Elizabeti Okanna Wari

Dhahivira yaka 400 txinga yoJeruzale egamanle ovenyihedhiwa. Waddamela oJeruzale ahikalawo namakutha dhaala ithaniwa Zakariya ni mwadhiye Elizabeti. Yahimala yaka dhowinjhivadhene ehinna ahima. Labo dhaala, Zakariya odhowa mburo Woweela wa mutempulu wihina ampahele mukutho Yehova. Nuwindo mungero Gabiriyeli okumelela. Zakariya wambela woova, mbwenye mungero ole owoga egi: ‘Kuwoove Zakariya, Yehova digirumile wihina guwaaddele muthenga dhapama. Mwariyo anere okanna mwaana anithaniwege Juwawu. Yehova aamusakunle Juwawu wihina aapare mabasa ootaleleya.’ Mbwenye Zakariya ni Elizabeti yahithabwa wuluvala, bumwahaya Zakariya kaarumedhe ele awogile mungero. Nuwindo, mungero ole owoga egi: ‘Mulugu digirumile wihina guwaaddele, vano woona wihina kugiroromele kunaawogege ofiyedha mwaana oyo obaliwa.’

Zakariya ahimala mudhidhi wowinjhivene agaali mburo Woweela. Vano nukuma athu aatene yofuna onona ethu yapadduwile. Mbwenye Zakariya kaanda owoga. Oliye awoga ni mada. Vano athu wonelamo wihina Zakariya ahakela muthenga wa Mulugu.

Nuuvira mudhidhi Elizabeti okanna wari ni ombala mwaana mowiwanana ninga mungero ole aawogiliye. Amudhiwa vamodha ni amwanddamani ewa yahihagalala vanlubale ni yahidha omoona mwaana ole. Elizabeti owoga wihina mwaana ole ithaniwege Juwawu. Mbwenye athu yaali vevale owoga yegi: ‘Kaawo mmudhaawo anithaniwa Juwawu. Onvahe ndina na ababe, Zakariya.’ Vano, Zakariya othukula mwana tabwa walebavo madhu owi: “Ndina naaye di Juwawu.” Mudhidhi yoole Zakariya ohogolowela owoga! Athu aatene yakala oJuda onona ethu yapadduwe, vano aliwa wambela wikoha yegi: ‘Mwaana ola unnuwa anaakale aani?’

Vano Zakariya odhaaleliwa muzimu wotxena ni owoga egi: ‘Yehova Mulugu ootikiniha!’ Oliye, ahimpaganya Abarawu wihina eere omuruma Mesiya wihina anivuluse. Juwawu anakale namavuhulela teto mabasa aye enere wawegeredha athu wodhela odha wa Mesiya.

Ethu ninga yeela yootikiniha yahipadduwa ni muhiyana dhaala a emudhi ya Elizabeti ithaniwa Mariya. Yaali ddi? Nnere woona musolo onaharela.