Okavihere Omwene wa Mulugu ovanene!
Wubuwele nahere nipevo nakopolo naddamelaga. Nipevona thakopolo nnere ogujhula dhithu dhowinjhiva. Athu wakela muthenga oni: “WIWE: OVENYE MBURO WOWOPIHA! OTHAWELE NBURO WOBARELEYA!” Were ddi? Mwebaribarene were wiwelela muthenga ola.
Iyo ninna waddamela “nipevo nakopolo” Yesu ithaniliye ‘ohoseya winddimuwa.’ (Mateus 24:21) Kahi wihina nnere ovenya nthamagege nthawaga ohoseya winddimuwa. Mbwenye onohowela werana ethu wihina wibarele. Onere ddi?
Yesu ohuwoga mwaha va Mwangoni egi: ‘Mowindala, mudidele waja Omwene ni wogowa wa Mulugu.’ (Mateus 6:33) Nnerena avi?
Vobajha waaje Omwene wa Mulugu. Eyo enatapulela wi Omwene wa Mulugu okale ethu ya thima mwigumini mwawo. (Mateus 6:25, 32, 33) Mwahaya bwaddi Omwene ola odhe okale ethu yathima? Mwaha Omwene wa Mulugu baahi onere wanda werana ethu anamathonga a elabo ela ehandiliwa werana — omariha makathamiho athu.
Waaje wogowa wa Mulugu. Niilibihedhe ohara malagano owogowa a Mulugu. Nasakulaga nannya ethu yapama ni yabure, nnohadda dhithu dhowawa. (Provérbios 16:25) Mbwenye nasakula omwiwelela Mulugu, nnomuhagalasa ni nnokanna egumi yohagalasa. — Isaías 48:17, 18.
Voobajha odidele waaja Omwene wa Mulugu ni wogowa waye. Yesu ohuwoga wi athu amodha yere ojheya murima ni dhoorela, yubuwelaga wi okanna korowa dhowinjhiva dhinere wabarela osogolo. Amodha yere othuwathuwa ni dhithu dha labo ni labo ofiyedha ohukanna mudhidhi woosayela Omwene wa Mulugu. — Mateus 6:19-21, 25-32.
Yesu ohupaganya wi athu enakavihera omwene wa Mulugu enerege okanna dhofuneya dha labo ni labo ni enere wawakela mareliho owinjhiva osogolo. — Mateus 6:33.
Anamahara a Yesu ehisayela Omwene wa Mulugu ni wogowa waye. Mbwenye aliwa kayonile omagomelo wa makathamiho ni goyi mwigumini mwewa. Naari dhigarive ndo, aliwa ehibareliwa. Ni makalelo baani?
Aliwa yowahara malagano owogowa a Mulugu. Mowindo, aliwa ehirabela makathamiho enafwanya athu ehiniwelela malamulo a Mulugu. Aliwa yahikanna nroromelo nooliba wi Omwene wa Mulugu were odha, nroromelo nno nihakavihera owanana makathamiho manlubale yafwanya. Mulugu ahavaha ‘Kopolo dhohikala dha masika.’ — 2 Coríntios 4:7-9.
OMWENE ONERE DDI?
Makiristawu obajha yahiwelela nlamulo na Yesu na obajha waaja Omwene wa Mulugu. Aliwa olaleya muthenga dhapama dha Omwene mburo dhatedhene wafwanyeya athu. (Colossenses 1:23) Peeno ohukalawo muthu onaapara mabasa yala?
Hee! Anamona a Yehova ehinona wi ohanle mudhidhi vang’ono wihina Omwene wa Mulugu omarihe makathamiho a elabo ela yotakala. Bumwahaya aliwa enowilibihedha vanlubale wi yerena awogile Yesu: ‘Muthenga ola wapama womwene, onere olaleyiwa mwilaboni yatene yavati, wengo winafwanyeya athu, vano omakuthulo wifiye.’ — Mateus 24:14.
Wiwa muthenga ndha dhapama onere ddi? Iyo nnowukongomedha wihina watajhihe akudda Bereyano, o Masedoniya. Murumiwi Pawulo numala walaleya muthenga wapama wa Omwene, aliwa orumedha ni ‘efunelo yatene’. Numala ‘yoowileri Dholebela malabo matene’ wihina ekanne nroromelo wi dhatedhene dhaali ebaribari, vano aliwa oharaga ndhe yahudheriwa. — Atos 17:11, 12.
We podi wera emodhave. Wasogoliha Omwene wa Mulugu ni wogowa waye, onere ofwanya “mburo woobareleya” ovanene onere okanna murenddele webaribari ni obareleya osogolo.