Omwene wa Mulugu wadha onere ddi?

OMWENE WA MULUGU WENRE DDI OFIYEDHA OVANENE?

Yohudhera yamundduli, nihona yintelelo awogile Yesu. Yintelelo ela yowoniha yeebaribari wi Omwene wa Mulugu onathongiwa ni Yesu Kiristu, ohutikiteriwa odhulu.

Bibliya onosoriha, wi nuwambela othonga Omwene wa Mulugu, Yesu omwigara Saddana ni ademoniyu aye odhulu. Vano eli Elabo yavati, bumwahaya dhithu dhikala dhorusadhene okuma yaka ya 1914. — Apocalipse 12:7, 9.

Naarive mwigari makathamiho mwilaboni Yavati, Omwene wa Yesu onna wakavihera athu elabo yatene. Ninga Yesu awogiliye wi dhinerege opadduwa, athu owinjhiva enna ohudhera vamodha ni ohariha malagano a Mbibliyani mwigumini mwewa, mwaha wa porogarama o omuhudhiha Bibliya oneriwa elabo yatene. (Isaías 2:2-4) Matxikwi ni matxikwi aathu enohudhera okanna murala wohagalala ni okanna monelo wapama wodhela wapara mabasa ni dhorela. Athu ala enna ohudhera okanna egumi yohagalasa ovanene ni okala athu Mulugu anafuniye wi ekalege mwilaboni yavati osogolo.

OMWENE WA MULUGU ONERE DDI OSOGOLO?

Yesu ohubajha olamula odhulu. Mbwenye elabo yavati enthongiwa naathu. Bumwahaya Mulugu adhe amwaddelege Yesu eraga: ‘Othongege vari va amwiddani awo.’ (Salmos 110:2) Mowaguva Yesu anere watolosa amwiddani aye aatene, ni anere odhana ovulusa wa ale enamwiwelela Mulugu ni murima watene.

Mudhidhi oyo wafiya Omwene wa Mulugu onere:

• Omariha webedha wowoota. Dhigereja dhinahudhiha dhowoota wodhela Mulugu ni dhinaatotela makathamiho athu dhinere ogujhuliwa. Mwaha wa dhotega dhiwa, webedha wowoota Bibliya analiganiha ni mwihiyana namararuwa. Makalelo aye ogujhuliwa enere warurumusa athu owinjhiva. — Apocalipse 17:15, 16.

• Omariha onamathonga waathu. Omwene wa Mulugu onere ogujhula ni omariha omwene watene wa mwilaboni. — Apocalipse 19:15, 17, 18.

• Watolosa athu abure. Enapadduwele ddi athu ensakula werana dhithu dhabure ni ehinafuna omwiwelela Mulugu? ‘Athu abure enere otolosiwa mwilaboni.’ — Provérbios 2:22.

• Omutolosa Saddana ni ademoniyu aye. Saddana ni ademoniyu aye kidha ‘yaleketha malogo’. — Apocalipse 20:3, 10.

Dhithu baani dhapama enaakele athu eniwelela dhoholela dha Omwene wa Mulugu?

MARELIHO BAANI ONADHENA OMWENE WA MULUGU?

Dhithu onere Yesu osogolo ninga Mwene kadhinaligana ni ethu-sithu enrena namathonga di namathonga elabo ela. Yesu anerege okaviheriwa ni athu owakwana 144 000 esakuliwe mwilaboni ela yavati wi yathongege vamodha nuuliye. (Apocalipse 5:9, 10; 14:1, 3) Yesu anere weeriha wi efunelo ya Mulugu yereye. Ndo Omwene wa Mulugu onere?

• Omariha oredda ni okwa. ‘Kavo onadha era: Miyo gili muredda’ ni ‘kawindha wikala okwa’. — Isaías 33:24; Apocalipse 21:4.

• Odhana murenddele ni obareleya webaribwri. ‘Aninyu enere othabwa okanna murenddele’, ni ‘aliwa enerege okirati musiddo mwa muthanko wa videra ni figera,Kavo muthu onaathusege.’ — Isaías 54:13; Miqueias 4:4.

• Wavaha athu atene mabasa owoneleyamo. ‘Malogo aga gasakulimi enerege ofwanya mpurelo wa mabasa yapariwa ni mada ewa. Kinaparege mabasa ebewene.’ — Isaías 65:22, 23.

• Osasanyedha makathamiho a mwilaboni. ‘Mwiddeddereni ni thaya yowumma dhinerege ohagalala, eddeddere yamusalasala enerege othaba ni enerege okanna folori ninga njhani.’ — Isaías 35:1.

• Wahudhiha athu wi enone ethu yowera wi efwanye egumi yohimala. ‘Wihina ekanne egumi yohimala, yunoneni nyu, Mulugu mmodha eebaribari, nuule mmurumilinyu, Yesu Kiristu.’ — João 17:3.

Mulugu onofuna vanlubale wihina wawakele mareliho ala. (Isaías 48:18) Musolo onaharela, onere owoga dhithu onafwaneleliwe wera wi wawakele mareliho ala a osogolo wohagalasa.