OHUDHERA 34
‘Kuselele weedda mwibaribarini’
‘Enna weeddave mwibaribarini.’ — 3 JOÃO 4.
JHIBO 111 Dhithu dhinanihagalasa
DHITHU NNAAHUDHERIHUa
1. Ekalele ddi yapama othapanyedha makalelo nihudherihu ‘ebaribari’?
WE ononne aavi ebaribari? Mohanganyedha we uhakula nikoho nna dila dhowinjhivadhene. Nno nikoho noobajha oniwiwe wamunonagawene ddibila. Teto sapama omunona makalelo ddibila amunoniye Yehova, ni sapama iyo vano owoga makalelo nihudherihu ebaribari. (Rom. 1:11) Othapanyedha muselu ola ononikavihera wubuwela makalelo ebaribari eriwa yathima mwigumini mwehu. Ohiya eyo, iyo nnothoma ‘ohuselela weeddagave mwibaribarini’, eyo enatapulela okalawo mowiwanana ni makalelo enamuhagalasa Yehova.— 3 João 4.
2. Ohudhera wula nnaasuze ddi?
2 Ohudhera wula, nnere woona mwahaya bwaddi nigadhiveliwa okala mwebaribarini. Vasogolova nnere woona makalelo nnonihihu wi nnodhivela okala mwebaribarini. Teto winere wenjhedhedha omutamalela wehu Yehova mwaha oliye onithanela mwibaribarini. (João 6:44) Ni enere olibiha efunelo yehu yowahudhiha athu amodha ebaribari.
MWAHAYA BWADDI NIGADHIVELIWAGA ‘EBARIBARI’
3. Enanthukulela iyo vano odhivela ebaribari ddi?
3 Iyo nihikanna dhithu dhowinjhiva dhinanithukulela odhiveliwa ebaribari. Mbwenye enanithukulela odhiveliwa ebaribari fudhivela wehu ninnihuna ni Yehova, Nikoma neebaribari. Wodhela Bibiliya iyo kanoona baahi wi oliye ddi mpaddusi akopolo dhatedhene, mbwenye iyo nnowona wi babi akopolo odhivela. Ni ononisamalela iyo aatene nthebwa vamodha ni odhivela. (1 Ped. 5:7) Teto nihinona wi Yehova ‘Mulugu athagaraga ni oohaguvela onyanyuwa, oojheha, anna odhivela ohunamala ni eebaribari.’ (Êxo. 34:6) Ohiya yeyove Yehova oono odhiveliwa opama. (Isa. 61:8) Oliye asugwaga goyi nnonihu, nuliyeya enonpiha mbani. Yehova onoojhehera mudhidhi owamariha makathamiho amatene. (Jer. 29:11) Iyo nnojhehera mudhidhi yoyo dhithudha dhinapadduwiwa. Si dhithu dhendha dhinanithukulela omudhivela vanlubale Yehova.
Ebaribari ya mBibliyani Eli ninga . . . Ankora
Ninga ankora onamuholela baruku, nroromelo ninnihuna wodhela ebaribari ya mbibliyani enonikavihera okala txithi naatorihiwaga. Ebaribari ya mbibliyani enonikavihera othapanya naakwihu wodhela ejhehero ninnihuna yosogolo (Osugwe ddima 4-7)
4-5. Mwahaya bwaddi murumiwi Pawulo adhe aladdanihege ejhehedhelo yehu ni ankora?
4 Dhithu dhimodha dhinanithukulela iyovano odhivela ebaribari ddi? Ebaribari enonivaha ejhehedhelo yosogolo, teto eyo enosaddula egumihu. Makalelo murumiwi Pawulo aladdanihiwe ejhehedhelo eyo, oliye onowoga egi: ‘Nihikanna ejhehedhelo ela ninga ankora enalibiha emuthu yehu, teto sebaribari ni sooliba.’ (Heb. 6:19) Ninga ankora anamulibiha baruku vamburonivaye, mudhidhi afwanyiwa nipevo ninlubale, ejhehedhelo yehu ninnihuna enakumela mBibiliyani enere onikavihera ovilela naafwanyiwaga makathamiho.
5 Ebaribari wihina Pawulo awoga ejhehedhelo enna makiristawu othikitheriwa enafuna odhowa odhulu. Mbwenye madhu ala, enovolowela ni makiristawu enna ejhehedhelo yokala ni mukalakala mparayizu mwilaboni yavati. (João 3:16) Ejhehedhelo ninnihuna yokalawo ni mukalakala mwilaboni yavati enonihagalasa mwigumini mwehu.
6-7. Ohudhera ebaribari wodhela osogolo wimukavihere aavi Ivonni?
6 Kasugwa yotajhiha ya murogola dhaala anithaniwa Ivonni. Oliye kaleliwe mweebaribari teto agali mwana oliye owoova okwa. Nlabo dhaala Ivonni wileri epaddi dhaala ahinaduwaliye yawoga yegi: “Labo nimodha kawindha wikalawo magwana.” Oliye owoga egi: “Miyo kagagona mwaha wa madhu ala, gubuwela osogolo. Miyo gowubuwela; egumi kahi yelave baahi, kito nkalelewu ddi? Ala makoho gawerimina. Mwaha miyo gagafuna okwa!”
7 Nuuvira mudhidhi, Ivonni agunnuwile oliye wanona anamoona a Yehova. Oliye onowoga egi: “Miyo obajha orumedha wihina nlabo nimodha ginere okala mwilaboni yavati mparayizu”. Ohudhera ebaribari emukavihere aavi murogola ola? Oliye onowogave egi: “Vano ginogona emahiyu yantero gihithabwaga gahubuwenle wodhela osogolo ni okwa.” Ni makalelo yayo, nnowanda woona wihina Ivonni onodhiveliwa ebaribari. Oliye onowadhivela mabasa oolaleya mwaha onothapanya naathu amodha wodhela ejhehedhelo yosogolo anniyena. — 1 Tim. 4:16.
Ebaribari ya mBibliyani Eli ninga . . . Dhorela
Omulabela Yehova dhiinovala ni okanna ejhehero yomulabelave malabwene mumweneni mwaaye eri ninga dhoorela. Sapama wilibihera wihina nerena ethu sithu nnawedhihu opara mmabasani a Yehova (Osugwe ddima 8-11)
8-9. (a) Mulobwana ole Yesu amusorihiliye vanladdanihoni erile ddi nufwanya dhoorela? (b) Ebaribari enna thima baani mwigumini mwawo?
8 Muthenga dhapama dha Omwene wa Mulugu dhinokosa epaddi dha ebaribari dha mBibiliyani. Va Mateus 13:44, Yesu ohuwoga egi: ‘oOmwene wodhulu onaladdanihiwa ni dhoorela dhinafwanyiwa dhigatibeliwe omundda, vano molobwana dhaala ofwanya ni otibela vamodhavene, nuuhagalala aniyena, oliye odhowa oguliha dhatedhene aniyena wihina agule muddayole.’ Sotikina onona wihina mulobwana ole kaveda dhorela, mbwenyi mulobwana ole nufwanya dhorela ndhe oliye aherana dhatedhene anadiye wihina akanne. Mwahaya bwaddi mulobwana ole adhe agulihege dhetedhene aniyena? Mwaha oliye ahinona wihina dhorela ndhe dhahithabwa okanna thima. Mwebaribarene oliye aherana dhatedhene awedhiye wihina akanne dhodhela ndhe.
9 Ki we onothabwa ovaha thima ebaribari? Nahanganyedhaga, nihinona wihina we onovaha thima ebaribari ya mBibiliyani ni makalelo mamodhave. Mwaha nihinona wihina kaavo ethu sithu enavaha elabo enaligana ni murenddele ninnihuna womulabela Yehova nuuhagalala ni okanna ejhehedhelo yokanna egumi yohimala osogoro. Kayiwo ethu sithu enaligana ni wandana winlubale ninnihuna ni Yehova. Mwaha winonivaha murenddele webaribari onona wihina ninna ‘ohagalasa murima waye.’ — Col. 1:10.
10-11. Mwahaya bwaddi Maico edhe aweregena masadduwo mwigumini mwaaye?
10 Addibila owinjhiva eherana dhatedhene enandiwa wihina ekalegewo ni makalelo enamuhagalasa Yehova. Addibila amodha ehifiyedha wahiya mabasa amwilaboni yavuwiha. Amodha ehiya oveda dhoorela. Addibila amodha ehisaddula egumiwa wewa nuuhudhera ebaribari wodhela Yehova. Siyeyo empadduwele ddibila Maico. Oliye aleliwe murala makolo aye yahali makiristawu, agali muzombwe aasunza baahi masoko. Oliye onowoga egi: “Gafunimi yaali okanna egumi yapama. Miyo giwoona ninga kavo ande ogigonjhiha.” Mbwenye nubajha ohudhera ebaribari, oliye ohudhera monelo wa Yehova wodhela opanga. (Sal. 11:5) Maico onowoga wodhela anamatela emuhudhere Bibiliya ni oliye, onowoga egi: “Aliwa kinagilobege wihina gihiye wahudhera masoko, mbwenye aliwa yagihudhiha ebaribari ya mBibiliyani.”
11 Mudhidhi Maico ahudheriye wodhela Yehova, odhivela anniyena ni oliye obajha wunnuwa. Ethu yamuddiginye murima Maico dhaali thagaraga anna Yehova ni adharaaye. Oliye onowoga egi: “Gahinona wi wahiya wahudhera masoko yaali ethu yorusa yerana mwigumini mwaga,” oliye onowogave egi: “Miyo goofuna omuhagalasa Yehova ni gahikanna ebaribari wi gohowela werana ethu sithu wihina gimulabele.” Maico ahinona wihina ebaribari ya mBibiliyani sa thima, bumwahaya oliye ahawerana masadduwo mwigumini mwaaye. — Tia. 1:25.
Ebaribari ya mBibliyani Eli ninga . . . Panti
Panti anaahidda ni kopolo ononikavihera ofwanya etho eri vayihini. Ni makalelo mamodhave madhu a Mulugu enonikavihera woona dila yapama mwilaboni muna mudhalile yiihive ya Saddana (Osugwe ddima 12-13)
12-13. Ebaribari emukavihere aavi Mayli?
12 Bibiliya onoladdaniha ebaribari ni lampada nnahidda vayiihini. Yothajhihela enowoniha makalelo ebaribari eliwa yathima. (Sal. 119:105; Efé. 5:8) Mayli, anakala elabo ya Azeribayijawu, onotamalela wodhela Bibiliya omonela egumi yaye. Oliye unnuwile va murala makolwaye enna dhigereja dhohiyana iyana, ababe yaali Musulumano teto amaye yaali Ajudeya. Oliye onowoga egi: “Miyo ginorumedha wi Mulugu ohukalawo, mbwenye gowikoha gegi, Mwahaya bwaddi Mulugu adha apaddusege athu, ni mwahaya bwaddi athu egonihiwaga goyi ni evokeriwaga othukuthani wa mutho? Athu atene yarumedha wi Mulugu dinantabusa athuya, bumwahaya gowikoha, mwebaribarene Mulugu dinantotela makathamiho matene, obe Mulugu onodhiveliwa awonaga athu yonaga goyi?”
13 Mayli obajha oveda dhowakula dha makoho aye. Nuuvira mudhidhi, oliye ohudhera ebaribari ni obaddiziwa ninga namoona a Yehova. Oliye onowoga egi: “Ebaribari ya mBibiliyani ehisaddula munelo waga wodhela egumi, teto ehigikavihera okanna murenddele.” Ninga Mayli iyo aatene nnomuthithimiha Yehova, ‘ole aninthane oyiihini wuvolosihani mburo waye wowaara ni wotikiniha.’ — 1 Ped. 2:9.
14. Nnenjhedhedhe addi odhivela wehu ninnihuna ni ebaribari?
14 Ndha dhotajhiha dhinoniha wihina ebaribari ehikanna thima. Teto podi wera we onowubuwela dhimodhadha. Ononamo aavi opendda muselu dhimodha va yohudhera wawo wa vayeka, dhinukavihere odhiveliwa ebaribari? Naathabwaga odhivela ebaribari nnoparihedha mabasa mwigumini mwehu.
NIMAKALELO BAANI NNONIHIHU WIHNA NNODHIVELA EBARIBARI
15. Ni makalelo baani nnandihu woniha wihina nnodhivela ebaribari?
15 Iyo nnowoniha wihina nnodhiveliwa ebaribari naamuhudheraga Bibiliya malabo amatene ni nahudheraga malivuru anikuru nehu. Kinapwatha yaka ngasi nilihu mwibaribarini, nnofuna ohudhera dhithu dhimodha wodhela eBaribari ya mbibiliyani. Epaddi yobajha na livuru nna, nnihina: “Ebaribari, enaligana ninga folori enafwanyeya vaari vampidda. Wegi ofwanye folori yela, onohowela wilibihera vanlubale. . . . Mbwenye muthuya kanahagalala ni folori modha baahi. . . . Onohowela ovedagave dhimodha.” Kananganyedha wihina negi nihudhere ethu nnohowela wilibihera vanlubale, mbwenye kannilibihera ebewene.
16. Onalabihedha Makalelo baani wafunaga omuhudhera Bibiliya? (Provérbios 2:4-6)
16 Kahiyo athu aatene enadhiveliwa wileri ni ohudhera. Yehova ononikongomedha, egi: ‘Wadidela osayela’ ni ‘wadidela oveda’ onere ofwanya ebaribari. (Omwileri Provérbios 2:4-6.) Nnopurelamo vanlubale, nilibiheraga omwileri Bibiliya. Ddibila dhaala anithaniwa Corey onowoga egi: “geragana ohudhera waga wa Bibiliya, ginoopwasedha versu modha baahi.” Onowogave egi: “ginowawileri manota matene ginaafwanyimi ni ginootola pamadhe dholebeladha. . . . Ni makalelo yala ginopurelamo vanlubale ohudhera waga!” Kinapwatha makalelo nnalabiherihu naafunaga werena ohudhera wehu wa Bibiliya, mbwenye nnowoniha wihina onovaha thima ebaribari nnahudherihu mBibiliyani, Nasayelaga mudhidhi wihina nimuhudhere Bibiliya ni nilibiheraga werana ndo. — Sal. 1:1-3.
17. Okalawo mowiwanana ni ebaribari enatapulela ddi? (Tiago 1:25)
17 Ohudhera ebaribari ethu ya thima, teto nnohowela wilibihera, nnohowela weddaga mowiwanana ni ebaribari obe nnohowela oparihedha mabasa ebaribari mwigumini mwehu. Nerana ndo nnere okanna ohagalala mwigumini mwehu. (Omwileri Tiago 1:25.) Ki nnaanone addi wi ninna oparihedha mabasa ebaribari mwigumini mwehu? Ddibila dhaala onowoga egi nnohowela wipendda negi nnone epaddi baani nnahowelihu osaddula mwigumini mwehu obe wogolela. Murumiwi Pawulo ohuwoga egi: ‘Mwamakalelo aatene, narive nunuwelagavo ni makalelo ohiyana iyana, nididele wedda dila yela.’— Fil. 3:16.
18. Mwahaya bwaddi nigilibiheraga ‘weedda mwibaribarini’?
18 Onowabihaga wawubuwela mareeliho onawakeliwe wodhela ‘ohudhera ebaribari’! Egumi yehu vano sapama ohiya yeyove vano nnohagalasa murima wa Yehova teto nnowahagalasa addibilihu. (Pro. 27:11; 3 João 4) Mohanganyedha nihikanna dhithu dhinanithukulela odhivela ebaribari ni weeddagave mwibaribarini?
JHIBO 144 Wawubuwelege mareeliho
a Webedha wehu ni mweddelo wa mwigumini mwehu, onotonyihedha ebaribari nnarumedhihu. Naarive akala nili anamoona a Yehova mudhidhi vang’onove obe akala nimunone Yehova kale, sapama iyo aatene wubuwelela ethu enithukulele iyovano odhiveliwa ebaribari. Eyo enere onikavihera iyo vano othabwagave odhiveliwa Yehova.