Wileri dholebela — Bibliya onahudhiha ddi?

MUSOLO 1

MULUGU BAANI?

(Jó 34:10-12) Mowindo, nyu athu oononelamo, mugivuruwane: Mulugu eebaribari kaneerana dhithu dhabure, Akopolo Dhatene kanadha eerana dhithu dhovirigana! ¹¹ Oliye anamuliva muthu mwaha dhowera dhaye, anamwerela kadda muthu dhinafwaneliye mwaha dhowera dhaye. ¹² Mwebaribarene Mulugu kaneerana ethu yabure, Akopolo Dhatene kanasaddula wogowa waye.

(Salmos 37:9-11) Mwaha athu abure enere otolosiwa, mbwenye ale enamujheha Yehova enere wakela elabo yavati. ¹⁰ Kavinaavire malabo, athu abure kidha ekalawo, Wasugwa vakalesiwa, Kudha wawona. ¹¹ Mbwenye athu oopwaseya enere wakela elabo yavati, Enodha ehagalale ni murenddele wahinamala.

(1 Pedro 5:7) Nvokereni Mulugu dhosimwela dhenyu, mwaha wi oliye annupwathani.

(Atos 17:11) Ala yahikanna murima wapama ohiyana ni akudda Tessalonika, yahaawakela madhu a Mulugu ni efunelo yatene, yoowileri Dholebela malabo mateene, wihina yoone okala dhithu yahudhihiwiwa dhaali dhebaribari.

MUSOLO 2

BIBLIYA LIVURU NNADHELA WA MULUGU

(2 Timóteo 3:16) Dholebela dhatedhene dhinadha wa Mulugu dhihikanna mpurelo wohudhiha, wosumulula, wowogola dhego, wolaga mowogowa,

(Isaías 48:17) Onawoga di Yehova, Namobola awo, Ootxena oWizarayeli: ‘Miyo Yehova, gili Mulugu awo, Ole anuhudhiha ele eri yapama, Ole anuweddiha mudila munafuniwe weddagamo.

(Isaías 44:27–45:2) Ole anawoga ni mwihinjhe dhoddiiha eraga: ‘Muwelele! Ginere wummiha mwihinjhe dhawo dhatedhene’, ²⁸ Ole anawoga ni Siru eraga: ‘Oliye di namakumbuza aaga Ni anere werana efunelo yaga’, Ole anawoga ni Jeruzale eraga: ‘Anere ovenyihedhiwa’, anawoga ni Tempulu egi: ‘Alisersi ambeliwe.’”

45 Yehova anawoga ni muthikitheliwi aye, Siru, Ginamwihiddelimi nlada noojha Wi aasile malogo mateene Ni amothihe malogo ni masupadda amamwene, Wi afugule musiwo dhewa dhotandanyihedha, Mowindo musiwodha kadhinafugiwe: ² ‘Miyo ginere wusogolela Ginere owomihedha dila dhotibeya. Ginere ogujhula musiwo dhewa dha mujhila Ginere ogujhula kunya dha mujhila.

(Números 23:19) Mulugu kahi muthu anoota, Kahi ninga muthu anasaddula mubuwelo waye. Oliye apaganya ethu kaneerana? Awoga ethu kaneerana?

(Hebreus 4:12) Mwaha wi madhu a Mulugu ehikanna egumi, ehikanna kopolo, enowirwa okwaranya supadda nowirwa wula ni wula, enovolowa ofiyedha ogawa egumi ni emuthu, enogawa mune munagumana makuva ni muwari mwa makuva, enowoneyiha mubuwelo ni dhofuna dha murima.

MUSOLO 3

MULUGU AAPADDUSELE DDI ATHU NI ELABO YAVATI?

(Tiago 1:13-15) Muthu akala vari va yoweha, ahiwoge egi: ‘Ginna weehiwa ni Mulugu.’ Ni dhego dhabure, Mulugu kanehiwa, newene oliye kanamweha muthu. ¹⁴ Mbwenye, kadda muthu aneehiwa ni munigwa wa murima mwaye. ¹⁵ Vano, munigwa wathabwa, winodhana yothega; vano yothega, yakwanela enodhana okwa.

(Génesis 3:1-5) Nowaya yaali yooxaga wakwaranya anenyama atene amukokolani Yehova Mulugu aapaddusiliye. Mowindala, nowa ele omukoha mwihiyana yegi: ‘Ebaribarene Mulugu ere wi kamujhege dhowima dhatedhene dhili mmunddani muna?’ ² Mwihiyana waakula: ‘Dhowima dhatedhene dha muthanko dhili mmunddani muna iyo podi ojhaga. ³ Mbwenye, dhowima wa muthanko oli vari va mundda, Mulugu awogile wi ‘kamujhe, newene kamuhidde, wi munaakwe.’’ ⁴ Nowa omwakula mwihiyana ole wera: ‘Mwebaribarene kamunakwa. ⁵ Mwaha wi Mulugu ohunona wi, nlabo munaajhinyu, mento enyu enere ofuguwa ni munokala ninga Mulugu, munonege yapama ni yabure.’

(Romanos 5:12) Mwaha wa yothega ya muthu mmodha, yothega ehivolowa mwilaboni ni okwa ohuvolowa mwaha wa yothega. Nimukalelo mmodhave okwa ohafwanya athu atene mwaha wi atene ehithega — .

(Provérbios 27:11) Mwanaga okale athotho, ohagalalihe murima waga, wihina gimwakule ole onaginyemula.

(Daniel 2:44) ‘Malabo amamwene ala, Mulugu oodhulu onere otikitera omwene ohunadha ogujhuliwa. Omwene oyo kunaakakaniwege. Onere ogujhula ni omariha omwene watene wa mwilaboni, Omwene wa Mulugu baahi bunathongege malabo amatene,

(João 3:16) ‘Mwaha Mulugu ohudhivela vanlubale elabo, omuleva mwanaye mmodha, wi alene aatene enaamuroromele yahitolosiwe, mbwenye ekanne egumi yohimala.

(João 17:3) Wihina ekanne egumi yohimala, yunoneni nyu, Mulugu mmodha eebaribari, nuule mmurumilinyu, Yesu Kiristu.

(Isaías 32:18) Athu aaga enere okala mburo wamurenddele, Mburo woobareleya ni womaleya, wohinyonyiwa.

(Miqueias 4:4) Kadda muthu wa aliwa enerege okirati musiddo mwa muthanko mwa videra ni wafigera, Kavo muthu onathusege, Mwaha Yehova anyakoddo diwogile.

(Isaías 65:21-24) Aliwa enerege omaga nyumba dhewa wi ekalegemo; Enerege odhalela mvidera dhewa wi ejhege dhowimmadha. ²² Aliwa kinamagege nyumba vano muthuyo anoodha okalagamo, Newene kinadhalege vano muthuyo anoodha ajha. Mwaha malabo yayo athu a nlogo naaga enakalege ninga malabo a muthanko, Malogo aaga gasakulimi enerege ofwanya mpurelo wa mabasa yapariwa ni mada ewa. ²³ Kinaparege mabasa ebewene, Newene kinabalege anamwani wi yonege goyi, Mwaha aliwa ni aniwa Nlogo norelihiwa ni Yehova. ²⁴ Ehinambele withana, ginerege wawakula; Ehinamarihe owoga, miyo ginerege wavaha enafuniiwa.

(Apocalipse 11:18) Nuwindo, malogo otakaleliwa, nyu onyanyuwa, vowi wakwanele mudhidhi wajhehiwesa wihina anookwa etorihiwe ni yakale mareliho adharinyu, anamavuhulelinyu, naaleya eli oweela ni ale enathithimiha ndina nenyu, apogo ni ahima, wi mwatolose atene enanonga elabo yavati.’

(Isaías 11:6-9) Mwiijhi ni mwanana aninbila enakalege vamodha; Nyarugwe ni mbuzi enagonege vamodha; Mwanag’ombe, ni poddogoma enakalege vamodha; Vano, mwanamwihima dinaakukulege. ⁷ Ng’ombe ni nikurukumwa enajhege vamodha, Anana ag’ombe ni anikurukumwa enagonege vamodha. Poddogoma anajhege mpodda ninga ng’ombe. ⁸ Mwana anerege waredha vamwibani vanamarawe, Mwana anerege ohela nlada naye muwano mwa nowa yowopiha ⁹ Vamwangoni vaga kavinereyege dhithu dhabure Newene dhotakala, Mwaha wi mwilaboni munere odhaala enonelo ya Yehova, Ninga manjhe enadhaala muniya.

(Isaías 65:25) Mwiijhi onagonege vamodha nninbila, Poddogoma anajhege mpodda ninga ng’ombe, Vano nowa enajhege nthubi. Vamwangoni vaaga kavinereyege dhithu dhabure Newene dhotakala’, onawoga di Yehova.

(João 5:28, 29) Muhitikine ni ndha, mwaha wi onere ofiya mudhidhi atene eli mmahame ammubuweloni enere wiwa ndhu naye ni enere ovenya: ale yerilena dhego dhapama, enere ovenyihiwa ekalena egumi; ale yerilena dhego dhabure enere ovenyihiwa wihina ethongiwe.

MUSOLO 4

YESU KIRISTU BAANI?

(João 3:13) Ohiya eyo kavo muthu ogwenle odhulu, omuhiya ole adhele odhulu, Mwana a Muthu.

(João 6:38) Gidhele odhulu, kagidhele werana efunelo yaga, mbwenye efunelo ya yole agirumile.

(João 6:62) Yapadduwe ddi mwahere mmona Mwana Muthu ahogolowelaga waliye ahinadhe elabo yavati?

(João 17:4, 5) Guhuthithimihani elabo yavati ni gihamariha mabasa mugilobilinyu wi gaapare. ⁵ Vano, babani, githithimiheni vamentoni venyu ni nthithimiho gannimina ngali ni nyu gihinadhe elabo yavati

(João 14:28) Muhiwa giwogilimi: ‘Miyo ginodhowa ni ginere ohogolowa’. Mwahagidhivelege mwere ohagalala mwaha wi ginadhowa wa Babani, woona wi Babani di munlubale ogipitha miyo.

(Mateus 9:35, 36) Vano Yesu wambela weedda luwani ni muruddadha dhatedhene, ahudhihaga musinagoga mwewa, alaleyaga muthenga wapama wa Omwene, aavulumusaga athu atene yanna oredda wohiyana-iyana. ³⁶ Oniliye muthithi waathu, wambela waweddela thagaraga, mwaha yaali owuukuwene ni yeedda bure-bure ninga mambila ehinna namakukula.

(Filipenses 2:8) Ohiya eyo, adhiliye veelaboni ninga muthu, ahiyeviha ni okala owiwelela ofiyedha opiwa, hee, okwa vantxikwani.

MUSOLO 5

YOWOBOLA — NVAHO MUNLUBALE WA MULUGU

(Mateus 20:28) Woona ninga Mwaana Muthu kadhele olabiwa, mbwenye adhele olaba ni ovelela egumi yaye wi awobole anamwinjhi.’

(Romanos 5:19) Mwaha wa yothega ya muthu mmodha baahi athu atene ehithega, mwa mukalelo mmodhave, mwaha wa wiwelela wa muthu mmodha, athu owinjhiva enowooniwa okala owogowa.

(Romanos 3:23, 24) Atene ehithega mbwenye kinafiyedha nthithimiho na Mulugu, ²⁴ ni eli ninga nvaho enithaniwiwa owogowa mwaha opama waye nihinafwanelihu, wodhela woboliwa ni yobolo evahiwe ni Yesu Kiristu.

(Lucas 22:19) Vano oliye othukula mukaathe, omutamalela Mulugu, ogwaddanya ni wagawela, eraga: ‘Ola entapulela mwiili waga, munavahiwinyu. Mudidele werana ndala mugubuwelaga miyo.’

MUSOLO 6

ENANIPADDUWELA DDI NAKWA?

(Eclesiastes 9:5, 6) Athu agumi ehinona wi enodha ekwe, mbwenye anookwa kinonne ethu, kinna yowakela, mwaha kinubuweliwa. ⁶ Ethu emodhaya sowi: odhivela wewa, ntxiga newa, ajhe yewa ehimala, aliwa kinawoona mabasa enapariwa veelaboni yavati.

(Eclesiastes 9:10) Dhatedhene onafuniwe opara ni mada awo, werena ni kopolo dhawo dhatedhene, mwaha wi Omahame mburo onayiwe kawili mabasa, kawinakungiwa porogarama, kawili enonelo, newene thotho.

(Génesis 3:19) Onere ovihedhiwa wi okanne yojha, ofiyera ohogolowela onthubini, wula wipaddusiwiwe; woona wi oli nthubi, onthubini onere ohogolowelawo.’

(1 João 4:8) Ole ahinna odhivela, kamunonne Mulugu, mwaha Mulugu odhivela.

MUSOLO 7

WINERE OKALAWO OVENYIHIWA WANOOKWA!

(2 Coríntios 1:3, 4) Othithimihiwa di Mulugu Babi a Nabuya Yesu Kiristu, Babi anthebwa ni Mulugu a olibiha watene, ⁴ onanitodola mmakathamihoni mwehu mwatemwene, wi, ni otodoliwa nnakelihu wa Mulugu, nande watodola athu amodha enafwanyiwa makathamiho bi makathamiho.

(João 11:41, 42) Vano, athu yahivenyihavo nibwe nne. Yesu ahisugwaga odhulu wera: ‘Babani, ginowutamalelani mwaha wi muhigivuruwana. ⁴² Mwebaribarene, gihinona wi munogivuruwanesa, mbwenye giwogile mwaha anamwinjhi egapeele, wi ekanne ebaribari wi nyu digirumile.’

(Isaías 40:26) ‘Kavenyihedheni mento enyu odhulu moone. Apaddusile dhego ndha dhili odhulu baani? Duule onakumiha nikurunene ninga anyakoddo; Dhatedhene onowithanana ndina. Mwaha wa owedha winlubale ni kopolo dhotikiniha onniyena, Kawo newene emodha enajhomba.

(Atos 24:15) Miyo gihikanna yojhehedha wa Mulugu, yojhehedha emodhave athu alena enniwana, yowi winoodha wikale ovenyihiwa waathu owogowa murima ni ohogowa murima.

(Isaías 25:8) Oliye onere omariha okwa ni mukalakala, Nabuya Yehova munlubale onere ofufutha mitori dhatedhene mwintoni mwewa. Onere omariha goyi yatene enona adhari aye, mwinyene Yehova diwogile.

MUSOLO 8

OMWENE WA MULUGU DDI?

(Mateus 6:9-13) ‘Mowindo, mulobelege mwigihina: ‘Babihu muli odhulu, ndina nenyu ntxenihiwe. ¹⁰ Omwene wenyu odhe. Efunelo yenyu yereye, odhulu ni elabo yavati. ¹¹ Munivahe yojha ya labo na peeno; ¹² Nleveleleni dhothega dhehu, ninga iyo nnalevelelihu athu amodha enanithegela. ¹³ Kamunihiye omorela muwehiwani, mbwenye munobole mwa dhotakala.’

(Apocalipse 14:1) Nuwindo, gihoona Nimbila nigimenle omwangoni wo siyawu, agaali ni athu owakwana 144 000, yanna ndina naye ni ndina na Babe nigalebiwe vakoveni.

(Apocalipse 14:4) Ala bi athu ehiitakalihe nahiyana; kinagonege ni mwihiyana. Baala enahara Nimbila mburo bu mburo nnayiwa. Eguliwe elabo yavati ninga namulibu a Mulugu ni a Ninbila

(Apocalipse 12:7-10) Yahitatamuliwa koddo odhulu: Migeli nangero aye yahiwana nnowa, nowa ele nangero aye yowaniha koddo, ⁸ Nowa yahigonjihiwa,mowindo kiyanna mburo odhulu ⁹ Vano, nowa ele enddimuwa ovokedhiwa elabo yavati, nowa erajhi, enithaniwa Saddana Ddiyabo, onaholosa athu aatene eelabo yavati. Oliye ohuvokedhiwa elabo yavati, vamodha ni angero aye.¹⁰ Gahiwa ndhu nootaama nadhela odhulu neraga: ‘Vano, ohakwanela ovulusiwa, kopolo ni Omwene wa Mulugu ehu, ni owedha wa Kiristu, mwaha ohuvokedhiwa elabo yavati ole anawinkedhesa addibilihu, anawinkedha mutana ni mahiyu, vamentoni va Mulugu ehu!

(Salmos 37:10) Kavinaavire malabo, athu abure kidha ekalawo, wasugwa vakalesiwa, kudha wawona.

MUSOLO 9

ELABO ELA ENODHA EMALE?

(Hebreus 10:24, 25) Nubuwelanege mmodha ni mukwaye wi nilibihane modhivela ni mabasa apama, ²⁵ kanihiye otugumana, ninga emanya yaathu amodha, mbwenye nlibihanege mmodha nimukwaye, thabwathabwa noonaga wi labo ninna ofiya.

MUSOLO 10

BIBLIYA ONASORIHA DDI WODHELA ANGERO

(Génesis 6:2) anamwani a Mulugu eebaribari, woona wi anahiyana aathu yaali oowoma. Aliwa odha, watela ale yaasakunliwa.

(2 Coríntios 2:11) wihina nnadha nigonjhihiwe ni Saddana, woona wi nihinona murako dhaye.

(Deuteronómio 18:10, 11) Vaari venyu kahi okalavo muthu onamakutha mukutho mwanaye mwanamwihiyana obe mwanamulobwana, kahi okalavo muthu onoobeza makanga, naari muthu amera, onaveda dhowipiini, mukwiri, ¹¹ onaakomela athu nimurombwe, onawoga ni muzimu dhabure, namuugu, obe onawoga ni anookwa.

(Provérbios 18:10) Ndina na Yehova pandda yovadda. Athu owogowa murima enoothamagela muwarimwa okala oobareleyene.

(Tiago 4:7, 8) Mowindala, mmwiwelelege Mulugu onawogiwe, mbwenye, mmukake Saddana, oliye onere wuthawani. ⁸ Mmwaddamele Mulugu, oliye anere wuwaddamelani. Musuwe mada enyu, nyu anamathega, ni mutxenihe murima dhenyu, nyu aliba wanganyedha.

MUSOLO 11

GOYI ETHABWELE DDI?

(2 Pedro 3:9, 10) Yehova kahi muthu onathigariga wodhela ele opaganyiye, ninga amodha enubuweliwa, mbwenye oliye dokurumuwa murima ni nyu, mwaha kananfunana muthu ogujhuliwa, mbwenye onafuna athu atene ethwaruwe. ¹⁰ Nlabo na Yehova nnadha nifiya ninga mbava, labo nenno, odhulu winere ovira ninga oruma wa ethu enavira, mwaha wa oviha, dhego dhatedhene dhinodha dhinyowe, vano elabo ya vati ni dhatedhene dhilimo dhinaakale vaddeddereni vene.

(1 Coríntios 10:13) Dhoweha dhatedhene dhinufwanyani dhinowafwanya athu atene. Mbwenye Mulugu dororomeleya ni kanuhiyeni wehiwa ni dhithu muhinandinyu ovilelana, mbwenye yadha yowehaya oliye anere wukaviherani wihina mwakwanihe.

MUSOLO 12

ONANDE ADDI WANDANA NI MULUGU?

(Salmos 55:22) Onvokere Yehova mutholo wawo, Oliye onere wukavihera. Kadha amwihiya muthu apama omorela mukwegweni.

(Salmos 15:1-5) Babani Yehova baani onaakale muleddo muddammwani mweenyu? Onaakale mwanamurala vamwangoni venyu wotxena baani? ² Ole onedda oororomeleyene, Onerana dhego dhapama, Onawoga ebaribari mmurimani mwaye. ³ Kanalabihedha nlumi naye wi oote, Kanamwerela obure mwanddamanaye, Ni kanaanyemula akwaye. ⁴ Oliye onowakodda ale enna murima wootakala, Mbwenye onowathithimiha ale enamova Yehova. Kanahiya werana ele olibeliye, naarive aganonne wi enere omutotela makathamiho. ⁵ Kanafiyariha korowa ni juri, Ni kaneenya okunyariwa ni muthu di muthu. Onerana ndo kadha oona goyi.

MUSOLO 13

NIVAHE THIMA EGUMI NIVAHIWIHU

(Salmos 36:9) Nyu muri ntxela na egumi; Mwaha wowara wenyu nnowedha woona wara.

(1 João 3:15) Yoole onamwidda ddibile namapa, nyu muhunona pamadhene wi kaavo namapa onaakele egumi yohimala.

(Êxodo 21:22, 23) “Akala alobwana enowana emudugurula mwihiyana onna wari, vano oliye abaala mwaha woduguruliwa, mbwenye ehipadduwavo yego yowopiha, ole omudugurule onodha amulive korowa muliba mwihiyana; ninga munathongele anamawoga muladdu. ²³ Mbwenye yapadduwavo yego yowopiha, vinodha vikale oliva egumi ni egumi,

(Atos 15:28, 29) Wodhela muneba wawela ni iyo, nihoona wi kahiyo yapama wunyemelihani mutholo mmodha ohiya wiwelela magano ala oofuneya: ²⁹ mudidele okoodda ojha dhego dhikuthiwena mukutho dhikwamuthu, kamujhe nikame, obe nyama ya mwanenyama oosothokoliwa, kahiyo weragana mararuwo. Mwiwelelaga dhatedhene dhendha, munere okanna egumi yapama. Akelani malojhelo ehu!’’

MUSOLO 14

ONANDE ADDI OKANNA MURALA WOHAGALASA

(Efésios 5:25-29) Mulobwana ootela, kuhiye omudhivela mwariyo, ninga mukalelo Kiristu adhiveliye mulogo, ofiyera opeleka egumaye mwaha wa mulogo, ²⁶ wihina atxenihe mulogo, asuwaga ni manjhe wodhela madhu, ²⁷ wi ipelekele mwinnyene ni makalelo aatene oowoma, ehinna malemba obe makunyazi, naari ethu siithu yotakala, mbwenye yoweela ni yohukanna nihonya. ²⁸ Ni mukalelo mmodhave, mulobwana amudhivelege mwariye ninga mwiili waye. Mulobwana onamudhivela mwariye, onidhivela mwinya, ²⁹ mwaha kawo muthu onidda mwiili waye, mbwenye onojhiha ni onoosamalela, ninga Kiristu eriliyena mulogo,

(Tito 2:4, 5) yaxagihege anamwali wihina ekanne odhivela naamamuniwa, ekanne odhivela ni aniiwa, ⁵ ekanne mubuwelo weepogo, oowoma murima, oosamalela pama murala wewa, ekale owawiwelela amamuniwa, wihina ahikalevo muthu onaanyemule muthenga wa Mulugu.

MUSOLO 15

EHIKALAWO MAKALELO APAMA OOMWEBEDHA MULUGU

(João 17:17) M mwatxenihe ni ebaribari; madhu enyu ebaribari.

(João 17:6) ‘Miyo gihawaddela athu ndina nenyu elabo yatene. Aliwa yari enyu, nyu muhugivaha athu yala, aliwa ehiwelela madhu enyu.

(João 13:35) Mowindo athu atene enere onona wi muri anamahara aaga: mwadhivelanaga mmodha ni mukwaye.’

(João 3:36) Ole anamuroromela Mwaana, ohukanna egumi yohimala; ole anakoodda omuroromela Mwaana kanadha oona egumi, mbwenye owali wa Mulugu onokalave nuuliye.

(João 18:36) Yesu waakula: ‘Omwene waga kahiyo weelabo yela. Omwene waga wahakale wa mwilaboni, amwimeleli aaga yere owana koddo wi gihipelekiwe mmadani mwa Judewu. Ebaribari sowi, Omwene waga, kudhele elabo yela.’

(Mateus 24:14) Muthenga ola wapama womwene, ommadha olaleyiwe mwilaboni yatene yavati, wengo winafwanyeya athu, vano omakuthulo wifiye.

MUSOLO 16

OSAKULE OMWEBEDHA MULUGU

(Êxodo 20:4, 5) ‘Kahiyo okokorela ekwamuthu si ekwamuthu, enaligana ni yego eli odhulu, mulengalenga, obe elabo yavati, vati vathaya, obe mwiiko. ⁵ Kahiyo okokorela newene olabela, mwaha miyo Yehova Mulugu awo, gili Mulugu onafuna webedhiwa yeka baahi, onasinyusa mwaha obure wa abaabi wodhela aniiwa, wodhela nihimo nanatharu, nihimo nanennayi wa yaale ehinagifuna,

(Isaías 52:11) Arabeleni, arabeleni, venyavoni vari vewa, kamupare yego siyego eri yonyakavala! Mburumeyevo vari vewa, kamwiitakalihe, nyu muthukunle dhoobo dha Yehova.

(Mateus 7:12) ‘Mowindo, dhego dhatedhene munafuninyu wihina athu yuwerelegeni, mwawerelege ndo aliwa. Mwaha Malamulo aaNamavuhulela enasoriha ndo.

MUSOLO 17

MULUGU ONOWAVURUWANA MALOBELO

(Filipenses 4:6, 7) Kamukubanye ethu, mbwenye mwa dhatedhene, mulobelege nuubebedha, vamodha nuutamalela, mmwaddelaga Mulugu dhinafuninyu; ⁷ vano, murenddele wa Mulugu ori wopitha okwaranya mubuwelelo wa muthu, onere okurumusa murima dhenyu ni yubuwelo yenyu wodhela Yesu Kiristu.

(Tiago 2:26) Mwebaribarene, woona wi mwiili wahikanna muuya ohukwa, ni mukalelo mmodhave nroromelo nahikanna mabasa nihikwa.

(Mateus 6:9-13) ‘Mowindo, mulobelege mwigihina: ‘‘Babihu muli odhulu, ndina nenyu ntxenihiwe. ¹⁰ Omwene wenyu odhe. Efunelo yenyu yereye, odhulu ni elabo yavati. ¹¹ Munivahe yojha ya labo na peeno; ¹² nleveleleni dhothega dhehu, ninga iyo nnalevelelihu athu amodha enanithegela. ¹³ Kamunihiye omorela muwehiwani, mbwenye munobole mwa mbure.’

(Apocalipse 14:6) Gihimoona mungero mmodhaya avavaga odhulu, ahikanna muthenga dhapama wi alaleyele ale enakala elabo ya vati, malogo, mahimo, dhiwogelo ni athu atene.

(Filipenses 4:13) Ginowedha werana dhatedhene mwaha wa ole onagivaha kopolo.

MUSOLO 18

GIHIIPELEKA WA MULUGU WIHINA GIBADDIZIWE?

(João 17:3) Wihina ekanne egumi yohimala, yunoneni nyu, Mulugu mmodha eebaribari, nuule mmurumilinyu, Yesu Kiristu.

(1 Pedro 4:2) wihina egumaye yatene yomwiilini, ahilabihedhena dhofuna dhaathu, mbwenye alabihedhena efunelo ya Mulugu.

(Mateus 28:19) Mowindala, dhowani mwaahudhihe athu a malogo amatene wihina ekale anamahudhera aaga. Mwabaddizaga ni ndina na babi, na mwaana ni muzimu wotxena,

MUSOLO 19

ONAHIYE WANDANA NI YEHOVA

(Mateus 22:37) Oliye omwaddela: ‘‘Omudhivele Yehova Mulugu awo, ni murimawo watene, ni mwiili wawo watene, ni mubuwelo wawo watene.’

(1 João 5:3) Mbwenye omudhivela Mulugu, enatapulela ohara malamulo aye; woona wi malamulo aye kinanyemela,

(1 Tessalonicenses 5:17) Mudidele olobela.

(1 Coríntios 15:58) Mowindo, addibilaga, mukale txithi, muhuthikeye, malabwene mweregena mabasa a Nabuya, mubuwelaga wi mabasa a Nabuya munaparinyu nuuviheya, kamunalabela ebewene.

(Colossenses 3:13) Mudhowegeve nvilelanaga mmodha ni mukwaye mulevelelanaga mmodha ni mukwaye mohihiyedhedha, naari akala muthuya ohukanna mwaha womusumela mukwaye. Ninga uleveleleni Yehova mohihiyedhedha, ni nyunwa mweregena emodhave.