“Koddoya sa Yehova”

Dhaatedhene dhibanjhe yaka ya 90 mundduli. Namathonga oofaransa eera okukusa mwamakalelo abure filiyale ya elabo yele wihina evelele musoko dha dhovelela dhaakeliwe yaka ya 1993 ni 1996. Iyo nahitxokotxela muladdu ole ni tiribunale yoFransa, mbwenye kanandile. Mwaha ogonjhihiwa wule, namathonga ooFransa othukula korowa dha filiyale dhokwaranya 4,5 milyonji dha euro. Ejhehedho nannihuna waali muladdu wafuna owogiwa o Corte Europeia. Mbwenye nihinathi otxokotxela muladdu ole, korte ele oniloba wihina nitugumane ni anamawoga muladdu, anamathonga vamodha ni mwimeleli mmodha wa Corte a Europeia. Efuneloya yaali okanna yothoma muladduya wahinathi othukuleliwa otiribunale.

Iyo nubuwela wi mwimeleli ole, eere oniwaddihedha oliva korowa, dhandeyaga epaddi vang’ono ya ele aalobile namathonga ole. Iyo nahinona wihina oliva korowa naarive agaali 1 ewuro, kayiwanana ni malagano a mBibiliyani. Addibila ni arogola yavahile dhovelela ndha wihina ekaviherena Omwene wa Mulugu. Bumwahaya iyo kanaavahedhele korowa ndhe mwaha kadhaali dha anamathonga. (Mat. 22:21) Naarive dhigaali ndo, wihina niwelele ndhe dhalobile corte europeia, iyo odhowa otiribunale.

Iyo otugumana sala dhaala yowoma ya Corte Europeia. Nutugumana, omambelelowene dhithudha kadhedda pama. Mwimeleli a Corte Europeia, oroma owoga wihina Anamoona a Yehova yohowela oliva korowa yakukusiwa ni anamathonga ooFransa. Morurumusa iyo wambela okanna efunelo yowakoha. Bumwahaya iyo wakoha neegi: “Nyu mwahinona wihina namathonga ola ohuthukula korowa dhokwaranya 4,5 milyonji dha ewuro dha filiyale yehu?”

Vano mwimeleli ole otikina niile nawogilihu. Nuwindo, nikuru naale enawoga muladdu yaali epaddi ya namathonga, nuwoga ele yeriliwana ni filiyale yehu, mohulegela ekalelo ya mwimeleli ole osadduwa. Oliye wasumulula ni wimeliha muladduwa mudhidhi mmodhave. Miyo wonelamo wihina Yehova ahisaddula muladduya mwamakalelo nahajhehedhihu. Iyo navennye otiribunale wule nigaali oohagalalene. Teto kanaanda orumedha ele yaapadduwile.

Nlabo na 30 a Junho a 2011, Corte Europeia dos Direitos Humanos werana yothoma wodhela iyo. Yothoma eyo yawoga wihina namathonga ole ahiviriganiha ni ohowela ohogolosa korowa dhehu. Teto yohowela wenjhedhedhavo korowadha! Yothoma ele ehibarela webedha weebaribari oFransa, ofiyedha peeno. Nikoho nne nerilihuna nahifunaga, naali ninga nibwe nigwandde musolo wa Goliya. Mwaha mwimeleli ole ahisaddula mubuwelo waye. Mwahaya bwaddi nidhe nigonjhihege muladdu ole? Mwaha ndala ninga Davidi aawogiliye ni Goliya, “koddoya sa Yehova.” — 1 Sam. 17:45-47.

Mbwenye ela kayaali dila yobajha iyo nandilihu ogonjhiha muladdu otiribunale. Ofiyedha peeno, naarive ninkedhiwaga ni athu a pulitika obe anyagereja, anamawoga muladdu a korte a dhilabo dhowakwana 70 eherana dhothoma dhapama wodhela anamoona a Yehova dhowakwana 1,225. Ogonjhiha wula, winobarela mutholo wehu wathima ninnihuna wolaleya muthenga dhapama, okoodda okosa epaddi ya elabo ni okoodda nikame.

Ki miyo gaadhowile aavi Wewuropa woona wihina gakavihera komisawu yowoga muladdu o sede mundiyale ya Anamoona a Yehova, oNova Yorki, Wistadu Unidu?

EFUNELO YA MAKOLO AAGA YOKALA AMISIYONARIYU

Makolo aaga, George ni Lucille, ekursarile turma 12 ya Eskola ya Jileyadi, yaka gibaliwimi ya 1956. Teto aliwa yalaba o Etiyopiya. Aliwa ogivaha ndina na Filipi mwaha wa namalaleya a nsaka noobajha iithaniwa Filipi. (Dho. 21:8) Namathonga a elabo yele obajha wakoddiha Anamoona a Yehova wapara mabasa ewa oolaleya. Naarive ngaali mwaana miyo ginowubuwela pamadhene wihina makolo aaga yowapara mabasa oomuzimuni moviteya. Wa ale yaali ahima kayonavo ethu yabure. Mbwenye mowukuula yaka ya 1960, anamathonga oniwaddihedha ohiya elabo yehu.

Emudhi yehu nuutamela Wichita, o Kansas, Wistadu Unidu, makolo aaga kiyahile efunelo yewa yokala amisiyonariyu. Aliwa waabala addibilaga abiili: ddibilaga amung’onoya anithaniwa Leslie ni murogolaga apogoya ithaniwa Judy. Iyo aararweene nibaliwe Wetiyopiya. Makolo ehu yodhiveliwa ebaribari ofiyedha onihudhiha omudhivela Yehova ni omulabela ni murima waatene. Miyo gibaddiziwe nganna yaka 13. Nuuvira yaka tharu, makolo aaga otamela o Arequipa, elabo yoPeru.

Yaka ya 1974, nganna yaka 18, Beteli yoPeru ogithana vamodha ni addibila annayi wihina nalabege ninga apiyonero avayeka. Iyo odhowa olaba murudda dhaala womwangoni ohunalaleyiwege. Mutholo ole wovolowelavo olaleya murudda waali athu yanna mweddelo wewene wo kexuwa ni ayimara. Iyo needdesa olenddo ni karo dhaala enithaniwa motorhome, yakala ninga kaxa navahilihu ndina na “Arka.” Miyo gowubuwela dhithu dhapama dhagikavihera omulabihedha Bibiliya wihina gawoonihe athu wi mohulegela Yehova anere omariha ohawa, oredda vamodha ni okwa. (Ovuhu. 21:3, 4) Athu owinjhiva murudda yole othoma okala Anamoona a Yehova.

MUTHOLO GAAKENLIMI WOLABA OSEDE MUNDIYALE

Yaka ya 1977, gidhowaga waredhela elabo yoPeru, Albert Schroeder, aali a Nikuru Nolamulela na Anamoona a Yehova, ogikongomedha oleba petisawu wihina gakaviherege Beteli yosede mundiyale. Teto siyeyo gerilimina. Nuuvira mudhidhi vang’ono, nlabo na 17 a Junho a 1977, miyo obajha okavihera Beteli yo Brooklyn. Miyo gikavihera departamentu ya Limpeza ni ya owomihedha, muwari mwa yaka 4.

Mweri wa Junho yaka ya 1978, miyo omunona Elizabeti Avallone va musonkanoni weriwena o Nova Orleans, oLouisiana. Oliye aaleliwe ni makolo aye yamudhivela Yehova ndala ninga makolo aaga. Elizabeti alaba ninga piyonera a mudhidhi waamutene muwari mwa yaka 4, teto ahikanna efunelo yolabihedha egumi yaye yaatene wi aapare mabasa a mudhidhi wamutene. Mwaha wa yeyo, iyo odidela ononana. Nuuvira mudhidhi, iyo wambela odhivelana ofiyedha otelana nlabo na 20 a Outubro a 1979. Nuwindo iyo wambela olaba oBeteli.

Addibila ni arogola a mulogo wehu woobajha, withaniwa Espanyola Brooklyn, yahinaakela ni murima wewa waamutene. Muwari mwa yakadhene nihikavihera mulogo thaaru, teto addibila a mulogo dhendho yahinaakela nuudhivela. Iyo nnotamalela vanlubale nikavihero enivahile addibila ayo ni nnowatamalela akwihu vamodha ni amudhihu wodhela wasamalela makolo ehu naarive eguuluvanle.

NIKAVIHERAGA OGONJHIHA TIRIBUNALE DHOHIYANA-IYANA

Mweri wa Janeiro yaka ya 1982, gahitikina ni ele yaagipadduwele, miyo othomiwa wihina gikaviherege Departamentu yowoga muladdu yoBeteli. Nuuvira yaka tharu, addibila ogiloba wi gamukose fakulidadi wi gikale adivogadu. Gihudheraga ofakulidade gahihagalala vanlubale, mwaha onona wihina ofuru wowinjhiva enna athu Wistadu Unidu ni dhilabo dhimodha, yanna mwaha Anamoona a Yehova ogonjhiha muladdu dhohiyana-iyana. Muladdu ndho dhathima dhagonjhihiwe ni Anamoona a Yehova dhohudheriwa muturmani.

Yaka ya 1986, nganna yaka 30, miyo othomiwa wihina gikale superitendenti a Departamentu yowoga muladdu. Gahihagalala vanlubale mwaha naarive ngaali muzombwe gowoona wihina addibila o Beteli yogiroromela. Mbwenye gahithuwathuwa vanlubale, mwaha ole kawali mutholo wokweya. Teto kaganonne dhithu dhowinjhiva.

Yaka ya 1988, miyo othomiwa ninga adivogadu. Ethu yowopiha gahonelimimo, sowihina ohudhera ofakulidade wule wanna ononga vang’ono vang’ono wandana gannimina ni Yehova. Mwaha ohudhera wavadhulu, podi omuthukulela muthu okanna efunelo yowiwoona ninga muthu athima, mwaha onona dhithu dhowinjhiva. Mwadhaga Elizabeti aali ninga nvulusi aaga. Mwaha oliye oogikavihera werana dhithu geresimina gihinathi ohudhera ofakulidade wihina gande olibiha wandana waaga ni Yehova. Wahivira mudhidhi wowinjhiva wi gande werana eyo, mbwenye gahanda ohogolowela okanna wandana wapama ni Yehova. Mwaha eyo ogipadduwela, miyo podi owoga wi ethu yathima mwigumini, kahi onona dhithu dhowinjhiva. Mbwenye ethu enanikavihera ovaha thima egumi yehu fuwandana ninnihuna ni Yehova ni wadhivela addibila.

NAKIHEDHAGA NI NIBARELAGA MUTHENGA DHAPAMA

Numala ohudhera ofakulidade, miyo opwasedha osamalela ni obarela muladdu dha Beteli dhahowela nikavihero ni wawakihedha mabasa a Omwene tiribunale dhohiyana-iyana. Mabasa aaga yaali oohagalasa ni oorusa mudhidhi mmodhave, mwaha dhithudha dhanna osadduwa munikuruni mwa Yehova. Motajhiha, omambelelowene nahikanna elemelelo yoloba korowa naavahaga livuru thi livuru. Mbwenye yaka ya 1990, addibila oloba dhoholela ni Departamentu yowoga muladdu wihina esayele wonelamo ethu yavolowelegevo yahere yavahaga malivuru mwamahala. Vasogolova, Anamoona a Yehova wambela wavaha malivuru ehilobile korowa. Ofiyedha peeno, kaninna muladdu wodhela muselu woliva musoko. Athu amodha yubuwela wi masadduwo ala yere watatamulela makathamiho mabasa oolaleya. Mbwenye kahi yeyo yaapadduwile. Okuma yaka ya 1990, numero naathu enamulabela Yehova wenjhedhedheya okunamo. Teto athu peeno podi okanna dhoojha dhomuzimuni ehilinve korowa. Miyo gihudhera wi masadduwo a munikuruni na Yehova enowedda pama, mwaha wa nikavihero naye ni dhoholela nnakelihu wodhela mudhaari oororomeleya ni athotho. — Êxo. 15:2; Mat. 24:45.

Iyo kannagonjhiha muladdu otiribunaleni, mwaha okanna aadivogadu apama. Dila dhowinjhivadhene ethu enathukulela anamathonga onikavihera si dhikalelo dhapama enna Anamoona a Yehova. Gihoona yotajhiha enoniha eyo yaka ya 1998, addibila araru a Nikuru Nolamulela ni amwariwa nuudha woona musonkano wavayeka oKuba. Aliwa yaali oodhivela ni yowoniha wi yowaariha athu aatene. Yotajhiha yewa yaali ethu yathima okwaranya mutugumano bu mutugumano nerilihuna ni anamathonga wihina noonihe wi kannakosa epaddi ya pulitika.

Mbwenye muladdu dhehu dhahitxokotxeliwa pama, nnohowela “wakihedha muthenga dhapama” otiribunale. (Fil. 1:7) Motajhiha, muwari mwa yakadhene anamathonga ooKoreya du Sul ni o Ewuropa kayarumedha ofuru ninnihuna wohukavihera koddo. Mwaha wa yeyo, addibila yakala o Ewuropa okwaranya 18 mil ni addibila ookwaranya 19 mil ooKoreya du Sul yaahivokedhiwa mukambura mwaha okoodda okavihera koddo.

Vano nlabo na 7 a Julho a 2011, Corte Europeia werana yothoma yathima vanlubale wodhela Bayatyan ni Armênia. Aliwa oloba dhilabo dhaatedhene dho Ewuropa wihina ehiye wawaddihedha athu ovolowa mukoddoni. Yothoma emodhave weriwana o Koreya du Sul nlabo na 28 a Junho a 2018. Kadhandeya weriwana dhothoma ndha, yahere addibilihu ehiilibihedha ohivolosiha mukoddoni.

Departamentu enawoga muladdu enafwanyeya o sede mundiyale, ni enafwanyeya Beteli dhili elabo yaatene, enna olaba nuviheya wihina yaakihedhe oneti ninnihuna womwebedha Yehova ni wapara mabasa oolaleya. Sohagalasa vanlubale wawakihedha addibilihu enaharahariwa ni anamathonga. Naarive nihigonjhihe muladdu bu muladdu, ninna wavaha onamoona anamathonga, mamwene ni malogo. (Mat. 10:18) Anamatoriha, amwimeleli aanamathonga, aliba ovuwiha muselu ni athu aatene, enowoona dholebela dhinafwanyeya mudukumentoni mwehu, teto enonivuruwana nasorihaga dholebela dhohiyana-iyana nawogaga muladdu dhehu. Athu enna efunelo enowanona Anamoona a Yehova ni enonona winadhela dhithu enarumedhiwa, teto amodha enothoma okala Anamoona a Yehova.

NNOWUTAMALELANI YEHOVA!

Omakuthulo wa yaka 40, gahikanna oneti wokavihera muselu dhiniwanana ni departamentu enawoga muladdu dhinafwanyeya Beteli dha elabo yaatene. Teto gahikanna oneti woofiya tiribunale dhohiyana-iyana dhathima mwafwanyeya athu athima ni oovuwa. Miyo ginowadhivela ni ginowatikina addibila aatene enalaba ni miyo Departamentu enawoga muladdu yo sede mundiyale ni departamentu enawoga muladdu enafwanyeya elabo yaatene. Ginowanda woona wi giherana dhithu dhowinjhiva mwigumini mwaaga, teto ginna wawakela mareeliho owinjhiva.

Mwadhaga Elizabeti namakavihera oororomeleya ni oodhivela muwari mwa yaka ndha 45, oliye onogikavihera mudhidhi wapama ni wabure. Miyo ginoothabwa omutikina oliye, mwaha naarive agaali muredda onowilibihedha wihina agikavihere.

Egumihu yaatene nihudhera wihina kopolo dhehu ni ogonjhiha kawindha mwaha wa dhithu nnonnihu. Ndala ninga Davidi awogiliye, iyo nnowoga neegi: ‘Yehova si kopolo na nlogo naye.’ (Sal. 28:8) Mohanganyedha, “koddoya sa Yehova.”