Dhilibiwe ni Marku
11 Yaddamelaga murudda woJeruzale yahifiya oBetifaji ni oBetaniya, vamwangoni Woolivera, vano Yesu waruma anamahara aye abiili, 2 wawaddela egihina: “Mudhowe murudda ndhe dhili osogolo, mwafiya munere onfwanya mwanabuuru agamageleliwe ahinagweliwege ni muthu. Mmutapule, mmudhena wuno. 3 Muthu ukohani egi: ‘Munamutapulela ddi?’ Mmwakule mwegihina: ‘Nabwiya dinamuhowela, ndo aneere wuhiyani omudhana.’” 4 Aliwa omaruwa ni onfwanya mwanabuuru agamageleliwe mudila waddamela vamusiwoni, nuwindo aliwa omutapula. 5 Mbwenye amodha yaali vevale wakoha yegihina: “Eyoya ddi munerinyu, munamutapulela ddi mwanabuuru oyo?” 6 Anamahara aye wawaddela yeele Yesu aawaddenliye, aliwa wahiya omudhowagana.
7 Aliwa omudhowana mwanabuuru ole waali Yesu, wathukula malayiwa watadela vadhuluva nuwindo oliye okarativo. 8 Ohiya eyo, athu owinjhiva yowatadela malayiwa murampani, mbwenye athu amodha yowagwadda matadu amukokolani. 9 Athu amodha yaali osogolo waye naaleya yamuhara yokuwa yegihina: “Kamwerena, nivuluseni! Oothithimihiwa duule anadha ni ndina na Yehova!* 10 Woothithimihiwa buuMwene onaadhe ni ndina na baabihu Davidi! Kamwerena nivuluseni nyu munakala odhulu!” 11 Oliye nufiya oJeruzale, ovolowa mutempulu osugwa dhithu dhaatedhene dhaali mwemune, mbwenye woona wihina vati vahiriba, omaruwa naanamahara aye odhowaga oBetaniya.
12 Labo noharela ekumaga oBetaniya oliye ovoliwa dala. 13 Agaali wolapelawene, oliye woona muthanko wa figu wanna matakuru, oliye waddamela wihina oone akala mwahikala dhowima. Mbwenye kafwannyemo ethu yahili matakuru baahi, mwaha kuwaali mudhidhi wobala figu. 14 Vano oliye owoga egihina: “Kaavo muthu anahogolowele ojha yowima yawo.” Mbwenye anamahara aye yaali vevale envuruwanaga.
15 Nuwindo aliwa ofiya oJeruzale. Yesu ovolowa mutempulu wawigaramo athu aatene yaale yaguliha ni yagula mutempulu, waabidhula meza aanamakakaniha korowa ni mpaddo dhaathu yaguliha kangayiwa; 16 kaamwihile newene muthu mmodha othukula ethu ya mutempulu. 17 Ni owahudhiha egihina: “Kadhilebiwe: ‘Wihina nyumbaga enithaniwege nyumba ya malobelo’? Mbwenye nyu muhusaddula okala nyumba yaambava.” 18 Anddimuwa aanamakutha ni anamaleba nuwiwa eyo wambela osayela makalelo oompa, mwaha aliwa yoomoova, teto muthithi waatene wotikina makalelo aye oohudhiha.
19 Vati nuuriba, aliwa okumamo musidadi mune. 20 Mbwenye mambesi eviraga murudda yoole waali muthanko wa figu, woona wihina wahumma waatene ni musisidha. 21 Peduru wubuwela ni owoga egihina: “Rabi, kasugwani muthanko ole wa figu muulumenlinyu ohumma.” 22 Yesu omwakula egihina: “Mmuroromele Mulugu. 23 Miyo ginowuwaddelani ebaribari: ‘Anawoge ni mwango ola egihina kavenya, wivokedhe muniya,’ ni ahanganyedha mmurimani mwaaye mbwenye akanna nroromelo niile awogiliye wihina yereye, mwebaribarene enere wereya. 24 Bumwahaya nguwaddelani gegihina: Dhaatedhene munalobinyu mwaalobelaga muroromelaga wihina muhakela, munere wakela. 25 Mwakala owimelene mulobelaga, mwalevelele ale enuthegelani, wihina Babinyu ali odhulu, uleveleleni dhoothega dhenyu.” 26 * ——
27 Dila yanabiili aliwa ofiya oJeruzale. Mudhidhi eeddaga mutempulu, anddimuwa aanamakutha, anamaleba ni anamaholela ofiya 28 aliwa omukoha yegihina: “Onerana dhithu ndha ni kopolo dhawani? Ki uvahile owedha wowerana dhithu ndha baani?” 29 Yesu wawakula egihina: “Ni miyowa ginere wukohani ethu modha. Mwagakula ginere wuwaddelani wego ginadhimina kopolo ndha. 30 Obaddiziwa wa Juwawu waadhele odhulu obe waathu? Kagaakuleni.” 31 Mbwenye aliwa wambela onong’ona vikaleliwa yegihina: “Neera: ‘Wodhulu,’ oliye aneere onikoha: ‘Kito muhinamurumedhela ddi oliye?’ 32 Neera: ‘Onakumela waathu’?” Nnowova muthithi ola waathu oli vala mwaha enamoona Juwawu ninga namavuhulela. 33 Nuwindo aliwa omwakula Yesu yegihina: “Iyo kannonne.” Vano Yesu wawakula egihina: “Ni miyoya kaginuwaddelani muthu anagivaha owedha wowerana dhithu ndha.”