Kuwanganyedhege wihina Yehova anere wukavihera mudhidhi worusa

1-2. (a) Makathamiho baani enaligana ni ehu yaafwannye majudewu yahogolowenle oJeruzale? (b) Wasorihe makathamiho yaafwannye maJudewu? (Osugwe kwaduru enna musolo “Malabo a Ajewu, Zakariya ni Esdara.”)

ONOOTHUWATHUWA malabo mamodha wubuwelaga wodhela osogolo? Podi wera ohayelela mabasa ni kunonne makalelo onafuniye ojhiha emudhaawo, obe podi wera onoothuwathuwa ni obareleya wa emudhaawo mwaha wa ohiwanana wa anamathonga a elabo yawo, oharahariha obe widdiwa nakala mmabasani oolaleya. Onoofwanyiwa makathamiho ninga yala? Akala siyeyo, ohudhera wodhela makalelo Yehova aakavihenriye amwana Ezarayeli mudhidhi efwanyiwaga makathamiho ninga yala enere wukavihera vanlubale.

² Majudewu yabaliwe ni yunnuwile oBabiloniya yohowela okanna nroromelo nooliba wihina ehiye egumi yapama yanniwana oBabiloniya ni yeedde olenddo wolapa wihina edhowe elabo yahanonniwa. Aliwa nufiya yahibajha ofwanyiwa makathamiho mwaha wa ohiwanana wa anamathonga, orameya korowa ni widdiwa. Mwaha wa yeyo amodha yowarusa opwasedha wapara mabasa oovenyihedha tempulu. Bumwahaya yaka ya 520 M.W.O., Yehova waruma anamavuhulela abiili Ajewu ni Zakariya, wihina ekavihere nlogo ohogolowela oviheya ni mabasa a Yehova. (Ag. 1:1; Zac. 1:1) Ninga nnafunihu woona mabasa yaapanre anamavuhulela ala abiili yahikavihera vanlubale, mbwenye nuuvira yaka 50 majudewu ale yahogolowenle oJeruzale yohowela olibihiwa dila biili. Esdara aanonne wakopiyari pamadhene malamulo, okuma oBabiloniya odhowa elabo yoJeruzale wihina alibihe nlogo na Mulugu opweha omwebedha Mulugu mburo wobajha mwigumini mwewa. — Esd. 7:1, 6.

3. Makoho baani nnafunihu wawakula muwari mwa ohudhera wula? (Provérbios 22:19)

³ Dhovuhulela dha Ajewu ni Zakariya dhahikavihera nlogo na Mulugu odidela emuroromelaga Yehova mudhidhi worusa. Dhovuhulela ndha podi onivaha ebaribari nihiyowa wihina Yehova anere onikavihera mudhidhi worusa naarive nifwaniwaga makathamiho bi makathamiho. (Omwileri Provérbios 22:19.) Nahudheraga muthenga waalaleyiwe ni Ajewu vamodha ni Zakariya ni napendda wodhela egumi ya Esdara, wawubuwelege makoho ala: Makathamiho ala yaapanthe aavi majudewu? Mwahaya bwaddi nigahowela odhogave nipwehaga efunelo ya Yehova mburo wobajha mwigumini mwehu naafwanyiwaga makathamiho? Ki nnande aavi odowahagave nimuroromelaga Yehova mudhidhi worusa?

MAKATHAMIHO YAAPANTHE AAVI MAJUDEWU?

4-5. Ddiniyani yathukulenle maJudewu okwerebeya mudhidhi evenyihedhaga tempulu?

⁴ Majudewu nufiya oJeruzale yahikanna mabasa owinjhiva wihina yaapare, wahinavire mudhidhi wowinjhivene aliwa onvenyihedha altare a Yehova ni omutibela alisersi a tempulu. (Esd. 3:1-3, 10) Mbwenye oviheya yanniwana omambelelo obajha ovuguwa, mwaha wihina ohiya ovenyihedhave tempulu aliwa yoohowela omaga nyumba dhewa, osamalela mundda dhewa ni ojhiha emudhi yewa. (Esd. 2:68, 70) Teto ohiya eyo aliwa yohowela owanana widdiwa ni amwiddani ewa yafuna yamaaliha mabasa ale oovenyihedha tempulu. — Esd. 4:1-5.

⁵ Wahiya makathamiho ala aatene majudewu yohowela owanana orameya wa korowa ni ohiwanana wa anamathonga ewa. Teto elabo yewa yakaliiwa vano yookosa epaddi ya onamathonga woPersa, vasogolova mwene oPersiya Siru nuukwa yaka ya 530 M.W.O., mweneya ooharela Kambizi afuna athukule elabo ya Wijipitu wihina athongege, vano mudhidhi adhowaga Wijipitu podi wera anyakoddo aye yahaloba amwana Ezarayeli manjhe ni dhojha vamodha ni mburo wokala, eyo yahawenjhedhedha makathamiho a majudewu. Mwene ooharela Dariyu oobajha, wambela othonga, mbwenye yahikalawo makathamiiho owinjhiva ninga warugunuwela anamathonga ni ovuruvuru wapela onamathonga waatene woPersiya. Dhithu dhatedhene ndhe dhowathukulela majudewu okala oothuwathuwene wodhela makalelo yafuniwa ojhiha emudhi yewa. Vano mwaha wa makathamiho yala amodhaya obajha wubuwela wihina ole kuwali mudhidhi wapama wovenyihedha tempulu ya Yehova. — Ag. 1:2.

6. Mowiwanana ni Zacarias 4:6, 7, makathamiho baani yaafwannye maJudewu, mbwenye ethu baani Zakariya aaroromelihiye?

⁶ Omwileri Zacarias 4:6, 7. Ohiya baahi makathamiho oorameya korowa ni ohiwanana wa anamathonga, majudewu yohowela owanana oharahariwa. Yaka ya 522 M.W.O., amwiddani ewa yahanda omuthukulela namathonga ooPersiya waamaliha mabasa oovenyihedha tempulu. Mbwenye Zakariya waaroromeliha majudewu wihina Yehova eere olabihedha kopolo dhaye wihina aakavihere aliwa ovenyihedha tempulu naarive efwanyiwaga makathamiiho bi makathamiho. Vano yaka ya 520 M.W.O., mwene Dariyu weenya wihina yahogolowele mabasa oovenyihedha tempulu ofiyedha wavaha korowa wihina yande waamariha mabasa yanniwana. Ohiya eyo, oliye olamula wihina anamathonga yaawaddamenle yaakavihere mabasa yaapara majudewu. — Esd. 6:1, 6-10.

7. Mareeliho baani maJudewu yawakenliwa mwaha wopweha mburo wobajha efunelo ya Yehova?

⁷ Wodhela Ajewu ni Zakariya Yehova ahipaganya nlogo naye wihina eere wakavihera yahapwehe mburo wobajha mabasa oovenyihedha tempulu. (Ag. 1:8, 13, 14; Zac. 1:3, 16) Majudewu yahilibihiwa vanlubale ni madhu yawogile anamavuhulela ale ni ohogolowela wapara mabasa oovenyihedha tempulu yaka ya 520 M.W.O., mwaha wa yeyo, yahanda wamariha mabasa ale oovenyihedha tempulu dhihinavire yaka 5. Aliwa yahikaviheriwa ni Yehova ni yahaawakela mareeliho epaddi yomwiilini ni yomuzimuni mwaha wopweha efunelo ya Yehova mburo wobajha mwigumini mwewa ohiiya wapwasedha makathamiho yanniwana. Mwaha wa yeyo aliwa yahanda omulabela Yehova nuuhagalala. — Esd. 6:14-16, 22.

ODHOWEGEVE OPWEHAGA EFUNELO YA YEHOVA MBURO WOBAJHA MWIGUMINI MWAWO

8. Ni makalelo baani madhu enafwanyeya va Ageu 2:4 enanikaviheriwa opwasedha werana efunelo ya Yehova? (Osugwe nota)

⁸ Woona wihina ohoseya winlubale onna waddamela nnohowela wilibihera vanlubale wihina niiwelele nlamulo nowapara mabasa oolaleya. (Mar. 13:10) Mbwenye podi okala yorusa wapwasedha mabasa oolaleya naafwanyiwaga makathamiho ohukanna korowa obe akala nnowiddiwa nakala mmabasani oolaleya. Ddiniyani enaanikavihere opweha mabasa a Yehova mburo wobajha mwigumini mwehu? Nnohowela ororomela wihina ‘Yehova Mulugu aanyakoddo’b ali epaddi yehu. Oliye anerege onikavihera nadidela opweha Omwene waye mburo wobajha mwigumini mwehu. Bumwahaya kannahowela woova ethu. — Omwileri Ageu 2:4.

9-10. Anamatelana dhaala yoonile aavi wihina madhu Yesu aasorihiliye va Matewuji 6:33 beebaribari?

⁹ Kasugwa yopadduwa ya Oleg ni Irina,c anamatelana enalaba ninga mapiyonero. Aliwa yahitamela mulogo mmodhaya wihina ekavihere mbwenye vasogolova aliwa wayelela mabasa ewa mwaha wihina elabo yakaliwa yoofwanyeya makathamiho oorameya korowa, aliwa kayandile wafwanya mabasa muwari mwa yaka modha mbwenye aliwa yahimoona Yehova aasamalelaga malabo amatene teto malabo mamodha yookaviheriwa naaddibila. Ki vano aliwa yandile aavi wawanana makathamiho ala? Oleg omambelelowene aali owukuweene anowoga egi: “Okala ooviheya ni mabasa oolaleya wahinikavihera opwasedha ethu yathima mwigumini.” Mudhidhi oliye ni mwariye esayelaga mabasa aliwa yahiviheyana mabasa oolaleya.

¹⁰ Labo nimodha aliwa eweruwaga mmabasani oolaleya, mukwiwa aadhivela vanlubale ahedda olenddo wa makilometuru owakwana 160, wihina aavahe sestu biili mwaali dhoojha. Oleg anowogave egi: “Labo nenne nahoona dila yanabili makalelo Yehova ananisamaleliye ni makalelo addibila ammulogoni enanidhiveliwa. Iyo nihikannna ebaribari wihina Yehova kanaadduwala adharaaye naarive dhithudha dhirusaga obe nubuwelaga wihina kaninna manera.” — Mat. 6:33.

11. Napwasedha werana efunelo ya Yehova ethu baani nahinahowelihu wanganyedha?

¹¹ Yehova anafuna wihina iyo naapwasedhe wapara mabasa enavulusa egumi, eli mabasa oolaleya. Ninga noonilihu ddima 7 Ajewu ahilibiha nlogo wihina yahubuwelege yaka dhamundduli ndhe dhavinre mabasa oovenyihedha tempulu yaamanliwa ni wahogolowela wapara mabasa ale nuuviheya. Aliwa yaherena ndo, Yehova ahipaganya wihina eere wareeliha. (Ag. 2:18, 19) Nihiyowa podi okanna ebaribari wihina Yehova anere oreeliha wilibihera wehu nadidela opweha mburo wobajha mabasa anivahiliye.

ONANDE AAVI OLIBIHA NROROMELO NAWO NI YEHOVA?

12. Mwahaya bwaddi Esdara vamodha ni maJudewu amodha yohowela okanna nroromelo nooliba?

¹² Yaka ya 468 M.W.O., Esdara aherana olenddo wokuma oBabiloniya adhowaga oJeruzale nnikuro nanabili na majudewu. Esdara vamodha ni majudewu yaali nuliye yohowela okanna nroromelo nooliba wihina yande werana olenddo ole. Aliwa yohowela wedda dila dhowopiha egathukunle dhoreela dhowinjhiva ninga oru ni parata yaavahiwiwa wihina yavenyihedhena tempulu. Mwaha wa yeyo egumi yewa yaali vang’ovini mwaha wihina ambava yerege ofuna wawiyedha. (Esd. 7:12-16; 8:31) Teto aliwa yahonelamo wihina luwani yoJeruzale kamwali obareleya, mwaha kamwali athu owinjhiva teto yoohoweleya owomihedha txinga vamodha ni musiwo. Nnahudhera ddi ni Esdara wodhela muselu wolibiha nroromelo nehu ni Yehova?

13. Esdara aalibihile aavi nroromelo naye ni Yehova? (Osugwe nota)

¹³ Esdara ahoona makalelo Yehova anasamaleliye nlogo naye mudhidhi worusa. Yaka ya 484 M.W.O., Podi wera Esdara aali oBabiloniya mwene Asuwero nulamula wihina majudewu aatene yafwanyeya onamathonga watene woPersiya epiwe. (Est. 3:7, 13-15) Egumi ya Esdara vamodha ni ya majudewu owinjhiva yaali vang’ovini! Vano nunoona wodhela dhithu dhafuna opadduwa, Esdara vamodha ni majudewu aatene othuwathuwa ni obajha othuga wula elobelaga wa Yehova elobaga nikavihero naye. (Est. 4:3) Kubuwela makalelo Esdara vamodha ni majudewu aatene yaaliwa dhithudha nusadduwa vano ale yafuna waapa majudewu opiwa ni majudewu! (Est. 9:1, 2) Dhithu dhatedhene ndhe dhahimwegeredha Esdara wihina ande wawanana makathamiho yaadhege osogolo ni yahimuthukulela oliye okanna ebaribari wihina Yehova podi obarela nlogo naye. d

14. Murogola dhaala ahudhenre ddi nusamaleliwa ni Yehova mudhidhi worusa?

¹⁴ Noonaga makalelo Yehova ananisamaleliye mudhidhi worusa nroromelo nehu nuliye nnothabwa oliba. Kasugwa yopadduwa ya Anastasiya anakala epaddi yomadhelo nduwa ya wEwuropa. Oliye othoma wahiya mabasa mwaha wihina akwaye oomabasani yere onwaddihedha wivolosiha mpulitikani. Oliye anowoga egi: “Ele yaali dila yobajha mwigumini mwaaga gahannimina newene txikwi. Vano miyo ohiya museluya mmadani mwa Yehova ni gahoona makalelo agisamalenliye mwamakalelo oodhivela. Osogolo gadha gayelelaga mabasa kagidha goova. Akala baabi aaga oodhulu anogisamalela ofiyedha peeno, mwebaribareene anere ogisamalela mangwaana.”

15. Ddiniyani yaamukavihenre Esdara odhowagave amuroromelaga Yehova? (Esd. 7:27, 28)

¹⁵ Esdara ahoona nlada na Yehova nimukabelelaga egumi yaye yaatene. Esdara ubuwela dila dhatedhene Yehova aamukaviheriye kale, oliye ookanna ebaribari wihina Yehova erege omusamalela. Kaasugwe madhu ala ‘nlada na Yehova Mulugu aaga naali ni miyo.’ (Omwileri Esdras 7:27, 28.) Esdara ahawoga madhu yala dila dhowakwana 6 mulivuruni oliye aavetheliwiye oleba. — Esdras 7:6, 9; 8:8, 22, 31.

16. Mudhidhi baani nnandihu woona pamadhene nlada na Yehova mwigumini mwehu? (Osugwe fotu)

¹⁶ Yehova podi onikavihera naafwanyiwaga makathamiho. Motajhiha, namuloba patarawu ehu wihina anivahe feriya dha malabo mararu wi noone musonkano wa malabo mararu obe aasaddule mawora nnaaparihu mabasihu wi nande woona mutugumano, iyo nnokanna ofuru wowoona nlada na Yehova nnikaviheraga. Teto yokumelelavoya sowihina nnowawakela mareeliho nahajheherihu, mwaha wa yeyo nroromelo nehu ni Yehova nnoliba.

17. Esdara oonihile aavi wihina aali owiyeviha mudhidhi afwanyiwaga makathamiho? (Osugwe fotu yavakapani)

¹⁷ Esdara aali owiyeviha ni ahilobela wa Yehova alobaga nikavihero. Mudhidhi wamutene akaliye oothuwathuwene mwaha wa dhithu ahoweliye werana, Esdara oolobela wa Yehova alobaga nikavihero. (Esd. 8:21-23; 9:3-5) Amwaana Ezarayeli amodhaya yowoona makalelo Esdara amuroromeliye Yehova ni yahibajha omukavihera ni otajhiha nroromelo naye. (Esd. 10:1-4) Nakala oosegedheyene mwaha wa dhothuwathuwiha, ninga ojhiha emudhi yehu obe nuubareleya wa emudhi yehu nnohowela olobela wa Yehova ni omuroromela Oliye.

18. Ethu baani enaanikavihere okanna nroromelo nooliba ni Yehova?

¹⁸ Nakala owiyeviha, nisayela nikavihero na Yehova teto nenyaga nikavihero naaddibilihu, nroromelo nehu nnere oliba vanlubale. Erika anna ahima araru ahididela omuroromela Yehova naarive nupadduweliwa ng’ovi. Muwari mwa mudhidhi mung’onove oliye omuyelela mwaana aaliye ahinathi ombala ni mamune athabwiye omudhivela. Ubuwelaga dhithu dhatedhene dhampadduwele Erika anowoga egi: “Kinandeya onona dhithu dhatedhene Yehova anafuniye onerela wihina anikavihere, nikavihero na Yehova podi odha mwamakalelo ootikiniha. Yehova ohawakula malobelo aaga owinjhiva wodhela dhithu akwaaga yeriliwana ni ewogiliwa, gaafugulelaga murima waaga akwaaga enowakweyela aliwa ogikavihera.

ODIDELE OMUROROMELA YEHOVA OFIYEDHA OMAKUTHULO

19-20. Nnahudhera ddi ni maJudewu yahandile ohogolowela oJeruzale?

¹⁹ Iyo podi ohudhera ethu yathima ni majudewu yahandile ohogolowela oJeruzale. Amodhaya kayandile ohogolowela oJeruzale mwaha wihina yaali anakalaba, aredda obe yahikanna emudhi wihina esamalele. Naarive dhigali ndo aliwa yaherana ethu-sithu wihina yaakavihere ni dhovelela dhewa ale yahogolowela oJeruzale. (Esd. 1:5, 6) Nuuvira yaka 19 majudewu ale yahanle oBabiloniya yovaha dhovelela dhewa wihina yakaviherena mabasa yapariwa oJeruzale. — Zac. 6:10.

²⁰ Naarive nihandaga werana dhatedhene nnafunihu mmabasani a Yehova, iyo podi okanna ebaribari wihina Oliye anowoona wilibihedha wehu nnerihuna ni murima wehu wamutene ni wihina eyo enohagalasa murima wa Yehova. Mwahaya bwaddi nigawoga ndo? Mwaha wihina malabo a Zakariya Yehova ahimuloba namavuhulela aye wihina asasanye kara ya oru ni parata dhaveleliwe ni majudewu yakala oBabiloniya. (Zac. 6:11) ‘Kara’ ele yaali yowubusedha ya dhovelela dha maJudewu yaali oBabiloniya. (Zac. 6:14) Ni makalelo mamodhave iyo podi okanna ebaribari wihina Yehova kadha adduwala wilibihera wehu ni omulabela Oliye ni murima wehu wamutene naarive nifwanyiwaga makathamiho. — Heb. 6:10.

21. Ethu baani enaanikavihere osugwa osogolo ni nroromelo?

²¹ Mohanganyedha iyo nnerege ofwanyiwa makathamiho elabo ela nnakalihu, teto dhithudha dhinerege othabwa okuma peeno odhowa osogolo. (2 Tim. 3:1, 13) Mbwenye kaneenye wihina dhothuwathuwiha dhinikwerebehiye. Kuwadduwale madhu Yehova aawogiliye ni nlogo naye, malabo a Ajewu: ‘Miyo gili ni nyu . . . Kamoove.’ (Ag. 2:4, 5) Nihiyowa kannahowela wanganyedha wihina Yehova anere okala epaddi yehu nadidela wilibihera werana ndhe nnandihu winna nimulabele. Naparihedha mabasa dhithu nihudherihu ni anamavuhulela ala abiili Ajewu ni Zakariya ni ohara yotajhiha ya Esdara, nnerege odhowave nimuroromelaga Yehova naarive nafwanyiwa makathamiho bi makathamiho osogolo.