Wakaviherege amodha mudhidhi worusa

1. Malabo mamodha, nimakalelo baani Yehova anakaviheriye adharaaye?

WE WAHINONA wi Yehova egi aakule nlobelo navati va murima na ddibila di ddibila Yehova podi wulabihedha we? Kanapwatha akala we oli namaholela mulogo, mudhaari okavihera, piyonero, namalaleya, akala oli muzombwe, mwanakalaba, ddibila obe murogola. Muthu anamudhivela Yehova amuloba nikavihero, Mulugu ehu malabo owinjhivene anaalabihedha anamaholela mulogo ni adhaari amodha ororomeleya wihina ekale ‘ntxela nootodola.’ (Col. 4:11) Mohanganyedha gari enlubale omulabela Yehova naaddibilihu nimakalelo yala! Iyo podi wakavihera ni walibiha addibilihu wakumelela oredda worulumusa, ngovi obe oharahariwa.

WAKAVIHEREGE AMODHA WAKUMELELA OREDDA MORULUMUSA

2. Mwahaya bwaddi ekala yorusa wakavihera athu amodha wakumelela oredda worulumusa?

² Podi okala yorusa wakavihera athu amodha vaari va oredda wa mutipa. Motajhiha iyo nnofuna wawaredhela akwihu, mbwenye kannonihe okala owibarela nawaredhelaga akwihu muwari mwa mutipa. Podi wera nnofuna withana emudhi enafwanyiwa makathamiho wodhela ohikanna korowa wihina edhe ejhe ni emudhihu obe nnofuna wakavihera athu amodha. Mbwenye eyo podi ohukala yokweya akala muthu mmodha aveemudhini onofwanyiwa makathamiho. Naarive dhigaali ndo iyo nnofuna wakavihera amudhihu teto Yehova onohagalala vanlubale anonaga neragana ndhe nnandihu wihina nakavihere. (Pro. 3:27; 19:17) Vano nnere ddi wihina nakavihere?

3. Ethu baani nnahudherihu ni anamaholela mulogo wa Desi? (Jeremias 23:4)

³ Ethu baani anamaholela mulogo enahoweliwa wera? Akala we oli namaholela mulogo, wilibihedhe wihina wanone pamadhene addibila ammulogoni. (Omwileri Jeremias 23:4.) Desib murogola awogiwe ohudhera wivirile ohuwoga egi: “Anamaholela anikuru naaga nammalaleyelo yookumesa malabo owinjhiva nimiyo mmalaleyelo vamodha naaddibila amodha ni yojha mudhidhi wowinjhiva nihiyo malabo mamodha.” Nimakalelo yala yali yokweya anamaholela mulogo omukavihera Desi muwari mwa mutipa wa koronaviru ni mudhidhi ayeleliye amudhaaye mukwani mwaha wa koronaviru.

4. Anamaholela mulogo yandile aavi omukavihera Desi, ki anamaholela mulogo enahudhera ddi ni yopadduwa ela?

⁴ Desi owoga egi, “Woona wihina gahandana nanamaholela mulogo yali yokweya wawaddela ethu yagithuwathuwiha mwigumini mwaga.” Nnahudhera ddi? Akala we oli namaholela mulogo, waasamalele ni wakavihere addibila, yahinathi okumelela makathamiho orusa. Wandane naaliwa. Wakumelela oredda worulumusa ni wahanda wawaredhela addibila ayo, waaje makalelo othapanya naaliwa ni makalelo mamodha. Desi anowogave egi: “Malabo mamodha anamaholela mulogo yogiligarela ni yoginviyarela mensaje.” “Dholebela yagonihiliwa dhodahinya murima waga, naarive nganonne dholebeladha.”

5. Anamaholela mulogo enande addi wonelamo dhithu enahowela addibila, ki enakavihere nimakalelo baani?

⁵ Makalelo mamodha owonelamo dhithu addibila enahoweliwa, fuudhela wawerana makoho ohalupile manddile ewa. (Pro. 20:5) Ninga motajhiha, aliwa ehikanna dhoojha, murombwe obe dhithu dhimodha? Aliwa ehanle nenaa wihina eyelele mabasiwa obe nyumbadhiwa? Enohowela nikavihero nanamathonga? Desi ahakela nikavihero naaddibila. Mbwenye mwebaribarene yamukavihere yali nikavihero akenliye nanamaholela mulogo epaddi yomuzimuni. Oliye owoga egi: “Anamaholela mulogo yolobelesa ni miyo, kaginubuwela dhithu aliwa yawogiliwa, mbwenye ginowubuwela makalelo gaalimi, yakala ninga Yehova awoga ni miyo egi, ‘we kuli weka.’”— Isa. 41:10, 13.

6. Nimakalelo baani addibila ammulogoni enakaviheriwa athu amodha? (Osugwe fotu.)

⁶ Ki athu amodha enere ddi? Iyo nnajheha wi anamaholela mulogo yaasamalele addibila ammulogoni. Mbwenye Yehova anajheha wi iyo aatene nalibihege amodha. (Gál. 6:10) Naarive nigerilena ethu eng’ono wihina nimukaviherena muredda, eyo podi omulibiha vanlubale. Ahima podi oleba dezenyu obe omwinviyarela karta wihina emulibihe ddibila. Ddibila ahoowelaga nikavihero muzombwe podi wivahedha wihina amukavihere ogula dhithu omerkado obe werana dhithu dhimodha. Amodha podi wegeredha dhoojha wihina yanvahe muredda vadevaye. Mbwenye nakala vaari va mutipa obe makathamiho iyo aatene addibila vamodha naarogola enohowela olibihiwa. Podi wera nnokala mudhidhi vang’ono mmutugumanoni wihina nthapanye naaddibila, naarive egaali thoo-thoo obe nitelefoni. Nanamaholela mulogoya enohowela olibihiwa, addibila amodha enowawinviyarela makarta wihina yatamalele mabasa yapariliwa vaari va mutipa, ‘sapama navenyihanaga ni nalibihanaga mmodha ni mukwaye’! — 1 Tes. 5:11.

WAKAVIHEREGE AMODHA YAKUMELELA NGOVI

7. Nimakalelo baani ngovi enavoloweliwa athu amodha?

⁷ Ngovi podi osaddula egumi yamuthu mudhidhi mung’onove baahi, athu amodha podi oyelela dhoorela dhewa, nyumbiwa obe muthu enamudhiveliwa. Yowukulaya sowihina makathamiho ninga ayo podi wapadduwela addibilihu. Kivano nnere ddi wihina nakavihere?

8. Nimakalelo baani anamaholela mulogo ni ababi eniyegeredhiwa yahinathi okumelela ngovi?

⁸ Ethu baani anamaholela mulogo enahoweliwa werana? Anamaholela mulogo, mwakavihere addibila wiwegeredha yahinathi okumelela ngovi. Mwawaddele addibila aatene ammulogoni ethu baani enahoweliwa werana wi ekale obareleya ni yandege othapanya ninyu. Margaret awogiwe ohudhera wivirile ohuwoga egi: “Nutugumana mulogo murudda nnakalihu, anamaholela mulogo owoga wi yere opadduwa ngovi wodhela opahiwa wa kokola. Aliwa onaddela wihina anamathonga yera nvenyemo mmavaade mweenyu obe dhithudha dhathabwa orusa enohoweleya nvenyemo mowaguva.” Dhoholela ndha dhakumile mudhidhi wofwanelela, mwaha nuuvira sumana tanu okumelela mootho wowopiha. Mweraga ohudhera weemudhi, nyo podi ohudhera ethu baani kaddamuthu wa nyu anahoweliye werana yakumelela ngovi si ngovi. We vamodha ni anawo mwiwegeredha enere okala yokweya okalave oopwaseya yakumelela ngovi.

9. Nimakalelo baani anamaholela mulogo enandiwa wiwegeredha yahinathi okumelela ngovi ni yavira?

⁹ Akala we oli namasogolela nikuru, okanne manumero aaddibila anikuru nawo, kujhehe wihina epadduwe ngovi wihina werena eyo. Vano yakumelela ngovi, waligarele anamalaleya aatene wihina onone ethu baani enahoweliwa, mohilegela wawaddele anamaholela mulogo dhithu dhatedhene addibila enahoweliwa. Vano aliwa enere othapanya ni nameeddela mulogo, mabasa ala owiwanana enere okavihera vanlubale. Ohidda wule wa mootho nuuvira, nameeddela mulogo a Margaret aali mento muwari mwa mawora 36, oliye aali oopinyaminyeyene aaparaga mabasa anamaholela mulogo wula aliwa yaligarelaga addibila ni yasamalelaga addibila amodha owakwana 450 yayelele nyumbadhiwa. (2 Cor. 11:27) Nimakalelo yala ale yahowela yahikanna nyumba wihina ekalemo.

10. Mwahaya bwaddi wasamalela addibila ethu yathima waanamaholela mulogo? (João 21:15)

¹⁰ ovaha nikavihero epaddi yomuzimuni ni epaddi yomwilini, mabasa anamaholela mulogo. (1 Ped. 5:2) Yakumelela ngovi ethu yobajha anamaholela mulogo enahoweliwa wera, fuunona akala addibila aatene eli obareleyene, akala ehikanna yojha, dhowara ni vokala. Naarive egerilena dhendho, osogolove addibila enere ohowela nikavihero epaddi yomwilini ni yomuzimuni. (Omwileri João 21:15.) Harold ddibila dhaala anakavihera Komisawu Yofiliyale agumane naaddibila vamodha naarogola yaafwanyiwe ngovi ohuwoga egi, “onoovira mudhidhi wowinjhivene wihina addibila elemele,” vang’ono vang’ono addibila enere olemela. “Mbwenye okanna munukwela wa muthu omuyeleliwe mukwani, oyelela dhoorela vangovini ni wubuwela wihina gahanle nenaa nuukwa, ethu yahinadduwaleya. Mubuwelo ninga yola podi onthukulela okala owukuwene, wukuuwa kinatapulela wi kunna nroromelo mbwenye ekalelo nipaddusiwihuna.”

11. Nikavihero baani emudhi enahoweliwa yafwanyiwa ngovi?

¹¹ Anamaholela mulogo muhare yolaga enihina ‘munle naale enunla’ ni mwawubusedhe addibila efwanyiwe makathamiho wi Yehova onowadhivela teto naaddibilaya enowadhivela. (Rom. 12:15) Enohoweleya wakavihera amudhi efwanyiwe ngovi wihina edhowegeve edidelaga werana dhithu dhomuzimuni ninga olobela, ohudhera, odhowa omutugumanoni ni olaleya. Ohiya eyo mwakongomedhe ababi watodola aniwa, teto ababi mwakavihere aninyu odidela osugwa dhithu dhahinarimela vang’oni. Mwawubusedhe aninyu wihina Yehova anere okala mukwiwa ni kadha aasukumaga, mwawaddele wihina aliwa enere wakela nikavihero naaddibila vamodha naarogola wapela elabo yatene. — 1 Ped. 2:17.

12. Ethu baani amodha enahoweliwa okavihera yapadduwa ngovi? (Osugwe fotu.)

¹² Ethu baani amodha enahoweliwa wera? Yapadduwa ngovi waddamela murudda onakaliwe, wakohe anamaholela mulogo makalelo okavihera. Podi wera onohowela wawakela vadevawo ale ehiye nyumbadhiwa obe ale yivahedhile wihina yapare mabasa omaga, teto we podi wavaha yojha ni dhithu dhimodha anamalaleya enahoweliwa. Ki yapadduwa ngovi wolapela ni murudda onakaliwe wihina wakavihere. Onere aavi? We podi walobelela ale efwanyiwe ngovi. (2 Cor. 1:8-11) We podi okavihera wodhela wivelela, wodhela ovelela yovaha yawo wihina epariwena mabasa omwene. (2 Cor. 8:2-5) Wakanna makalelo odhowa okavihera murudda wipadduwile ngovi, wakohe anamaholela mulogo onafuniwe wera, akala were withaneliwawo podi wera onere wakela dhoholela wihina onone makalelo apama okavihera.

MWAKAVIHERE ADDIBILA YAHARAHARIWAGA

13. Makathamiho baani enafwanyiwa addibila dhilabo mabasa ehu enakoddihiwiwa?

¹³ Elabo mabasa ehu enakoddihiwiwa addibilihu podi warusaga werana dhithu dhowinjhiva. Ohiya oharahariwave aliwa podi ofwanyiwaga makathamiho ninga ohikanna korowa, ofwanyiwa oredda ni wodhela omuyelela muthu yamudhiveliwa mukwani. Teto mwaha oharahariwa anamaholela mulogo podi wera enowarusa wawaredhela addibila ni podi okala ethu yorusa waligarela wihina yaalibihe. Siyeyo empadduwele Andrei awogiwe ohudhera wivirile. Murogola dhaala a nikuru naaye ahifwanyiwa makathamiho manlubale mwaha ohukanna korowa. Ethu yasimwelihe sowihina oliye ahimwera asidenti ni karo, ohowela ovira dhispitale dhowinjhiva. Mwaha wa yeyo kaanda olaba, naarive egaali vaari va mutipa addibila yaherana dhatedhene yandiwa wihina emukavihere, teto Yehova ahoona ndhe yerilena addibila.

14. Anamaholela mulogo enande ovaha yotajhiha yapama wodhela omuroromela Yehova nimakalelo baani?

¹⁴ Anamaholela mulogo enere ddi? Andrei ahilobela ni werana dhatedhene andiye. Yehova aakunle nlobelo na Andrei nimakalelo baani? Oliye walabihedha addibila oohiyana-iyana a mmulogoni mwaaye yanna makalelo oomukavihera murogola ole. Amodha yamuthukulela ospitale wihina erena konsulta. Teto, amodha yamukavihera ni korowa. Yehova ahakavihera addibila ala wihina yerena yandiwa, ni oreeliha wiwanana ni oliba murima yanniwana. (Heb. 13:16) Anamaholela mulogo akala murudda onakaliwe mabasa oolaleya enookoddihiwa, ogawe mutholo dhawo. (Jer. 36:5, 6) Yathimaya, mmuroromele Yehova. Oliye anere wukaviherani wasamalela addibila naarogola.

15. Nnande addi woniha wiwanana mabasa ehu yakoddihiwaga?

¹⁵ Amodha enere ddi? Mudhidhi nnaharahariwigihu podi wera nnere ohowela otugumana makuru mang’ono mang’ono. Bumwahaya, sapama okanna murenddele naaddibila. Obe koddo yehu kahi naaddibila mbwenye ni Saddana. Kujhehe woogowa waaddibila, wakanna muladdu ni ddibila muthapanye mowaguva. (Pro. 19:11; Efé. 4:26) Waaje makalelo owakavihera athu amodha. (Tito 3:14) Nikavihero addibila ale yonihiliwa wodhela murogola ole wahalibiha addibila amodha, nikuru naaye nowiwanana ninga emudhi. — Sal. 133:1.

16. Mowiwanana ni Colossenses 4:3, 18, nnakavihere nimakalelo baani addibilihu enaharahariwa?

¹⁶ Addibila naarogola owinjhiva enowapara mabasa a Yehova naarive eharahariwaga. Amodha enofiyedha ovokedhiwa mukambura mwaha wa nroromelo newa. Iyo podi walobelela aliwa vamodha ni emudhi yewa, ni walobelela ale eneeka egumi yewa vangovini wihina yakavihere addibila epaddi yomuzimuni, yomwilini ni wawakihedha wodhela malamulo aanamathonga.c (Omwileri Colossenses 4:3, 18.) Kuddiwale wihina malobelo awo enowakavihera addibila ala! — 2Tes. 3:1,2; 1Tim. 2:1,2.

17. Nimakalelo baani oniwegeredhiwe ovanene oharahariwa wahinabajhe?

¹⁷ Nihinathi obajha oharahariwa we podi obajha ovanene wiwegeredha vamodha na amudhawo. (At. 14:22) Kuxixege wubuwela dhithu dhabure dhinupadduwelege, ohiya eyo olibihe wandana wawo ni Yehova ni wakavihere anaawo werana emodhave. Wabajha othuwathuwa onfugulele murima wawo Yehova. (Sal. 62:7,8) Mwatugumana ninga emudhi muthapanyedhe dhithu dhatedhene dhinuthukulelani omuroromela Yehova.d Nimakalelo yala, yakumelela ngovi ororomeleya wawo wa Yehova ni wiwegeredha wawo wapama winere wavaha anawo oliba murima ni murenddele.

18. Ethu baani nnajhehihu osogolo?

¹⁸ Murenddele wa Mulugu winonibarela ni winonikavihera okala oopwaseya. (Fil. 4:6,7) Fuudhela murenddele yola Yehova ananikaviheriye ohuthuwathuwa naarive nifwanyiwaga ngovi, dhiredda ni oharahariwa. Oliye onowalabihedha anamaholela mulogo enalaba nuviheya wihina eniholele. Teto ononivaha aatene iyo gari yokaviherana mmodha ni mukwaye. Murenddele ola ninnihuna peeno winere onikavihera wanda wagonjhiha makathamiho manlubale enadha osogolo enavolowelavo ‘ohoseya winlubale.’ (Mat. 24:21) Eyo yapadduwa enere ohoweleya okala oopwaseya ni wakavihera amodha werana emodhave. Ohoseya winlubale wavira, dhatedhene dhinanitotela makathamiho kadhinubuweliwege. Mwaha Yehova anere onivaha dhatedhene nahowelihu, murenddele wowogowa ni wa mukalakala. — Isa. 26:3, 4.