Dhilibiwe ni Marku
3 Dila yanabili Yesu ovolowa musinagoga, mwemune onfwanya mulobwana dhaala aanna nlada noragala. 2 Nuwindo, Afarizewu wambela omusugwera pamadhene wihina emoone akala eere onvulumusa mulobwana ole labo na Sabadu, yamala emwinkedhe. 3 Vano oliye owoga ni mulobwana ole aanna nlada noragala egihina: “Kavenya, kasusedha vaari vala.” 4 Voharela oliye wakoha egihina: “Enowenyeya labo na Sabadu werana opama obe obure, ovulusa egumi obe opa?” Mbwenye aliwa kiyamwakunle ethu. 5 Nuwindo Yesu wasugwa athu aatene yaamwapenle, otikina vanlubale ni okala owuukuweene mwaha wowumma murima wewa, vano oliye owoga ni mulobwana ole egihina: “Katapula nlada naawo.” Oliye nutapula nlada naye, woogowa. 6 Vohilegela Afarizewu ovenya vamodha ni anamahara a Erodi obajha ompanganela Yesu wihina empe.
7 Mbwenye Yesu odhowa muniya vamodha ni anamahara aye, vano muthithi waathu woGalileya ni woJudeya omuhara. 8 Nuwiwa dhithu dhowinjhiva oliye eeriyena, muthithi waathu wadhela oJeruzale oIdumeya ni epaddi emodha yo Jordawu sere-sere yoTiru ni yoSidoni, odhowa ogumana nuliye. 9 Oliye owoga ni anamahara aye wihina esayele mwanddeya wayene wihina muthithi ole waathu wahimpinyaminye. 10 Woona wihina oliye owavulumusa athu owinjhiva, aatene yaale yanna oredda yomurijha Yesu wihina emudahinye. 11 Vano ademoniyu* yamoona, yomukokorela ni yokuwa yegihina: “We oli Mwaana a Mulugu.” 12 Dila dhowinjhivadhene oliye owakongomedha wihina ehimulaleye.
13 Oliye ogwela vamwangoni ni wawithana athu oliye aafuniye, vano aliwa odhowa valiye. 14 Wegeredha* nikuru naathu 12 ni waavaha ndina naarumiwi, ale yeeddege nuliye ni afuniye waruma wihina elaleye, 15 ni kopolo dhowawigarana ademoniyu.
16 Muwari mwa nikuru nenna 12 eegeredhiye* ahikalavo Simawu anvahiliye ndina na Peduru, 17 Tiyago mwaana a Zebedewu ni Juwawu ddibile Tiyago (aabiilene ala biyala aavahiliye ndina na Bowanerje, nnatapulela “ahima a dari”), 18 Andere, Filipi, Bartolomewu, Matewuji, Tome, Tiyago mwaana Alfewu, Tadewu, Simawu Mukananita,* 19 ni Judasi Iskariyoti vasogolova aamugulihe Yesu.
Vano oliye odhowa vade dhaala, 20 voharela muthithi ole waathu otugumanave, ofiyedha oliye ohukanna mudhidhi woojha. 21 Amudhaaye nunona ethu yapadduwa aliwa omaruwa wihina yamwihidde, mwaha yowoga yegihina: “Oliye ohusavuwa.” 22 Ni anamaleba yadhela oJeruzale yowoga yegihina: “Oliye ohukanna Belzebu* ni anawigara ademoniyu ni kopolo dha namathonga aademoniyu.” 23 Numala wawithana, owoga naaliwa alabihedhaga dholaddaniha: “Dhinandeya addi Saddana omwigara Saddana mukwaye? 24 Akala omwene onogawanyeya, omwene yoyo kunanda otikitereya, 25 teto akala murala onogawanyeya, murala yoyo kunakala wowiwanana. 26 Vano akala Saddana ohinyanyuwela yeka ni ohugawanyeya, kanaawedhe okala ootikitereyene, mbwenye anna ofiya omakuthulo waye. 27 Kaavo ananda ofiya vaade va mulobwana akopolo wihina amwiiyele dhoreela dhaye wula ahirajhihe ommaga mulobwana ole akopolo. Vano eerana ndo aneere wanda omwiiyela. 28 Miyo ginowuwaddelani ebaribari: Mwa dhithu dhaatedhene athu enere oleveleliwa, kinapwathiwa yotheega baani yeriliwana. 29 Mowindo, ole anaawoge obure muzimu wotxena kanaaleveleliwe, mbwenye yotheega yaye samukalakala.” 30 Yesu ahiwoga eyo mwaha aliwa yawoga yegihina: “Oliye ohukanna muzimu wabure.”
31 Vano ofiya amamaye naaddibile, okala ode, omuruma muthu wihina amwithane. 32 Woona wihina wahidhaalavo muthithi waathu wamwapele, aliwa owoga yegihina: “Nabwiyani! Amaminyu naaddibilinyu eli ode wula enusayelani nyuwene.” 33 Mbwenye oliye wakula egihina: “Ammaga naaddibilaga baani?” 34 Nuwindo wasugwa athu yakiratile valiye ni owoga egihina: “Ammaga naaddibilaga biyala! 35 Bumwahaya ole anerana efunelo ya Mulugu, oyo di ddibilaga, di murogolaga ni bammaga.”