Obaliwa wa Yesu

Namathonga ooRoma, Sezare Agustu, okumiha nlamulo wihina maJudewu aatene edhowe yalebeliwe luwani wibaliwiwa. Bumwahaya Juze ni Mariya weedda olenddo odhowa oBele, luwani waabaliwe Juze. Wahanle mudhidhi vang’ono wihina Mariya abale.

Nufiya oBele, nyumba dhaatedhene mwafiyedha aleddo yahikalamo athu, bumwahaya aliwa odhowa mburo vajha anenyama. Bumburo yole waabaliwe Yesu. Mariya ompotha Yesu ni guwo, omukinantiha mburo vajha anenyama.

Waddamela oBele, wahikala anamakukula yaasamalela mambila. Morurumusa, mungero a Yehova wathwanyuwela osogolo wewa ni waara wa kopolo obajha wamoneya. Anamakukula ale obajha woova mbwenye mungero ole owoga egi: ‘Kamoove. Gili vala wihina guwaddeleni muthenga dhixa! Peeno, Mesiya ohubaliwa luwani yoBele.’ Nuwindo okumelela muthithi wa angero wegi: ‘Munvuwihe Mulugu oodhulu teto murenddele okale velaboni yavati. Numala, angero ale odhowa. Anamakukula ale yerile ddi?’

Aliwa owoga vaakaleliwa yegi: ‘Ndoweni oBele movanene!’ Anamakukula ale odhowa oBele ni onfwanya Juze ni Mariya mburo ole vajha anenyama vamodha ni mwaniwa.

Anamakukula ale nuwoga ethu mungero ole aawogiliye, athu aatene otikina vanlubale. Mariya obajha opendda dhithu aawogile mungero ole ni ookoya mmurimani dhithu dhaatedhene ndhe. Nuwindo anamakukula ale odhowa emutamaalelaga Yehova wodhela dhaatedhene yoniliwa ni yiwaliwa.