Okwa wa Yesu

Anamasogolela aanamakutha, omuthukulela Yesu opalasiyu wa namathonga ithaniwa Pilatu. Pilatu nukohedha ddiniyani Yesu aathegiliye, anamakutha ale omwinkedha dhowoota dhowinjhiva Yesu. Ohiya eyo, aliwa omwinkedha wihina Yesu afuna akale mwene! Nuwindo, Pilatu omukoha Yesu akala oliye aali mwene amajudewu! Vano Yesu wakula egi: ‘Omwene waaga kahiyo weelabo yeela.’

Woona wihina Pilatu kanfwannyena muladdu Yesu oliye oruma wihina adhowiwena wa Erodi, aali namathonga ooGalileya. Mbwenye ni Erodiya kanfwanyilena muladdu Yesu, bumwahaya, oliye oruma wihina emuhogolosele wa Pilatu. Vano Pilatu othoma wihina eere omutapula Yesu, vano aliwa wambela okuwa wihina Yesu apiwe. Vasogolova anyakoddo ale obajha onvada Yesu ni muwaxuxo, omutapera maara ni omuukutha. Teto aliwa omuwariha kara ya mwinga, nuwindo wambela omuteya. Vano Pilatu ohogolowela owoga wi Yesu kanna muladdu, mbwenye nlogo odidela owoga wihina Yesu oofwanelela okomeliwa vantxikwani. Mwaha wa yeyo Pilatu wenya wihina Yesu apiwe.

Yesu othukuleliwa mburo dhaala withaniwa Golgota, nuwindo manyalo ni mada aye okomeliwa vantxikwani. Mbwenye Yesu olobela egi: ‘Babani, kaaleveleleni, eneriwa kinoona.’ Naarive dhigaali ndo athu odidela omuteya Yesu yegi: ‘Akala we oli Mwaana a Mulugu okite vantxikwani nvo ni wivuluse wamwinnyo!’

Mbwenye mpanga mmodha aali mmambalo mwa Yesu oloba egi: ‘Muhigidduwale mwavolowa mumweneni mweenyu.’ Vano Yesu ompaganya mpanga ole egi: ‘We onodha okale ni miyo mParayizu.’ Morurumusa vati oribavo teto naarive vigaali mutana okalaga ninga mahiyu muwari mwa mawora mararu. Mudhidhi yoole Mariya amaye Yesu ni anamahara amodha yaali waddamela mburo wakomeliwe Yesu. Nuwindo Yesu omuloba Juwawu wihina amusamalele Mariya ninga amaye.

Voharela Yesu owoga egi: ‘Dhihakwanela!’ Nuwindo Yesu okwa. Mudhidhi yoole wambela oddiginyeya weelabo winlubale, teto kurtina na mutempulu otaala vaari ni vaari. Vano munyakoddo mmodha owoga egi: ‘Mwebaribarene ola aali Mwaana a Mulugu.’