OHUDHERA 28
Omwene wa Mulugu winna othonga!
‘Omwene wamwilaboni vano onathongiwa ni Omwene wa Mulugu ni wa Kiristu’—APO. 11:15.
JHIBO 22 Omwene weenyu odhe!
DHITHU NNAAHUDHERIHUa
1. Dhithu baani dhinapadduwa peeno mwilaboni, ki eyo enoniha ddi?
ATHU yawonaga makathamiho enereya mwilaboni enubuwela wihina dhithudha kadhinawomele, mwaha murala dhinna ogawanyeya teto athu enna othabwave okala abure ni anrima, teto athu owinjhiva enowarusa waroromela ale enathonga. Mbwenye mwebaribarene dhithudha dhinapadduwa dhinowoniha wihina dhili nenaa wihina dhimarihiwe. Mwahaya? Mwahaya bowi ndhe dhinerana athu dhinotonyihedha ndhe Bibliya awogiliye wihina dhinerege opadduwa ‘malabo okuthula.’ (2 Tim. 3:1-5) Muthu di muthu anapendda dhithu dhinapadduwa peeno, anowoona wihina dhovuhulela dhinawoga wodhela malabo okuthula dhinna wakwanela, eyo enowoniha wihina Yesu anna othonga Mumweneni mwa Mulugu. Teto dhikalawo dhovuhulela dhimodha dhinawoga wodhela Omwene wa Mulugu. Opendda dhovuhulela ndha dhinakwanela peeno dhinere olibiha nroromelo nehu.
Ninga pesa dha kebara-kabesa dhiniwananiwa wihina muthu aganyari, dhovuhulela dha Daniyeli ni ya Apokalipse dhinowiwanana wihina dhinonelihemo mudhidhi nnafwanyeyihu malabo yala (Osugwe ddima 2)
2. Ohudhera wula nnoone ddi, mwahaya bwaddi? (Osugwe fotu ya vakapani.)
2 Ohudhera wula nnere woona (1) yovuhulela enanikavihera woonelamo mudhidhi obanjhe othonga Omwene wa Mulugu, (2) yovuhulela enanikavihera wonelamo wihina Yesu namathonga Mumweneni wa Mulugu odhulu, (3) yovuhulela enanikavihera wonelamo makalelo amwiddani a Mulugu enaatolosiwiwa. Dhovuhulela ndha dhinakala ninga kebra-kabesa, nataganyihedha pesa dhatedhene nnowedha woona ni wonelamo wi dhatedhene dhinapadduwa mowiwanana ni mudhidhi wa Yehova.
NNAWEDHE ADDI ONONA MUDHIDHI OMWENE WA MULUGU OTIKITERIWIWA
3. Yovuhulela ya Daniel 7:13, 14 enanroromeliha ddi wodhela Omwene wa Mulugu?
3 Yovuhulela ya Daniel 7:13, 14 enihina Yesu akale mwene anathongege nuwogowa. Athu amalogo amatene yerege ohagalala mwaha omulabela, teto oliye kanadha aakiwa Omwene waye wihina avahiwe mwene mmodha. Yovuhulela emodha ya Daniyeli enawoga wihina Yesu eere obajha othonga omagomihedho wa mudhidhi mitanu nabili. Enowedheya onona mudhidhi Yesu abajhiliye othonga?
4. Daniel 4:10-17 ananikavihera aavi onona yaka Yesu aatikiteriwiye ninga mwene? (Osugwe nota.)
4 Omwileri Daniel 4:10-17. Mudhidhi ndha ‘mitanu nabili’ dhinatapulela yaka 2.520 mudhidhula obanjhe yaka ya 607 M.W.O. akudda babiloniya numuhisa mwene ogomihedha aatikiteriwe ni Yehova oJeruzale. Ki mudhidhi ndha mitanu nabili dhimanle alini? Dhimanle yaka ya 1914 M.W. Yehova numutikitera Yesu ninga namathonga ofwanelela Mumweneni mwaaye.b — Eze. 21:25 -27.
5. Mwahaya bwaddi dhovuhulela ndha mudhidhi ‘mitanu nabili’ dhikala dhathima mwigumini mwehu?
5 Mwahaya bwaddi yovuhulela ela ekala yathima mwigumini mwehu? Wonelamo dhovuhulela wodhela mudhidhi ‘mitanu nabili’ dhinolibiha nroromelo nehu wi Yehova anere wakwaneliha mpaganyo dhaye mudhidhiya wakwanela. Nimakalelo mamodhave Yesu ariye mwene dhovuhulela dhatene dhinere wakwanela mudhidhi wofwanelela ninga Yehova athomiliye. Nikanne ebaribari wihina nlabo na Yehova ‘kannaalegele!’ — Hab. 2:3.
NNONNE ADDI WIHINA YESU MWENE MUMWENENI MWA MULUGU
6. a) Nnonne addi wihina Yesu ana othonga odhulu? b) Apocalipse 6:2-8 anaakulela aavi muselu yola?
6 Agahanle neena wihina amarihe mabasaye olaleya mwilaboni ya vati, Yesu ahiwoga dhithu dhereyege dhatonyihedhege wihina oliye anna othonga odhulu. Ahisoriha wi dherege opadduwa ninga koddo, dala, oddiginyeya weelabo, dhiredda mburo dhohiyana-iyana ninga mutipa ola wa koronaviru. Dhopadduwa ndha dhatene dhinotonyihedha ele Bibliya anawogiye ninga ‘yintelelo’ yonihe wi Kiristu anna othonga. (Mat. 24:3, 7; Luc 21:7, 10, 11) Nuuvira yaka 60 Yesu nuukwa ni nuuhogolowela odhulu oliye omoonelihamo murumiwi Juwawu dhithu dhakwanele osogolo. (Omwileri Apocalipse 6:2-8.) Dhithu ndha dhibanjhe opadduwa yaka ya 1914 Yesu nubajha othonga.
7. Mwahaya bwaddi dhipadduwaga dhithu dhabure mwilaboni obajha mudhidhi Yesu aromiliye othonga?
7 Mwahaya bwaddi dhithu mwilaboni dhithabwaga Yesu nubajha othonga? Apocalipse 6:2 anovaha dhowakula dhathima — ethu yobajha Yesu eriliyena nuukala mwene yaari koddo awanihiliye. Nnaani? Saddana vamodha ni ademoniyu aye. Apocalipse kapitulu 12 anihina Saddana vamodha ni ademoniyu aye yahigonjhihiwa, ovokedhiwa velaboni ya vati nuwindo Saddana ‘wanyanyuwela athu aatene velaboni ya vati’, mwaha wa yeyo athu enowoona goyi. — Apo. 12:7-12.
Iyo kannahagalala niwaga muselu dhabure, mbwenye onona wihina omwene wa Mulugu winna othonga winolibiha nroromelo nehu (Osugwe ddima 8)
8. Mwahaya bwaddi nihithuwathuwaga woodhela dhithu dhabure dhinapadduwa peeno?
8 Mwahaya bwaddi yovuhulela ela ekala yathima mwigumini mwehu? Ninga nonilihu omambelelowene enowoneya wihina Yesu anna othonga odhulu mwaha ekalelo yabure yaathu peeno. Bumwahaya ohiya otakaleliwaga ni ekalelo yabure yaathu peeno enohoweleya wubuwela wihina aliwa enakwanihedha dhovuhulela dha mBibliyani. Omwene wa Mulugu onoothonga! (Sal. 37:1) Kananganyedhe wihina dhithudha dhinerege othabwa mudhidhi Armajedo aaddamelaga. (Mar. 13:8; 2 Tim. 3:13) Kunahagalala mwaha omulabela Mulugu oodhivela ananikavihera wonelamo dhithu dhorusa dhinapadduwa?
AMWIDDANI AMULUGU ENATOLOSIWE NI MAKALELO BAANI
9. Mowiwanana ni Daniel 2:28, 31-35, Potensiya baani yakale mwilaboni mudhidhi Yesu aabajhiye othonga?
9 Omwileri Daniel 2:28, 31-35. Iyo nnowona dhovuhulela ndha dhakwanelaga peeno. Yoroha ya Nabukodonozori yahiwoga dhithu dhaapadduwege Yesu abajha othonga ‘omagomihedho wa malabo okuthula,’ amwiddani a Yesu enawogiwa mBibliyani enagiwana Potensiya Mundiyale enaladdanihiwa ni ‘manyalo a mujhila ni ologo.’ Potensiya Mundiyale eruthuwe ni koddo yobajha yapele elabo yatene mudhidhi Gra-bretanya ni Estadu Unidu yandanniwa. Yoroha ya ekwamuthu ya Nabukodonozori enowoga dhikalelo biili dha potensiya ela enahiyaniha ni Potensiya dhimodha dhivirile.
10. a) Yovuhulela ya Daniel enawoga makalelo baani owoneya wodhela potensiya Mundiyale Anglo-Amerikana? b) Ethu baani nnahowelihu okala pole-pole? (Osugwe kwaduru “Pole-pole nuulogo!”)
10 Ekalelo yobajha enahiyana ni Potensiya dhimodha dhiwogiwe va yowoona ya Daniyeli siila, Potensiya Anglo-Amerikana kanaliganihiwa ninga oru obe parata mbwenye aladdanihiwe ni mujhila obe ologo enatapulela muthithi waathu oli elabo yavati. (Dan. 2:43, nota.) Peeno nnowona ekalelo yaathu yasakulaga anamathonga wodhela ovotari ni kampanya dha direyitu sivili ni wathuwathuwela anamathonga.dhithu ndha dhinowathukulela anamathonga warusa werana enafuniwa.
11. Mwahaya bwaddi nihanganyedhaga wihina nnakala malabo okuthula?
11 Ethu yanabili ya potensiya Anglo-Amerikana enoonihedha manyalo a ekwamuthu yinlubale sowihina si potensiya yogomihedha enawogiwa mBibliyani, yavira potensiya yela kinaadhewo Potensiya emodha. Omagomihedho wa potensiya ela enakale koddo ya Armajedo Omwene wa Mulugu onagujhuliwa onamathonga watene waathu.c — Apo. 16:13, 14, 16; 19:19, 20.
12. Dhithu baani dhinoniha wi nili omakuthulo wa yovuhulela ya Daniel?
12 Yovuhulela ela ekalele ddi yathima mwigumini mwehu? yovuhulela ya Daniyeli enonikavihera wonelamo wihina niliwo mudhidhi wokuthula yaka 2520 mundduli Daniyeli ahiwoga wi Babiloniya avira dhere okumelelavo potensiya nayi dhavolowele nlogo na Yehova. ohiya yeyove Daniyeli ahiwoga wi Potensiya Anglo-Amerikana yerege othonga mudhidhi Yesu aliye mwene odhulu ni anakale mwene anathongege elabo yatene. — Dan. 2:44.
13. a) Mwene ‘anetanu natharu’ ni ‘manyaga kumi’ esorihiwe va Apocalipse 17:9-12, enatapulela ddi? b) Dhovuhulela ndha dhinakwanela nimakalelo baani?
13 Omwileri Apocalipse 17:9-12. Koddo yobajha yahatotela makathamiho athu aatene mbwenye koddo eyo ehakwanihedha dhovuhulela dha mBibliyani wodhela malabo okuthula anamathonga elabo yanna wilibihedhave wihina edhena murenddele mwilaboni. Vano mweri wa Janeiro wa 1920, aliwa opandda nikuru nnithaniwa Wiwanana wa Malogo, vano Outubro a 1945 osadduliwa okala Wiwanana wa Malogo. Nikuru nna nnithaniwa mwene anetanu natharu, mbwenye oliye kahiyo Potensiya Mundiyale. Eyo enowoneya mwaha othonga waye onawedha nnikavihero nanamathonga amodhaya Bibliya anowaawoga mamwene ala ninga ‘anamathonga kumi.’
14-15. a) Apocalipse 17:3-5 anawoga ddi wodhela ‘Babiloniya Munddimuwa’? b) Empadduwa ddi peeno ni magereja awoota?
14 Omwileri Apocalipse 17:3-5. Mulugu omoniha Juwawu namararuwa munlubale anithaniwa ‘Babiloniya Munddimuwa’ anatapulela magereja amatene owoota. Yowoona onile Juwawu enakwanela aavi? Obajha kale magereja owoota enowakavihera anamathonga elabo. ki enaapadduwe ddi? ‘Kopolo ndha dha pulitika obe anamathonga kumi enere wavolowela magereja owoota ni yaagujhule.’ — Apo. 17:1, 2, 16, 17.
15 Nnonile addi wi omakuthulo wa Babiloniya Munlubale wihaddamela? Wihina nakule nikoho nna naabihe wubuwelela luwani yinlubale yo Babiloniya, epaddi yinlubale ya luwani ele yabareliwa ni mwihinjhe Ewufarati. Livuru na Apocalipse nnowaladdaniha athu enakavihera magereja owoota ninga “mwihinjhe” wa Ewufarati, enakala ninga enowaabarela. (Apo. 17:15) Teto Apocalipse onowoga wihina mwihinjhe oyo were wumma, enoniha wihina magereja owoota yere oyelela nikavihero. (Apo. 16:12) Yovuhulela ela enowakwanela peeno mwaha athu owinjhiva enna osukuma magereja owoota evedaga nikavihero na makathamiho ewa mburo mmodha.
16. Wiwanana wa Malogo onakumelele alini? Ki Babiloniya Munlubale anagujhuliwe alini?
16 Yovuhulela ela ekalele ddi ya thima mwigumini mwehu? Oruthuwa wa Wiwanana wa Malogo ni woona wihina athu kinakavihera gereja dhowoota enowoniha wi nnakala malabo okuthula. Naarive athu owinjhiva yahimukaviheraga Babiloniya Munlubale omakuthulo waye onaadhe ni makalelo mamodhaya. Ninga nonilihu Yehova anere waweriha ‘mamwene kumi’ enatapulela kopolo dhothonga ni enamukavihera Wiwanana wa Malogo wihina “yerena efunelo yaye”. Mohujhehera kopolo ndha dhothonga dhinere omugujhula Babiloniya Munlubale ni enere opadduwa morurumusa.d (Apo. 18:8-10) Ogujhuliwa wa Babiloniya munlubale onere warurumusa athu ni onere wadhana makathamiho owinjhiva, mbwenye nlogo na Yehova nnere okanna dhithu biili dhinahagalasege. Vobajha magereja owoota enere ogujhuliwa ni mukalakala, yanabili eyo enerege woniha wihina nili nenaa wihina noboliwe wodhela elabo ela yabure! — Luc 21:28.
OSUGWEGE OSOGOLO NI NROROMELO
17-18. a) Nnere ddi wihina nlibihe nroromelo nehu? b) Ohudhera winaharela nnone ddi?
17 Daniyeli ahiwoga wi ‘enonelo yeebaribari ‘yere’ odhala mwilaboni.’ (Dan. 12:4, 9, 10) Dhovuhulela ndha dhakwanelaga mohihiyedhedha eyo enowenjhedhedha nriho ninnihuna ni Yehova vamodha ni madhu aye Bibliya. (Isa. 46:10; 55:11) Bumwahaya odhowegeve olibihagave nroromelo nawo wodhela omuhudhera Bibliya ni wakavihera athu amodha wandana ni Yehova. Mulugu ehu Yehova anere wabarela athu aatene enamuroromela, ni enere okanna ‘murenddele.’ — Isa. 26:3
18 Ohudhera winaharela nnere woona dhovuhulela dhinawoga wodhela mulogo wa Yehova malabo ala okuthula. Ninga nnonihu dhovuhulela ndha dhinotonyihedha wi nnakalawo malabo okuthula. Ni nnere woona wi mwenihu Yesu kiristu anna oholela nlogo na Yehova.
JHIBO 61 Kamuselele olaleya!
a Peeno nnakalawo malabo ohagalasa! Omwene wa Mulugu ohutikiteriwa, ninga dhovuhulela dha mBibiliyani dhinawogiwa. Ohudhera wula nnere woona makalelo dhovuhulela dha mBibiliyani dhinalibihiwa nroromelo nehu ni makalelo dhinanikaviheriwa wihina nikale opwaseyene ni omuroromela Yehova ohiya mudhidhi yola nrihu baahi mbwenye ni malabo mamodha osogolo.
b Osugwe musolo 32 ddima 4 a livuru Ofwanye egumi yohagalasa ya malabo amatene!, ni osugwe vidiyu Omwene wa Mulugu ohubajha othonga yaka ya 1914 enafwanyeya musayitini jw.org.
c Wihina onone dhithu dhimodha wodhela yovuhulela ya Daniel omusugwe Sentinela a Junyu 15, 2012, epaddi. 14-19.
d Wihina onone muselu dhimodha wodhela dhopadduwa ndha woone musolo 21 wa livuru O Reino de Deus já Governa!