We podi okalawo ni mukalakala

1. Enapadduwa ddi napendda wodhela mpaganyo Yehova anivahiliye wodhela egumi yohimala?

YEHOVA onopaganya wihina ale enamwiwelela enere okanna ‘egumi yohimala.’ (Rom. 6:23) Kabiha wubuwela: Yehova ononidhivela vanlubale ni anafuna wihina nikalegewo ni mukalakala. Napendda ejhehedhelo ananivaha Yehova, mohanganyedha odhivela ninnihuna nuliye winoliba.

2. Nimakalelo baani ejhehedho yowakela egumi yohimala enanikaviheriwa?

² Ejhehero Yehova ananivahiye enonikavihera wawanana makathamiho a mwigumini. Podive amwiddani ehu enithuse ni okwa, iyo kannaaselele omulabela Yehova. Mwahaya bwaddi? Mwaha nihinona wihina nakwa nigaali oororomeleya wa Yehova, oliye anere onivenyiha muukwani ni kanidha nihogolowela okwa. (João 5:28, 29; 1Cor. 15:55-58; Heb. 2:15) Mbwenye enanivaha ebaribari ddi wihina nnere okalawo ni mukalakala? Nnere woona.

YEHOVA DA MUKALAKALA

3. Mwahaya bwaddi nikanna ebaribari wihina Yehova anere onikavihera okalawo ni mukalakala? (Salmos 102:12, 24, 27)

³ Nihinona wihina Yehova podi onikavihera okalawo ni mukalakala mwaha oliye Ntxela na egumi ni da mukalakala. (Sal. 36:9) Kasugwa dholebela dha mBibiliyani dhinoniha wihina Yehova kanna omambelelo newene omagomihedho. Salmos 90:2 onowoga wihina oliye Mulugu ‘ahinna omambelelo newene omakuthulo.’ Salmos 102 ni versu dhimodha dhinowoniha wi Mulugu da mukalakala. (Omwileri Salmos 102:12, 24, 27.) Namavuhulela Abakuki ohuleba wodhela Yehova egi: ‘Yehova, nyu kamuli ole aliwo okuma kale? Mulugwaga, Oweela, nyu kamunadha mukwaaga.’ — Hab. 1:12.

4. Nahonelagamo pama wihina Yehova kanna omabajho newene omagomihedho muladdu? Owogemo.

⁴ Enowurusa orumedha mubuwelo ola wowihina Yehova ‘kanna omabajho newene omagomihedho’? (Isa. 40:28) Eyo podi opadduwa. Eliyu ohuwoga wodhela Yehova egi: ‘Enorusa wonelamo numero na yaka dhenyu.’ (Jó 36:26) Dhithu dhowinjhiva dhinonirusa wonelamo mbwenye kinatapulela wihina kahiyo dhebaribari. Motajhiha, owinjhiva wa iyo enoorusa wonelamo makalelo enerjiya enalabiiwa, mbwenye eyo kinatapulela wihina kayiwo. Nimakalelo mamodhave, Yehova da mukalakala. Eyo ebaribari naarive nahonelagamo. (Rom. 11:33-36) Yehova ahinathi opaddusa nduwa, thendderi ni dhithu dhimodha oliye ahikalawo. Oliye ohuniroromeliha wihina duliye ‘apadduse elabo yavati ni yodhulu ni kopolo dhaye.’ (Jer. 51:15; At. 17:24) Ethu emodha enanivaha ebaribari wihina nnere okalawo ni mukalakala ddi?

NIPADDUSIWE WIHINA NIKALEGEWO NI MUKALAKALA

5. Adawu ni Eva yahamwiwelele Yehova yaakele ddi?

⁵ Nerege wihina Yehova apaddusile dhithu dhatedhene wihina dhikalegewo ni mukalakala? Naari! Athu baahi dipaddusiwe wihina ekalegewo ni mukalakala. Podive dhigari ndo, Yehova ahimwaddela Adawu egi: ‘Muthanko onanoniha yapama ni yabure, onaajhe, mwaha wi nlabo onajhiwe, mwebaribarene onere okwa.’ (Gén. 2:17) Adawu ni Eva yahamwiwelele Yehova kiyakwe. Osogolove Yehova eere weenya aliwa ojha ‘muthanko ole wegumi.’ Nimakalelo yala Yehova eere waroromeliha wihina yere ‘okalawo ni mukalakala.’b — Gén. 3:22.

6-7. a) Enooniha ddi wihina athu kipaddusiwe wihina ekwe? b) Dhithu baani onafuniwe werana wafiya elabo exa? (Osugwe fotu.)

⁶ Peeno athu enakalawo yaka 70 obe 80, mbwenye masiyentista ehonelamo wihina ogoogo wa muthu podi okoya dhithu muwari mwa yakadhene. Yaka ya 2010, artigu dhaala ohuwoga wihina athu amodha ehonelamo wi ogoogo podi okoya jigabayiti dhowakwana 2.5 milyonji, eyo enatapulela 3 milyonji a mawora nigaravarigi vidiyu. Mudhidhi nnaamalihu nigaravarigi podi okwaranya yaka 300, mbwenye enowandeya ogoogo okoya dhithu dhowinjhiva okwaranya dhithu ndho. Makalelo wegeredhiwe ogoogo winowoniha wihina Yehova anipaddusile wihina nikalegewo yaka okwaranya 70 obe 80. — Sal. 90:10.

⁷ Teto Yehova anipaddusile ni efunelo yokalawo ni mukalakala. Bibiliya onowoga wihina Yehova ‘ohuhela efunelo mmurimani mwaathu yokalawo ni mukalakala.’ (Ecl. 3:11) Bumwahaya nigoona okwa ninga mwiddani. (1 Cor. 15:26) Motajhiha, muthu akala muredda anokarati ajhehaga okwa? Naari. Oliye anoomusayela mediku wihina anvahe murombwe wi avulumuwe. Mwebaribarene iyo nnowerana dhatedhene wihina nihikwe. Motajhiha, muthu nnamudhivelihu akwa, podi akala muzombwe obe mwanakalaba, iyo nnowukuwa. (João 11:32, 33) Mwebaribarene Baabi ehu oodhivela kanivahile efunelo yokalawo ni mukalakala wula afunaga wihina athu ekalegewo mudhidhi vang’ono. Mbwenye iyo nikanna dhithu dhinanroromeliha wihina podi okalawo ni mukalakala. Kabeni noone dhithu Yehova eriliyena kale ni aneriyena ovanene dhinoniha wihina oliye kasadduwe.

EFUNELO YA YEHOVA KISADDUWE

8. Yolebela ya Isaías 55:11, enanihudhiha ddi wodhela efunelo ya Yehova?

⁸ Adawu ni Eva otheega, bumwahaya iyo aatene nnokwa, podive dhigaali ndo Yehova kasaddunle efunelo yaye. (Omwileri Isaías 55:11.) Oliye anafuna wihina athu oororomeleya ekalegewo ni mukalakala. Eyo enowoneya napendda ele Yehova awogiliye ni eriliyena wihina aakwanelihe efunelo yaye.

9. Yehova apaganyile ddi? (Daniel 12:2, 13)

⁹ Yehova ohupaganya wihina anere wavenyiha ale ekwile ni wavaha egumi yohimala. (At. 24:15; Tit. 1:1, 2) Jo, mudhaari oororomeleya a Yehova ahikanna ebaribari wihina Yehova anokanna munukwela waale ekwile ni anofuna wavenyiha muukwani. (Jó 14:14, 15) Namavuhulela Daniyeli ahinona wihina athu yere ovenyihiwa wihina ekalegewo ni mukalakala. (Sal. 37:29; omwileri Daniel 12:2, 13.) Mudhidhi wa Yesu maJudewu yahinona wihina adhaari a Yehova yere wakela ‘egumi yohimala.’ (Luc. 10:25; 18:18) Yesu ohuwoga wodhela ejhehedhelo ela dila dhowinjhivadhene, teto mwinnyene Yesu ohuvenyihiwa muukwani ni Yehova. — Mat. 19:29; 22:31, 32; Luc. 18:30; João 11:25.

10. Ovenyihiwa waathu wereyile kale winoniha ddi? (Osugwe fotu.)

¹⁰ Yehova ntxela na egumi bumwahaya oliye anere wavenyiha athu aatene ekwile. Yehova ahinvaha owedha namavuhulela Eliyaji wihina anvenyihe mwaana a maamukwele ooSarefa. (1 Reis 17:21-23) Nuuvira mudhidhi, Yehova omukavihera namavuhulela Elizewu onvenyiha muhiyana dhaala muSunamita. (2 Reis 4:18-20, 34-37) Dhopadduwa ndha ni dhimodha dhinowoniha wihina Yehova ohukanna kopolo ni owedha wowavenyiha ale ekwile. Yesu agaali mwilaboni yavati, ahoniha wihina Yehova ahinvaha owedha wowavenyiha athu muukwani. (João 11:23-25, 43, 44) Vano Yesu ali odhulu ni ohukanna ‘owedha watewene . . . mwilaboni yavati ni yodhulu.’ Bumwahaya oliye podi wakwanihedha mpaganyo onafwanyeya mBibiliyani onihina: Aatene eli ‘mmahame enubuweliwa ni Yehova’ enere ovenyihiwa wihina ekalegewo ni mukalakala. — Mat. 28:18; João 5:25-29.

11. Okwa wa Yesu winanikavihera aavi okalawo ni mukalakala?

¹¹ Mwahaya bwaddi Yehova adhe arumedhege wihina mwanaye akwe vantxikwani na goyi? Mwinnyene Yesu ohuwoga egi: ‘Mwaha Mulugu ohudhivela vanlubale elabo, omuleva mwanaye mmodha, wi athu aatene enaamuroromele yahitolosiwe, mbwenye ekanne egumi yohimala.’ (João 3:16) Mukutho wa Yesu ohunivaha ofuru woleveleliwa dhoothega dhehu ni waakela egumi yohimala. (Mat. 20:28) Murumiwi Pawulo ohutapulela epaddi ela yathima ya efunelo ya Mulugu nimakalelo ala: ‘Woona wi, okwa odhiile ni mulobwana mmodha, emodhave, ovenyihiwa waanookwa odhiile ni mulobwana mmodha. Woona wi, athu aatene enookwa mwaha wa Adawu, emodhave, athu aatene enere waakela egumi mwaha wa Kiristu.’ — 1 Cor. 15:21, 22.

12. Nimakalelo baani Yehova analabihedhiye Omwene wihina akwanihedhe efunelo yaye?

¹² Yesu ohahudhiha anamahara aye olobela elobaga wihina Omwene wa Mulugu odhe ni wihina efunelo ya Mulugu yereye elabo yavati. (Mat. 6:9, 10) Epaddi modha ya efunelo ya Mulugu sowihina athu ekalegewo ni mukalakala. Wihina Yehova ande wakwanihedha efunelo yaye, oliye ohumuthoma Mwanaye wihina akale Mwene muwari mwa yaka txikwi. Teto Yehova anna watugumana athu owakwana 144 000 mwilaboni yaatene, aliwa vamodha ni Yesu eneere wakwanihedha efunelo ya Mulugu. — Apo. 5:9, 10.

13. Ethu baani Yehova aneriye wihina aakwanelihe efunelo yaye, ki iyo nnere ddi wihina nikavihere?

¹³ Yehova anna otugumana muthithi ni muthithi waathu ni anna wahudhiha athu yaala wihina ekalege Mumweneni mwaaye. (Apo. 7:9, 10; Tia. 2:8) Peeno athu enakala mwilaboni muli koddo ni wiiddana, mbwenye ale enakosa epaddi ya muthithi waathu enowilibihedha wihina yande ogonjhiha ekalelo yowiddana enakumelela mmurimani. Enakala ninga aliwa enna osaddula futhi dhewa wihina ekale masupadda owagwaddana makupu. (Miq. 4:3) Ohiya wivolosiha mukoddoni mwinatota okwa ni goyi, aliwa enowilibihedha wihina yahudhihe athu wodhela Yehova ni efunelo yaye, teto nimakalelo yaala enowakavihera athu ofwanya ‘egumi yeebaribari.’ (1Tim. 6:19) Wodhela okavihera Omwene wa Mulugu, aliwa podi oharahariwa ni amudhi ewa, malabo mamodha ofiyedha ohukanna korowa, mbwenye Yehova onowavaha dhatedhene enahoweliwa. (Mat. 6:25, 30-33; Luc. 18:29, 30) Dhatedhene ndha dhinoniha wihina Omwene wa Mulugu bwebaribari ni winerege odhowave wakwanihedhaga efunelo ya Yehova.

OSOGOLO WOHAGALASA

14-15. Mpaganyo wa Yehova womariha okwa winakwanele ni makalelo baani?

¹⁴ Yesu vano mwene odhulu ni ohiwegeredha wihina akwanihedhe dhatedhene Yehova apaganyiliye. (2Cor. 1:20) Okuma yaka ya 1914, Yesu anna wagonjhiha amwiddani aye. (Sal. 110:1, 2) Oliye ni a 144 000, enere watolosa athu aatene abure. — Apo. 6:2.

¹⁵ Muwari mwa Onamathonga wa Yaka Txikwi, Yesu anere wavenyiha anookwa ni anere wakavihera athu aatene enamwiwelela Mulugu wanda okala athu oologomana. Wehiwa wogomihedha wamala, athu yaale Yehova anawoniye ninga apama, enere ‘ovahiwa elabo yavati wi ekalegemo ni mukalakala.’ (Sal. 37:10, 11, 29) Omagomihedhowa, ‘mwiddani oogomihedha’ wili okwa ‘kanadha akalawo.’ —1Cor. 15:26.

16. Ethu enanthukulele omulabela Yehova ekale ddi?

¹⁶ Ninga nonilihu muwari mwa ohudhera wula ejhehedhelo ninnihuna yokalawo ni mukalakala sooliba mowiwanana ni Bibiliya. Teto ejhehedhelo ela podi onikavihera okala oororomeleya wa Yehova malabo ala ookuthula nnakalihu. Wihina nimuhagalase Yehova, nnohowela omulabela oliye ni murima wamutene, ohiya mwaha obebedha egumi yohimala. Ethu enanthukulele okala oororomeleya wa Yehova ni Yesu, ekale odhivela wehu naaliwa. (2 Cor. 5:14, 15) Odhivela wula, winere onthukulela otajhiha dhikalelo dha Yehova vamodha ni Yesu ni werana ndhe nnandihu mmabasani oolaleya. (Rom. 10:13-15) Nahudhera ohiwubuwela yekihu ni okala oovaha, nnere wandana ni Yehova ni mukalakala. — Heb. 13:16.

17. Yothoma baani kadda muthu wa iyo anahoweliye werana? (Mateus 7:13, 14)

¹⁷ Nerege iyo nili vamodha naale enakalewo ni mukalakala? Yehova ononivaha ofuru yola. Vano yothoma sa kadda muthu akala anerege odhowave eeddaga mudila yegumi. (Omwileri Mateus 7:13, 14.) Mbwenye egumi yamukalakala enaakale aavi? Ohudhera winaharela nnere woona yowakulaya.