Buuru a Balawu Onowoga

Muwari mwa yaka 40 amwaana Ezarayeli egaali mwiddeddereni, yahigonjhiha koddo dhowinjhiva. Vano yaali neena nufiya mburo dhaala withaniwa Mowabe. Mwene oMowabe, iithaniwa Balaki eera woova ogonjhihiwa naamwaana Ezarayeli. Bumwahaya adhe amwithanege mulobwana dhaala iithaniwa Balawu wihina awulumele amwaana Ezarayeli.

Mbwenye Yehova owoga ni Balawu egi: ‘Kuwoge ethu yabure wodhela amwaana Ezarayeli.’ Bumwahaya, Balawu kadhowile oMowabe. Nuwindo, mwene Balaki owoga egi: ‘Wadha, ginere wuvaha ethu-siithu onaalobiwe.’ Naarive dhigaali ndo, Balawu kadhowile oMowabe. Mbwenye Yehova owoga nuliye egi: ‘Podi odhowa, mbwenye wawoge dhithu ginuwaddelimi baahi.’

Vano, Balawu omugwela burwaye, odhowaga oMowabe. Mbwenye oliye afuna awulumele amwaana Ezarayeli. Bumwahaya, agaali mulenddoni mwaaye, mungero omuthwanyuwela. Oliye kaanda omoona mungero ole, mbwenye buurwaye owanda omoona. Buuru ole osayela makalelo oomurabela mungero ole, vano Balawu onvada ni mukogodho waye. Vasogolova, mungero ole othwanyuwave. Teto buuru ole asayelagave makalelo oomurabela mungero ole, obaddanya moddo wa Balawu ni muru. Vano oliye onvada. Nuwindo, mungero ole othwanyuwave. Mbwenye buuru ole koonile makalelo oomurabela mungero ole. Bumwahaya oliye okinanti mudila. Vano Balawu onvadave buuru ole.

Mudhidhi yole, Yehova weeriha wihina buuru ole awoge. Buuru ole omukoha Balawu egi: ‘Onagivadela ddi?’ Balawu omwakula egi: ‘Mwaha onogitota manyazo. Gahakanne supadda, gowupa!’ Buuru ole omukoha egi: ‘We kunagigwelesa malabwene? Ginowuwerelaga ethu ninga yela?’

Vano Yehova ofugula mento a Balawu ni wanda omoona mungero. Vano mungero ole owoga egi: ‘Yehova kawogile wihina onadhowe oMowabe wihina wawoge dhithu dhabure wodhela amwaana Ezarayeli?’ Balawu wakula egi: ‘Gihimutheegela Yehova. Baahi, ginere ohogolowela vaade.’ Vano mungero omwaakula egi: ‘Podi odhowa oMowabe, mbwenye wawoge baahi dhithu dhinuwaaddele Yehova.’

Balawu ahihudhera ethu-siithu? Naari. Nufiya oMowabe, oliye oxixa dila tharu wawuulumela amwaana Ezarayeli. Mbwenye Yehova keenyile wi Balawu awulumele amwaana Ezarayeli. Vasogolova, amwaana Ezarayeli nuurijha luwani yo Mowabe aliwa ompa Balawu. Onoonamo aavi, kiyakale yapama ahere Balawu amwiwelela Yehova?