomudhivela Yehova?
Yesu ohuwoga egi: ‘Wihina athu enone wi ginowadhivela Ababa, ginowerana dhithu ninga mugirumiliwa.’ (João 14:31) Yesu agaari mwilaboni yavati ahooniha wi onowadhivela Ababe mwaha wawiwelela mwadhatedhene naarive ehiri ethu yokweya. Teto Yesu odhiveliwa vanlubale owoga wodhela Ababe ni wakavihera amodha wandana ni Mulugu. — João 14:23.
3. Yesu oonihe aavi wi onowadhivela athu?
Bibliya onihina Yesu ‘anoothabwa wadhivela athu.’ (Provérbios 8:31, nota) Yesu aari muthu apama, ni owathuwathuwela athu aatene ni makalelo mamodhave. Ohiya eyo, owalibiha athu ni owakavihera yahowelaga. Matikiniho aweriyena kayoniha kopolove baahi, mbwenye yowoniha wi owaweddela thagaraga athu. (Marcos 1:40-42) Madhu aye yolibiha ni yowavaha ejhehedhelo atene yanna murima wapama. Oliye wivelela ofiyedha okwa mwaha odhivela onniyena naathu. Mbwenye oliye onathabwa wadhivela ale eniwelela malamulo ni dhohudhiha dhaye.— Omwileri João 15:13, 14.
OHUDHERE DHITHU DHIMODHA
Onone dhikalelo dha Yesu. Teto woone makalelo owooniha odhivela ni oovaha ninga oliye.
4. Yesu anowadhivela Ababe
Yotajhiha ya Yesu enonihudhiha makalelo owoniha wi nnomudhivela Mulugu. Mmwileri Lucas 6:12 ni João 15:10; 17:26. Mwamala wileri dholebela ndha, muthapanyedhe nikoho nnaharela:
Nnaamutajhihe aavi Yesu ni woniha wi nnomudhivela Yehova?
Yesu owadhivela Ababe ni owoga naaliwa alobelaga
5. Yesu onowathuwathuwela athu enahowela okaviheriwa
Yesu owathuwathuwela vanlubale athu opitha egumaye. Oolabihedha mudhidhaye, kopolo wihina akavihere athu naarive agaari ogomene. Mmwileri Marcos 6:30-44, mwamala muthapanyedhe makoho enaharela:
Yesu onihile aavi wihina owathuwathuwela athu? — Musugwe versu 31, 34, 41 ni 42.
Mwahaya bwaddi Yesu adhe akanne efunelo yowakavihera athu? — Musugwe versu 34.
Nihoona wi Yesu anotajhiha dhikalelo dha Ababe. Eyo enanihudhiha ddi wodhela Yehova?
Nnonihe aavi wi nnomutajhiha Yesu wodhela wathuwathuwela athu?
6. Yesu muthu oovaha
Yesu kaanna dhithu dhowinjhiva, mbwenye owavaha athu amodha ndhe anniyena. Oliye anowoga wi neregena emodhave. Mmwileri Atos 20:35, mwamala muthapanyedhe nikoho nnaharela:
Mowiwanana ni madhu a Yesu, enanihagalase ddi?
Musugwe VIDIYU, mwamala muthapanyedhe nikoho nnaharela.
Naarive nihinna dhithu dhowinjhivadhene, nnonihe aavi wi niri athu oovaha?
Wahinona?
Bibliya anonihudhiha olobela wa Yehova ni ndina na Yesu. (Mmwileri João 16:23, 24.) Nalobelaga nimakalelo yala nnowoniha wi nnovaha thima ele anerele Yesu wihina nandane ni Yehova.
ATHU AMODHA ENAWOGA YEGI: “Mulugu kanapwatha goyi enna athu.”
Nihinona wi Yesu anotajhiha dhikalelo dha Ababe, vano dhithu dhatedhene erilena Yesu dhinoniha aavi wi Yehova anonithuwathuwela?
OVIRISEDHA
Yesu anomudhivela Yehova vamodha ni athu. Woona wi Yesu ari ninga Ababe, wamunona pamadhene Yesu, onere omunona pama Yehova.
Ogwaddela
Nnaatajhihe aavi odhivela Yesu anniyena ni Yehova?
Nnaatajhihe aavi odhivela Yesu anniyena naathu?
Dhikalelo baani dha Yesu dhithanbwe wudhivela?
WEGI ONONE DHITHU DHIMODHA
Woone dhikalelo dha Yesu nnafwanelelihu otajhiha.
“Wegi omutajhihe Yesu, woone . . .” (Jesus — o Caminho, a Verdade e a Vida, epaddi 317)
Ohudhere mwahaya bwaddi ekala yofuneya olobela ni ndina na Yesu.
“Mwahaya bwaddi egahoweleya olobela ni ndina na Yesu?” (A Sentinela, 1.º a Fevereiro a 2008)
Bibliya anowoga makalelo aari Yesu?
Nnahudhera ddi wodhela makalelo Yesu aweddihiye ahiyana?
“Oriha ni nthithimiho wodhela makalelo obarela a Mulugu” (A Sentinela, 1.º a Setembro a 2012)