Dhilibiwe ni Marku
15 Vigasile, anddimuwa aanamakutha, anamaholela, anamaleba vamodha ni Sinediriyu yaatene, otugumana wihina epangane makalelo oompeleka Yesu wihina apiwe; numala aliwa ommaga ni omuthukulela wa Pilatu. 2 Vano Pilatu omukoha egihina: “We oli mwene amaJudewu?” Yesu omwakula egihina: “Nabwiya di nyu munawoga ndo.” 3 Mbwenye anddimuwa aanamakutha yomwinkedha dhithu dhowinjhiva. 4 Nuwindo Pilatu omukohave dila biili egihina: “We kunaakula ethu? Kasugwa dhithu ndha dhowinjhiva enuwinkedhiwa.” 5 Mbwenye Yesu kaakunle ethu, mwaha wa yeyo Pilatu otikina vanlubale.
6 Yaali elemelelo labo na mathanga, Pilatu omukumiha munyakambura mmodha, yoyo athu yaamulobiwa wihina akumihiwe. 7 Mudhidhi yoole mulobwana dhaala ithaniwa Baraba ni ambava amodha yaahivokedhiwa mukambura mwaha warugunuwela anamathonga ni waapa athu. 8 Nuwindo, muthithi ole waathu omwaddamela Pilatu ni wambela omuloba wihina erena ethu aalemeliye werana. 9 Mwaha wa yeyo Pilatu wakoha egihina: “Munafuna gimutapule Mwene amaJudewu?” 10 Mwaha Pilatu ahinona wihina anddimuwa aanamakutha yampeleke mwaha wa ntxiga. 11 Mbwenye anddimuwa aanamakutha otujela muthithi ole waathu wihina Baraba atapuliwe, ohiya Yesu. 12 Nuwindo, Pilatu wakoha dila yanabili egihina: “Ki ola munamwerinyu Mwene amaJudewu gimwerena ddi?” 13 Dila yanabili aliwa okuwa yegihina: “Akomeliwe vantxikwani!” 14 Mbwenye Pilatu wakoha egihina: “Mwahaya bwaddi? Ethu baani yabure eeriliyena?” Mowindo aliwa okuwave yegihina: “Akomeliwe vantxikwani!” 15 Wihina Pilatu ahagalase muthithi ole waathu, omutapula Baraba ni oruma wihina Yesu uukuthiwe, ni wavahedha wihina apiwe vantxikwani.
16 Atoropa omuthukulela vathaddo va nyumba ele ya musadoro, ni wawithana atoropa aatene. 17 Aliwa omuwariha malaya oofila, oluwa kara ya mwinga omuwariha; 18 ni wambela omunyemula yegihina: “Kiivuluse Mwene amaJudewu!” 19 Ohiya eyo, onvada musolo ni mmiri, omuturela maara ni okokora vamentoni vaye* emuthithimihaga mwamakalelo omunyemula. 20 Numala omunyemula, omurula malaya ale oofila, omuhogolosela dhowara aanniyena. Vano, omuthukulela ode wihina akomeliwe vantxikwani. 21 Ohiya eyo, mulobwana dhaala ithaniwa Simawu ooSireni, babe Alixandere ni Rufu, akumaga omundda oliye ovira murudda yoole. Aliwa omuwaddihedha mulobwana ole othukula ntxikwa nne.*
22 Nuwindo, omuthukulela mburo dhaala onithaniwa Golgota, enatapulela “mburo wa dhigarigadhi.”* 23 Wewule aliwa oxixa onvaha vinyu aataganyihedhiwe ni makupu oowawa yithaniwa mira, mbwenye oliye okoodda omung’wa. 24 Ni omukomela vantxikwani, ogawana dhowara dhaayedha ni ovokedha gari wihina ethome kadda muthu afuniye ohalana. 25 Aali 9 wora amambesi mudhidhi emukomelaga vantxikwani. 26 Vadhulu vamusolo waye okomelavo tabwa, walebavo madhu yamwinkedha oliye yegihina: “Mwene amaJudewu.” 27 Ohiya yeyove, dhipaddi dhaye dhabilidhene wahikomeliwa ambava abiili, mmodha moono waye woojha mmodha moono waye weemara. 28* —— 29 Athu yavira vevale yomuruwana ni yodhuudha musolo yegihina: “Eya! We wawogesa wegi ginoobwanyula tempulu givenyihedhe malabo mararu, 30 kiivuluse-to weeka, okite vantxikwani nvo.”* 31 Nimakalelo mamodhave, anddimuwa aanamakutha vamodha ni anamaleba yomunyemula ni yowoga vikaleliwa yegihina: “Athu amodha owanda wavulusa; mbwenye oliye kananda wivulusa! 32 Akala oli Kiristu, Mwene oWizarayeli, okite vantxikwani nvo,* wihina iyo nuwoone ni nuurumedhe.” Nimakalelo mamodhave, ni ambavaya yakomeliwe mmambalo mwaaye yomuruwana.
33 Obajha 12 ofiyedha 15 elabo yaatene okalawo yiihi. 34 Mudhidhi yoole wa 15 wora Yesu okuwa ni ndhu nootama egihina: “Eli, Eli, lama sabakitani?” enatapulela “Mulugwaga, Mulugwaga, mwahaya bwaddi mudhe muginyanyalege?” 35 Athu amodha yaali vevale nuwiwa, aliwa owoga yegihina: “Kamwiweni! Mulobwana ola anamwithana Eliyaji.” 36 Mohilegela, mmodha waaliwa othamaga, othukula esponja obwiniha nvinyuni oowawa, opulela ommirini, onvahedha wihina amung’we, egihina: “Kamuhiyeni! Nnafuna nimone akala Eliyaji onodha anvenyihevo.” 37 Mbwenye, Yesu okuwa ni ndhu nootama nuwindo oliye okwa. 38 Mudhidhi yoole kurtina namutempulu otaala wambela odhulu ofiyedha vati. 39 Vano kapitawu aatoropa vamodha naale yaali vevale, nuwoona dhithu dhereye mudhidhi yoole, oliye owoga egihina: “Mwebaribarene mulobwana ola aali Mwaana a Mulugu.”
40 Vevale yahikalavo ahiyana yamusugwa wolapelawene; vaakaleliwa, ahikalavo Mariya Madalena, Mariya amaye Tiyago, Mung’onoya, Jozeji ni Salome. 41 Ahiyana ala yonvelela ni yomukavihera agaali oGalileya. Ni yahikalavo ahiyana owinjhiva yadhowile nuliye oJeruzale.
42 Mbwenye woona wihina nduwa naali nahinamothelemo ni naali labo Nomwegeredha Sabadu,* mwaha labo noharela vaakale Sabadu, 43 ofiya mulobwana dhaala ithaniwa Juze oArimateya aali mmodha athabwa orihiwa Otiribunale ya maJudewu, nuliyeya oojheha Omwene wa Mulugu. Oliye omaga murima, odhowa wa Pilatu ni oloba muruthu wa Yesu. 44 Mbwenye, Pilatu ofunaga onona akala mwebaribarene Yesu ohukwa, ni omwithana kapitawu aatoropa, omukoha akala Yesu ohukwa. 45 Vano nuwaddeliwa ebaribari ni kapitawu aatoropa, othukula muruthu ole onvahedhela Juze. 46 Juze ogula guwo ya linyu ya thima ni ovenyihavo muruthu ole vantxikwani; nuumala ovidigelela muruthu ole ni guwo ya linyu ya thima nuwindo odhowa okoya mmahame* mwaaye aatibiliye vanibweni. Nuumala, oliye ofugawo omulagowa nnibwe. 47 Vano Mariya Madalena ni Mariya amaye Jozeji, ohala osugwaga mburo vaavitiwe muruthu wa Yesu.