Dhilibiwe ni Marku

16 Sabadu nuuvira, Mariya Madalena, Mariya amaye Tiyago ni Salome odhowa wagula makura oonukwela wihina yadholihe muruthu wa Yesu. 2 Labo noobajha na sumana, mambeseene, nduwa nukuma aliwa odhowa omahame.* 3 Wambela okohana vikaleliwa yegihina: “Anaanikavihere ovenyihawo nibwena baani?” 4 Mbwenye nuwavenyiha mento, woona wihina nibwe nne naarive nigaali ninlubale nahisusihiwawo. 5 Vano aliwa nuturumela mmahame mune, omoona muzombwe dhaala agakaratile epaddi ya moono woojha, agawanre malaya oolapa ni ootxena, aliwa otikina vanlubale. 6 Mbwenye oliye wawaddela egihina: “Kamoove. Mwaha gihinona wihina munanveda Yesu Munazarenu, oliye kali vevala. Ohuvenyihiwa muukwani. Kasugwani mburo vapwehiwiye. 7 Vano kadhowani mwawaddele anamaharaye ni Peduru mwegihina: ‘Oliye ohusogola anadhowa oGalileya. Munere omoona wengo ninga oliye aawogiliye.’” 8 Nuwindo, aliwa okuma omahame wule, othawa egurumelaga ni egaali oohagalalene. Kiyamwaddenle muthu mwaha aliwa yeera woova.*