Athu aatene a mmulogoni podi omukavihera namahudhera ofiyedha obaddiziwa

1-2. Baani anaamukavihere namahudhera Bibliya ofiyedha obaddiziwa?

“MIYO godhiveliwa gamuhudherimi Bibliya. Gahinona wi ela yaali ebaribari. Mbwenye gaambele osaddula egumi yaga nubajha otugumana ni addibila, vano othoma wihina gibaddiziwe.” Siyeyo murogola anithaniwa Amy, anakala oFiji, asorihiliye. Madhu aye enosoriha ebaribari yathima enihina: Enokweya namahudhera a Bibliya othoma wihina abaddiziwe akaviheriwa ni addibila amodha ammulogoni.

² Kadda namalaleya podi werana ethu-sithu wihina mulogo waye wunnuwe. (Efé. 4:16) Piyonera dhala anithaniwa Leilani, anakala oVanuwatu, onosoriha egi: “Ohukalawo mwanamusibe onihina enohoweleya murudda watene wihina omulele mwaana. Ginona wi eyo enohoweleya nafunaga wawerana anamahudhera. Mwebaribarene, enohoweleya mulogo watene wihina muthu anone ebaribari.” Amudhaaye, akwaye ni anamahudhiha aatene ehikanna epaddi yewa yomukavihera mwaana wunnuwelavo. Aliwa enowerana eyo emukongomedhaga ni emuhudhihaga muselu dhathima. Ni makalelo mamodhave, anamalaleya podi wavaha dholaga, walibiha ni watonyihedha mweddelo wapama anamahudhera Bibliya. Yerana ndo, podi wakavihera ofiyedha obaddiziwa. — Pro. 15:22.

3. Ohudhere ddi ni ethu awogile Ana, Dorin ni Leilani?

³ Addibila aatene ammulogoni podi omukavihera namahudhera Bibliya. Namalaleya aneddiha ohudhera wule anofwanelela otamalela. Woone awogile Ana, piyonera avayeka oMoldaviya, onihina: “Kahi ethu yokweya namahudhiha omukavihera namahudhera Bibliya ofiyedha wunnuwelavo epaddi yomuzimuni.” Dorin, piyonera avayeka anakavihera oMoldaviya, ohusoriha egi: “Mwebaribarene anamalaleya amodha enosoriha ethu enadahinya murima wa namahudhera Bibliya, malabo mamodha, ethu gahinubuwelimi osoriha.” Leilani onosoriha ethu emodhaya: “Namahudhera Bibliya oonaga odhivela enna addibila a mmulogoni onowonelamo wi iyo nili nlogo na Yehova.” — João 13:35.

4. Yohudhera ela nnoone ddi?

⁴ Podi wera onowikoha: ‘Ginamukavihere avi namahudhera Bibliya wula ahili miyo anamuhudhiha?’ Yohudhera ela, nnere woona ethu nnahowelihu werana nanvelelaga muthu adhowaga omuhudhiha namahudhera Bibliya. Vasogolova nnere woona ethu baani enahoweleya namahudhera ambela woona mutugumano. Vogomihera, nnere woona anamaholela mulogo enere ddi wihina emukavihere namahudhera Bibliya wunnuwelavo ofiyedha obaddiziwa.

WATHANANIHAGA OHUDHERA WA BIBLIYA

5. Wereliwa wi othananihe ohudhera wa Bibliya mutholo wawo buuvi?

⁵ Namuhudhihaga Bibliya, anna mutholo womukavihera namahudhera Bibliya wawonelamo Madhu a Mulugu di namahudhiha. Namahudhiha uwithana wihina mudhowe vamodha, wiwonege ninga namakavihera. Mutholo wawo bookavihera baahi. (Ecl. 4:9, 10) Mwebaribarene, enahoweleya ddi wihina ohudhera wule odahinye murima?

6. Onalabihedhe avi madhu eli va Provérbios 20:18, walobiwa wihina othananihe ohudhera?

⁶ Wiwegeredhe kadda ohudhera. Vobajha, omulobe ddibila uwithanne wihina uwaddelemo ekalelo ya namahudhera aye. (Omwileri Provérbios 20:18.) We podi omukoha: “Dhithu baani dhimpadduwele mwigumini mwaaye? Ehikalawo ethu enafwanelela wihina giwoge, obe gihiwoge? Enaamukavihere namahudhera awo wunnuwelavo ddi?” Ebaribari wihina namahudhiha kanawoge dhithu dhinampatha namahudhera aye, mbwenye dhithu anamwaddeliye dhinere wukavihera vanlubale. Joy misiyonariya dhala ohukanna elemelelo yoothapanya ni arogola enamwithanela ohudhera wewa wa Bibliya. Oliye onowoga egi: “Ginodhiveliwa othapanya ni mukwaga a mmalaleyelo mwaha wihina othapanya wula onomukavihera mukwaga okanna efunelo yomukavihera namahudhera aaga ni thomo anakuliye.”

7. Naarive onvelelaga muthu mmodha wa namahudhera aye mwahaya bwaddi sapama wiwegeredha?

⁷ Walobiwa wihina othananihe ohudhera yere okala yapama wegeredha epaddi munadhowinyu ohudhera. (Esd. 7:10) Dorin, awogiwe mundduli anowoga egi: “Enogihagalasa ganona wi mukwaga anagivelela ohegeredha epaddi nnafunihu ohudhiha. Ni makalelo yala ginowanda wakula dhithu dhofuneya.” Ohiya eyo, namahudhiha vamodha ni weya mwiwegeredha pama, namahudhera ole anere woona, nuwindo anere wutajhihani. Naarive ohandile wegeredha pama epaddi munafuninyu ohudhera, ovede mudhidhi vang’ono wihina woone mutoma dhinafuninyu ohudhera.

8. Onakanne avi ebaribari wihina nlobelo nnokavihera mudhidhi womuhudhiha Bibliya?

⁸ Mwahudheraga, olobela ethu yofuneya. Bumwahaya, wabihe wubuwela dhithu dhowoga akala namahudhiha ole anere wuloba wihina olobele. Werana yeyo, malobelo awo enere okanna thima. (Sal. 141:2) Sugwa empadduwele murogola Hanae, anakala oJapawu. Mudhidhi amuhudheraga Bibliya, malabo owinjhiva namahudhiha aye omuthukulesa murogola dhaala wihina anvelele. Ofiyedha peeno Hanae onowawubuwela malobelo a murogola ole. Oliye onowoga egi: “Miyo gowoona wihina ahikanna wandana woliba ni Yehova, teto goofuna okala ninga oliye. Ela yogivaha ebaribari wi oliye onogidhivela mwaha wihina mudhidhi watene alobelaga oromola ndina naaga.”

9. Ninga munawogela Tiago 1:19, enahoweleya were ddi wegi omukavihere namahudhiha mudhidhi wohudhiha?

⁹ Omukavihere namahudhiha. Omamuyovbi, piyonera avayeka oNijeriya anowoga egi: “Mukwawo apama wamuhudhihaga Bibliya duule anuthananiha. Mudhidhi wohudhera oliye anowaakula, mbwenye kanathabwa owoga, mwaha ohunona wihina aneddiha ohudhera wa Bibliya di namahudhiha.” Ki mudhidhi baani onafwanelela owoga? Ki ethu baani enafwanelela owoga? (Pro. 25:11) Ompwasedhe namahudhiha ni namahudhera yawogaga. (Omwileri Tiago 1:19.) Werana yeyo onere wakula mudhidhi wofwanelela. Ebaribari wihina enofwanelela okanna ekalelo yapama. Motajhiha, kuthabwe owoga, teto kugwaddege mubuwelo wa namahudhiha newene kuwoge ethu emodha ehiniwanana ni muselu yole. We podi omoonelihamo namahudhera ole mwaha wowakula wogwaddela, owoga nladdaniho, obe okoha. Woona wihina ohuvira mwanamudhidhene ahiwogile ethu omutamalele namahudhera teto wonihe wihina onomudhivela. Eyo enere omukavihera namahudhera ole wunnuwelavo epaddi yomuzimuni.

10. Dhopadduwa dhamwigumini mwawo dhinamukavihere addi namahudhera Bibliya?

¹⁰ Owoge dhithu dhamwigumini mwawo. Wafiya mudhidhi wofwanelela we podi owoga makalelo ohudheriwe ebaribari, ogonjhihiwe dhoweha ni makalelo woniliwe wihina Yehova anowukavihera. (Sal. 78:4, 7) Yopadduwa yamwigumini mwawo podi okala ethu enaamukavihere namahudhera ole. Teto malabo mamodha podi olibiha nroromelo naaye obe omuthukulela wunnuwelavo ofiyedha obaddiziwa. Podi wera yopadduwa yamwigumini mwawo enere omukavihera namahudhera ole ogonjhiha dhoweha dhinanfwanya. (1 Ped. 5:9) Piyonero dhala anithaniwa Gabiriyeli, anakala oBrazil ofiyedha peeno anowubuwela ethu emukavihere mudhidhi amuhudheraga Bibliya. Oliye anowoga egi: “Gavuruwanaga dhopadduwa dha addibila amodha gowoona wihina Yehova anowoona dhoweha dhinanifwanya. Teto akala aliwa ehanda ogonjhiha dhoweha ndho ni miyowa ginere wanda.”

NAMAHUDHERA AMBELA ODHOWA OMUTUGUMANONI

11-12. Mwahaya bwaddi sapama omwaakela ni mada aamatene namahudhera a Bibliya anambela odhowa omutugumanoni?

¹¹ Namahudhera Bibliya egi unnuwelevo epaddi yomuzimuni ofiyedha obaddiziwa, enohoweleya oonege mutugumano dhatedhene ni dhimukaviherege. (Heb. 10:24, 25) Podi wera namahudhiha dinamwithanele namahudhera aye omutugumanoni. Namahudhera ole adha omutugumanoni aatenihu podi omukongomedha wihina oonege mutugumano dhatedhene. Ki nnande addi omukongomedha?

¹² Omwakele pama namahudhera. (Rom. 15:7) Namahudhera ole oona wi ohakeliwa pama omutugumanoni, podi wera anere okanna efunelo yohogolowela omutugumanoni. Sapama omulojhela namahudhera ni omoniha athu amodha. Kuwubuwele wihina addibila amodha enomulojhela ni enowerana dhithu dhatedhene dhinahoweleya. Podi wera namahudhiha kanafiye obe onasamalela mutholo mmodha. Ovuruwanege pama dhithu anawoga namahudhera ni woonihe wihina onomudhivela. Yamwakela pama namahudherawo anonelemo avi? Woone ethu empadduwele Dmitrii. Oliye abaddiziwe ovaneneve mbwenye vano mudhaari ookavihera. Wodhela mutugumano waye wobajha, anowoga egi: “Miyo gaali ode wa Nyumba Yomwene gijhehaga oothuwathuwene. Ddibila dhala ogoona nuudhivela ogivelela mu Nyumbani Yomwene. Addibila owinjhiva yahidha ogilojhela. Gahitikina vanlubale. Vano miyo wubuwela: Yere okala yapama malabo amatene wahakalege mutugumano. Mwaha gakala muna ginowoona dhithu gihinandimi woona mburo mmodhaya.”

13. Mweddelo wawo onaakavihere avi anamahudhera Bibliya?

¹³ Okalena mweddelo wapama. Ekalelo yawo yapama podi omukavihera namahudhera a Bibliya ohudhera ebaribari. (Mat. 5:16) Vitalii, peeno ali piyonero amudhidhi wamutene elabo yo Moldaviya, anowoga egi: “Miyo gowasugwa pamadhene addibila ammulogoni mweddelo wewa, makalelo owubuwela ni makalelo owerana dhithu. Eyo yahigithukulela orumedha wihina Anamona a Yehova enedda ni Mulugu.”

14. Mweddelo wawo onaamukavihere avi muthu wunnuwelavo epaddi yomuzimuni?

¹⁴ Namahudhera ahinabaddiziwe, anohowela weddelaga ndhe anahudheriye. Eyo kinakweya. Mbwenye namahudhera Bibliya oonaga wihina ni weya onowaweddela magano a mBibliyani, podi omuthukulela werana emodhave. (1 Cor. 11:1) Osugwe yopadduwa ya Hanae, awogiwe mundduli. Oliye anowoga egi: “Addibila ammulogoni yowerana ndhe gahudherimi. Miyo ohudhera makalelo owahagalasa amodha, walevelela ni makalelo owawoniha odhivela waaga. Addibila yoowogana opama. Bumwahaya gafuna gikale ninga aliwa.”

15. Ninga munawogela Provérbios 27:17, mwahaya bwaddi sapama wandana ni anamahudhera a Bibliya?

¹⁵ Wandane ni namahudhera. Namahudhera adhowaga omutugumanoni wonihe wihina onoompwatha. (Fil. 2:4) Osayelege mudhidhi wihina othapanyege nnamahudhera awo ohivolowelaga egumi yaye. Omutamalele namahudhera mwaha wa osaddula egumi yaye ni dhithu dhapama aneriyena. Omukohe makalelo onedda ohudhera waye wa Bibliya, omukohere amudhaaye vamodha ni mabasa aye. Makalelo ala othapanya, podi wuthukulelani okanna wandana wapama. Eyo enere omukavihera namahudhera ofiyedha obaddiziwa. (Omwileri Provérbios 27:17.) Hanae peeno piyonera ookavihera. Mudhidhi ambelagawene woona mutugumano, anowoga egi: “Gabamjhimi okanna wandana mmulogoni, wogidhivela odhowa omutugumanoni. Naarive ngagome godhowa omutugumanoni. Gohagalala vanlubale okala naakwaga axa. Wandana wula ohugikavihera ogwadda wandana wabure gannimina ni athu ehinamulabela Yehova. Goofuna wandana pamadhene ni Yehova vamodha ni addibila ammulogoni. Bumwahaya, miyo othoma wihina gibaddiziwe.”

16. Ethu emodhaya enahoweleya wihina omukavihere namahudhera okala otapuwene afiyaga mmulogoni siddiniyani?

¹⁶ Mudhidhi namahudhera unnuwelaga epaddi yomuzimuni ni asaddulaga egumi yaye, omukavihere woona wihina anokosa epaddi ya mmulogoni. Makalelo owerana yeyo fumwithanela wihina adhe owaninyu. (Heb. 13:2) Ubuwelaga mudhidhi aaliye namahudhera Bibliya, Denis, anakavihera oMoldaviya anowoga egi: “Mudhidhi wowinjhivene miyo vamodha ni mwaraga nowithaniwa wihina naredhe ni addibila. Mudhidhi yoyo, yowoga makalelo Yehova aakaviheriye, eyo yonilibiha vanlubale. Yahinithukulela okanna ebaribari wihina nnofuna omulabela Yehova teto nere okanna egumi yohagalasa.” Namahudhera Bibliya akala namalaleya ohubaddiziwa omwithane wihina mudhowe mmalaleyelo vamodha. Diego, namalaleya anakala oBrazil, anowoga egi: “Addibila owinjhiva ammulogoni yoogithana wihina ndhowe vamodha mmalaleyelo. Ala yaali makalelo apama owaanona addibila. Gahihudhera dhithu dhowinjhiva ni addibila ala, teto miyo wonaga wihina gikanna wandana wapama ni Yehova vamodha ni Yesu.”

ANAMAHOLELA MULOGO ENAKAVIHERE AVI ANAMAHUDHERA?

17. Anamaholela mulogo enaakavihere avi anamahudhera Bibliya?

¹⁷ Osayelege mudhidhi wihina othapanye ni anamahudhera Bibliya. Anamaholela, makalelo munaadhivelinyu anamahudhera Bibliya podi wakavihera ofiyedha obaddiziwa. Munoonamo avi kadda mutugumano osayela mudhidhi wihina muthapanye ni anamahudhera? Yabajha wakula omutugumanoni, muwogege ndina newa. Mwa makalelo yala aliwa enere woona wihina munowadhivela. Malabo mamodha mwiwegeredhe wihina munvelele namalaleya anadhowa wa namahudhera aye. Namahudhera amoona namaholela mulogo amuthananihaga ohudhera waye anere oliba vanlubale. Jackie, piyonera anakala oNijeriya, anowoga egi: “Anamahudhera owinjhiva enotikina vanlubale yanona wihina ddibila aagivelele namaholela.” Namahudhera dhala a Bibliya ohuwoga egi: “Pastoraga kaadhe erana ethu ninga yela. Oliye anawaredhela athu oorela baahi, yamuliva!” Namahudhera ola anna woona mutugumano.

18. Anamaholela mulogo enakwanihedha avi mutholo wewa onafwanyeya va Atos 20:28?

¹⁸ Mwahudhihe ni mwaxagihe anamahudhiha. Anamaholela, muhukanna mutholo munlubale wowakavihera anamalaleya wapara mabasa ewa oolaleya ni ohudhiha. (Omwileri Atos 20:28.) Malabo mamodha namalaleya podi okanna manyazo womuhudhiha namahudhera aye ogaali venvo. Yapadduwa eyo, podi wivelela wihina omuhudhihe namahudhera aye. Jackie, awogiwe mundduli, anowoga egi: “Anamaholela mulogo yogikohesa makalelo eliwa anamahudhera aaga. Gafwanya makathamiho gamuhudhihaga namahudhera aaga, aliwa yogivaha dholaga dhapama.” Anamaholela mulogo ehikanna mutholo munlubale wowalibiha anamahudhiha Bibliya ni wakavihera ohihiya wapara mabasa ewa. (1 Tes. 5:11) Jackie anowenjhedhedha: “Miyo ginohagalala vanlubale anamaholela mulogo yagilibihaga ni yawogaga wihina mabasa aaga bathima. Madhu ninga yala, enakala ninga manjhe onavahiwiwe wagoma nthona. Makalelo ewa ootamalela enowenjhedhedha nroromelo naaga ni ohagalala ginnimina gahudhihaga anamahudheraga.” — Pro. 25:25.

19. Ohagalala baani atenihu nnafwanyihu?

¹⁹ Akala kunamuhudhiha Bibliya we podi omukavihera muthu ofiyedha obaddiziwa. Wanvelelaga muthu wihina mwamuhudhihe Bibliya wiwegeredhe wihina waakule mwamakalelo enaamukavihere namahudhiha, teto pole-pole wihina onaathabwe owoga. Okanne wandana wapama nnamahudhera anoona mutugumano, ni okalena mweddelo wapama wihina aliwa etajhihe. Akala oli namaholela mulogo wakavihere anamahudhera Bibliya osayelaga mudhidhi wihina othapanye naliwa. Walibihe anamahudhiha Bibliya waxagihaga ni watamalelaga. Ni makalelo yala, onere okanna ohagalala winlubale womukavihera muthu omudhivela ni omulabela Babi ehu Yehova.