Kayini Ahithabwa Otakaleliwa

Adawu ni Eva nuwigariwa mundda woEdeni yahabala ahima owinjhiva. Mwaana oobajha aali Kayini, anabiili aali Abeli. Mabasa a Kayini waali olima, mbwenye Abeli aakukula mambila.

Labo dhaala Kayini ni Abeli othoma opeleka nvaho Yehova. Ohunona makalelo dhithaniwa nvaho ndho kale? Dhithaniwa mukutho. Yehova ahithabwa ohagalala ni nvaho wa Abeli mbwenye, kahagalale ni nvaho wa Kayini. Mwaha wa yeyo Kayini othabwa otakaleliwa. Yehova nuwoona wi Kayini ahitakaleliwa owoga nuliye egi: ‘Wadidela okala ootakaleliwene ndo onere werana ethu yabure.’ Mbwenye Kayini kamwiwelele Yehova.

Kayini owoga ni ddibile Abeli egi: ‘Kabe nidhowe omundda.’ Egaalivo abiili, oliye ompa ddibile Abeli. Yehova ahithabwa wukuuwa mwaha ethu erilena Kayini. Bumwahaya, oliye omuruma wihina atamele mburo wolapela namudhaye. Ofiyedha okwa waye kahogolowele vaade va makolo aye.

Yopadduwa ela enanihudhiha ddi? Malabo mamodha dhithudha kadhinereya ninga mwafunelihu. Dhapadduwa ndo nnothabwa otakaleliwa. Noona wihina nihithabwa otakaleliwa obe muthu mmodha awoga wihina nihithabwa otakaleliwa sapama osaddula monelo wehu. Naherana ndo iyo podi othabwa otakaleliwa ofiyedha werana ethu yabure.

Ki owoga wodhela Abeli, Yehova ahimuddiwala? Naari. Abeli aali muthu apama amudhivela Yehova. Bumwahaya, Yehova kadha amuddiwalaga. Osogolo, elabo yaatene yakala parayizu, Yehova aneere onvenyiha Abeli wihina ahogolowele okalawo.