Okala oopwaseya winowoniha wi oli muthu akopolo

1. Ethu baani yaapadduwe nakala oskola obe omabasani?

ONAKALA aavi mukwawo ooskola obe oomabasani, ukoha wodhela dhithu dhinarumedhiwe? Onakala oothuwathuwene? Owinjhiva wa iyo nnothuwathuwa. Mbwenye makoho ninga yaala, enonikavihera onona mubuwelo wa muthu anawerana makohoya ni winonivaha ofuru womulaleya muthenga wOmwene. Mbwenye malabo mamodha athu enawerana makoho wihina nambele okangana. Eyo kinantikiniha, mwaha athu owinjhiva enowiwa dhithu dhohiyanahiyana wodhela dhithu nnarumedhihu. (Atos 28:22) Teto iyo nnakalawo ‘malabo ookuthula,’ athu owinjhiva eliiwa ‘oohiwananeyana ni ooporosa.’ — 2 Tim. 3:1, 3.

2. Mwahaya bwaddi nigafuna okala athu oopwaseya?

² Podi wera onowikoha: ‘Ginande aavi okala muthu oopwaseya, athu amodha yaafunaga okangana ni miyo wodhela muselu wa mBibiliyani?’ Ohunona ethu enafuna wukavihera? Opwaaseya. Muthu oopwaseya kanatakaleliwa bure-bure ohiya eyo muthu oopwaseya, anowanda wiisugwera naarive aligiwaga ni anakala oomaleyene thabwa-thabwa ahinona ethu yowoga. (Pro. 16:32) Ebaribari wihina sokweya owoga ohiya werana. Onande aavi okala muthu oopwaseya? Onande aavi wakula mwamakalelo oopwaseya muthu ukohaga wodhela dhithu dhinarumedhiwe? Akala oli baabi obe maayi, onaakavihere aavi anawo wakihedha nroromelo newa nupwaseya? Nnere woona yowakulaya muwari mwa yohudhera yeela.

NNANDE AAVI OKALA ATHU OOPWASEYA

3. Mwahaya bwaddi nigawoga wihina okala athu oopwaseya enowooniha wihina nili athu akopolo ohiya oolodhowa? (2 Timóteo 2:24, 25)

³ Okala muthu oopwaseya kinatapulela okala oolodhowa. Ela ekalelo yaathu ooliba, mwaha nnohowela okala athu ooliba wihina nidhowegeve nikalaga oopwaseya naafwanyiwaga makathamiho oorusa. Opwaaseya ekalelo enakosa epaddi ya ‘yowima yomuzimuni.’ (Gál. 5:22, 23) Madhu owi ‘opwaaseya’ ni Egerego, yalabihedhiwa agiwagana kavalu aali amukokolani mbwenye ahudhihiwe okala oowiwelela. Alemelihiwa okala vaade ni oowiwelela, kavaluya anookala oomaleya ni oopwaseya mbwenye oliye kanahiya okala akopolo. Ki iyo, nnande aavi okala athu oopwaseya mudhidhi mmodhave akopolo? Kannande werana eyo yeekihu. Nnohowela olobela nlobaga muzimu wotxena nnikavihero wihina nikanne ekalelo ela yowoma. Dhihikalawo dhotajhiha dhinoniha wihina enowandeya okala muthu oopwaseya. Addibila ni arogola owinjhiva yahididela okala oopwaseya, naarive eligiwaga, teto ehihiya yotajhiha yapama wa ale yaasugwa. (Omwileri 2 Timóteo 2:24, 25.) Onande aavi woniha ekalelo ela yopwaseya mwamakalelo ookweya?

4. Ddiniyani emukavihere Izaki okala muthu oopwaseya?

⁴ MBibiliyani dhihikalamo dhopadduwa dhinoniha wihina opwaseya ekalelo yathima. Kasugwa yopadduwa ya Izaki, oliye nuutamela murudda woJerari amwanddamani aaye yaali mafilistewu, obajha omukalela nrima ofiyedha wavuhelela matxela aatene yatibile adhaari aababe. Mbwenye ohiya owana wihina aahalena matxela ale, Izaki vamodha ni amudhaaye otamela murudda mmodha wolapela ni ole yaliwa ni watiba matxela mamodhaya. (Gén. 26:12-18) Mbwenye mafilistewu owoga wihina manjhe a matxela ale maxa Izaki aatibiliye yaali ewa, naarive dhigaali ndo, Izaki ahididela okala muthu oopwaseya. (Gén. 26:19-25) Ethu baani yaamukavihere Izaki okala muthu oopwaseya, naarive amodha yeragana dhatedhene wihina emulige? Mohanganyedha oliye ahisugwa ekalelo ya makolo aye ni ahihudhera ni yotajhiha ya ababe Abarawu, aali muthu a murenddele, ni ahihudhera ni yotajhiha ya amaye Sara aali a ‘muzimu woomala ni wapama.’ — 1 Ped. 3:4-6; Gén. 21:22-34.

5. Yopadduwa baani enoniha wihina abaabi podi wahudhiha aniiwa okala athu oopwaseya?

⁵ Abaabi ni nyunwa podi wakavihera aninyu okala athu oopwaseya. Kasugwa yopadduwa ya Maxence, anna yaka 17. Akala oskola obe mmabasani oolaleya oogumana ni athu yadhiveliwa okangana. Mbwenye makolo aye yaali athu oovilela ni yahimuhudhiha okala muthu oopwaseya. Makolo a Maxence enowoga: “Maxence wonelamo wihina sookweya okala muthu oowali naligiwaga, mbwenye muthu ooliba mwebaribarene duule ananda okala oopwaseyene naarive aligiwaga.” Vano opwaseya ekalelo yathima mwigumini ya Maxence.

6. Olobela winanikavihera aavi okala athu oopwaseya?

⁶ Nnere ddi muthu abajha oniliga wodhela omuwoga obure Yehova obe Bibiliya? Nnohowela olobela wa Yehova nimulobaga muzimu waye wotxena ni thotho wihina nande okala oopwaseya. Ki nnere ddi noonelamo wihina kanandile okala oopwaseya? Iyo podi olobela dila yanabili ni wubuwelela ethu nnafunihu werana yanipadduwela ethu emodhave osogolo. Nerana ndo, Yehova anere onivaha muzimu waye wotxena ni anere onikavihera okala athu oopwaseya.

7. Dhithu baani dhinanikavihere wihina nande osugwera dhithu nnawogihu ni osugwera makalelo nnakalihu naligiwaga? (Provérbios 15:1, 18)

⁷ Dholebela dhowinjhiva dha mBibiliyani, podi onikavihera owoga ni makalelo oopwaseya mudhidhi worusa. Muzimu wotxena podi onikavihera wubuwelela dholebela ndho. (João 14:26) Motajhiha, malagano nnafwanyihu mulivuru na Provérbios podi onikavihera okala athu oopwaseya. (Omwileri Provérbios 15:1, 18.) Livuru nna na mBibiliyani, nnonikavihera wonelamo mwahaya bwaddi sapama okala oopwaseya naaligiwaga. — Pro. 10:19; 17:27; 21:23; 25:15.

WABIHA WUBUWELA NAHINATHI OWOGA WINANIKAVIHERA AAVI OKALA ATHU OOPWASEYA?

8. Mwahaya bwaddi nigahowela wubuwela pamadhene nahinathi omwakula muthu ananikoha wodhela dhithu nnarumedhihu?

⁸ Wubuwela nahinathi owoga podi onikavihera. (Pro. 19:11) Muthu anubuwela ahinathi owoga onowanda wiisugwera aakohiwaga wodhela dhithu anarumedhiye. Mwaha malabo mamodha iyo kannanda wonelamo ethu baani emuthukulele muthu ole onikoha wodhela dhithu nnarumedhihu. Bumwahaya sapama nahinathi omwakula, ohudduwala wi iyo kannonne ethu emuthukulenle muthuya onikoha. — Pro. 16:23.

9. Jideyawu onihile aavi thotho vamodha ni opwaseya mudhidhi awakulaga alobwana owEfrayim?

⁹ Kasugwa ethu erilena Jideyawu alobwana owEfrayim nuwoga nuliye nuuwali. Aliwa yafuna enone mwahaya bwaddi Jideyawu adhe ahawithanege wihina yawane ni amwiddani aamwaana Ezarayeli. Mbwenye ethu baani yathukulenle alobwana owEfrayim owoga ni Jideyawu nuuwali? Podi wera waali withukula wewa. Mwaha aliwa yubuwela wihina nihimo neewa naali nathima vaari va amwaana Ezarayeli. Naarive nahinonne pama ethu baani yathukulenle aliwa owoga ni owali, Jideyawu ahabiha wubuwela ahinathi owoga. Oliye ahisayela wonelamo mwahaya bwaddi alobwana ale edhe ekalege ootakaleliwene. Mwaha wa yeyo, ahawakula nupwaseya. Yokumelelavoya? Bibiliya anowoga wihina ‘aliwa okurumuwa murima.’ — Juí. 8:1-3.

10. Ddiniyani enanikavihera onona makalelo owawakula athu enanikoha wodhela dhithu nnarumedhihu? (1 Pedro 3:15)

¹⁰ Podi wera mukwihu oomabasani obe ooskola anonikoha mwahaya bwaddi nigaahara malagano amBibiliyani. Naakulaga nikohona nnere wilibihedha wihina naakihedhe dhithu nnarumedhihu, teto mudhidhi mmodhave nnere wilibihedha woniha wihina nnoriha mubuwelo waye. (Omwileri 1 Pedro 3:15.) Mbwenye ohiya wonelamo nikoho na muthu ole ninga makalelo ooniliga, yere okala yapama iyo woona nikoho nne ninga ofuru woonona ethu anafuniye wonelamo. Naarive nahinonne ethu emuthukulele muthu ole werana nikohona, nnafuna nimwakule ni makalelo oopwaseya ni apama. Nerana ndo, podi wera yowakula yehu enere omukavihera muthu ole wubuwelela dila bili wodhela muselu ole. Naarive akala muthuya erilena nikohona agaali ootakaleliwa obe nuuwali, nnafuna nimwakule ni makalelo apama. — Rom. 12:17.

11-12. (a) Dhithu baani nnahowelihu wubuwela nahinathi wawakula makoho oorusa? (Osugwe fotu) (b) Namala osanyiha pama museluya nnande aavi ovaha yowakula yapama?

¹¹ Podi wera mukwawo oomabasani anafuna anone mwahaya bwaddi kunaajha mathanga a aniversariyu. Karajhiha wikoha: Oliye anafuna anone akala iyo nnowaredha obe naari? Obe oliye anubuwela wi werege ononga murenddele womabasani? Iyo podi omutamalela mukwihu oomabasani mwaha onithuwathuwela ni wathuwathuwela athu amodha oomabasani, teto nnohowela omwaddela wihina nihiyoya nnofuna olaba mburo wa murenddele. Dhandeya nyu podi okanna othapanya wapama ni omwaddela dhithu Bibiliya anahudhihiye wodhela muselu wa aniversariyu.

¹² We podi werana emodhave wakumelela muselu onatatamula okangana. Motajhiha mukwawo ooskola podi owoga wihina Anamoona a Yehova enohowela osaddula monelo wewa wodhela ogonihana alobwanave obe ahiyanave. Nerege oliye anawoga ndo mwaha kanonne ebaribari wodhela dhithu Anamoona a Yehova enarumedhiiwa? Obe anawogela ndo mwaha wokanna mmudhaye obe mukwaye anakosa epaddi ya athu enagonihana alobwanave obe ahiyanave? Nerege oliye anubuwela wihina iyo nnowawidda athu enagonihana alobwanave obe ahiyanave? Podi wera yere okala yapama omwaddela wihina iyo nnowathuwathuwela athu aatene ni wihina nnoriha mubuwelo wa kadda muthu, teto nihinona wi kadda muthu ohukanna ofuru wosakula ele anafuniye.b (1 Ped. 2:17) Podi wera nnere okanna ofuru woomoniha wihina wahara malagano amBibiliyani winonikavihera okanna egumi yohagalasa.

13. Onaamukavihere aavi muthu anawoga wihina orumedha wihina Mulugu ohukalawo otaduwa?

¹³ Naathapanyaga ni muthu ali owikomeene ni ndhe anarumeedhiye, kanubuwelege wihina iyo nihinona dhithu dhinamuthukulela oliye owogaga ndo. (Tito 3:2) Motajhiha, were ddi ahere mukwawo ooskola ahawoge wi orumedha wihina Mulugu ohukalawo otaduwa? Weerege wubuwela wihina oliye onorumedha muselu woruthuwa ni ohunona dhithu dhowinjhiva wodhela muselu yoyo? Podi wera oliye anawoga baahi dhithu iwaliye ni athu amodha ni karajhihile osanyiha wodhela muselu yoyo. Mbwenye ohiya othapanya nuliye wodhela muselu woruthuwa, we podi owoga ethu-sithu wihina oliye ahale ubuwelaga obe we podi omooniha muselu onawoga wodhela opaddusa onafwanyeya musayitini jw.org. Vano nlabo nimodha nyu podi othapanyedha wodhela vidiyu obe muselu afwannyiye. Naarihaga athuya ni makalelo yala, enere okala yokweya aliwa ofuna ohudhera wodhela ndhe Bibiliya anahudhihiye.

14. Niall alabihendhe aavi sayiti jw.org wihina amukavihere mukwaye ooskola wonelamo wi dhithu dhimodha dhinawogiwa wodhela anamoona a Yehova sowota?

¹⁴ Muzombwe dhaala anithaniwa Niall, ahilabihedha sayiti yehu jw.org wihina oonihe wi dhithu athu enawogiiwa wodhela Anamoona a Yehova kahi ebaribari. Oliye anowoga egi: “Mukwaaga dhaala ooskola owogesa wihina miyo kagamurumedha siyensiya mwaha miyo garumedha dhithu dhilebiwe mulivuruni nlebiwe ni athu ohiya orumedha dhithu dhifwanyiwe ni masiyentista.” Woona wihina mukwaye ole ooskola kaafuna onvuruwana, Niall omuloba wihina avolowe musayitini mwehu jw.org epaddi enadha “A Ciência e a Bíblia.” Nuuvira mudhidhi, Niall wonelamo wihina mukwaye ole ahivolowa musayitini, vano oofuna othapanyedha wodhela muselu wopaddusa. Ethu ninga yela yupadduwela, we podi okanna yokumelelavo emodhave.

WAKAVIHERE AMUDHAWO

15. Abaabi enakavihere aavi aniiwa wakula nupwaseya yakohiwaga wodhela dhithu enarumedhiwa?

¹⁵ Abaabi podi wakavihera aniwa onona wakula ni makalelo oopwaseya muthu aakoha wodhela dhithu enarumedhiwa. (Tia. 3:13) Abaabi amodha enowaxagiha aniwa mudhidhi wa ohudhera weemudhi. Aliwa enosakula muselu enonniwa wihina aniwa podi okohiwa yakala oskola ni enowegeredha pamadhene makalelo oowakula. Teto enowahudhiha aniwa makalelo oowoga nupwaseya ni odahinya murima wa ale enaavuruwana. — Osugwe kwaduru enna musolo “Oxagihe emudhaawo.”

16-17. Mwahaya bwaddi waxagiha azombwe podi wakavihera onona omwakula muthu anakoha wodhela dhithu enarumedhiwa?

¹⁶ Waxagiha azombwe podi wakavihera aliwa otapulela pamadhene dhithu enarumedhiiwa ni okanna ebaribari wihina dhinawoga Bibiliya sebaribari. Seriye “Os Jovens Perguntam,” enafwanyeya musayitini jw.org enodhana kwaduru dhinaakavihera azombwe. Kwaduru ndho dhinegeredhiwa wihina dhakavihere azombwe olibiha nroromelo newa wodhela dhithu enarumedhiwa ni onona wakula ni madhu eweene. Emudhi yahudheraga dhipaddi ndha vamodha, enowakavihera athu aatene vamuralani ovaha dhowakula dhopwaseya ni dhinadahinya murima wa ale enaavuruwana.

¹⁷ Muzombwe dhaala anithaniwa Matthew anowoga makalelo dhoxagiha ndha dhimukaviheriwa. Yeragana ohudhera weemudhi, Matthew ni makolo aye yosayela dhithu enoniwa wihina eere okohiwa oskola. Oliye onowoga egi: “Iyo nowawubuwela makoho ganonnimi wihina akwaga ooskola yere wawerana, gamala goosayela makalelo gafunimi wawakula. Gowonelamo pamadhene mwahaya bwaddi ngarumedha ndhe anawoga Bibiliya. Mwaha wa yeyo gakalesa oolibeene ni owegeredheyene wihina givahe dhowakula mwamakalelo oopwaseya athu amodha yaweragana makoho.”

18. Colossenses 4:6 ananihudhiha ddi?

¹⁸ Ebaribari wihina otapulelamo baahi dhithu nnarumedhihu, kinaathukulele athu amodha orumedha ndhe nnawogihu. Mbwenye owoga ni makalelo apama vamodha nupwaseya, podi wakavihera. (Omwileri Colossenses 4:6.) Owoga ndhe nnarumedhihu enaligana ni onvokedha bola muthu mmodha. Iyo podi onvoka bola ni makalelo apama obe ni kopolo dhehu dhatedhene. Mbwenye nanvoka bolaya ni makalelo apama, enere okala yokweya muthu mmodha ompara bolaya ni odidelave amujogarigi. Nimakalelo mamodhave, nawogaga ni makalelo apama vamodha nupwaseya athuya enerege ofunave onivuruwana. Ebaribari wihina muthuya aafunaga okangana obe owoga obure wodhela dhithu nnarumedhihu, iyo kannawaddihedhiwa odidela othapanya. Nafuna iyo podi ogwadda othapanyawa noona wihina muthuya anafuna akaganege baahi. (Pro. 26:4) Mbwenye naarive athu efunaga okangana, nikanne ebaribari wihina enere okalawo athu owinjhiva enaafunege onivuruwana.

19. Ethu baani enanithukulela wooniha opwaaseya nabarelaga nroromelo nehu?

¹⁹ Enowoneya pamadhene wihina okala muthu oopwaseya ethu yapama. Bumwahaya olobele wa Yehova omulobaga kopolo wihina wande okala muthu oopwaseya, wafunaga omwakula muthu anokoha wodhela dhithu onarumedhiwe. Kuddiwale wihina omwakula muthu ni makalelo oopwaseya, podi wukavihera orabela okangana. Wakula ni makalelo oopwaseya ni anriho, podi wathukulela athu amodhaya ofunaga wiwa ni osaddula mubuwelo wewa wodhela anamoona a Yehova ni wodhela Bibiliya. Bumwahaya, ‘mukalege owiwegeredhene wihina mwawakule pama athu enuukoheni wodhela nroromelo nenyu. Mwakulaga mwamakalelo apama ni nriho.’ (1 Ped. 3:15) Teto wikome wihina okale muthu oopwaseya wi woonihe wihina oli muthu akopolo!