Yesu Anomagiwa

Yesu ni anamahara aye yaali Omwangoni wa Olivera, teto vahiriba ni wahikala mweri. Vano aliwa nufiya ojardi yoJetisemani, Yesu waloba wihina “ekale mento.” Yesu ahithabwa othuwathuwa, bumwahaya oliye wahiya vang’ono wihina alobele. Oliye olobela egi: “Babani epadduwe ninga munafunelinyu.” Nuwindo Yehova omuruma mungero aye wihina amulibihe. Mbwenye Yesu nuhogolowa waali anamahara aye araru, aafwanyile egonaga. Oliye owoga egi: ‘Kavenyani, ola kahiyo mudhidhi wogona, teto amwiddani aaga enoodha wihina egimage!’

Ohunavire mudhidhi wowinjhiva ofiya Judasi Iskariyoti ni muthithi waathu egathukule muthanko ni masupadda. Woona wihina Yesu odhowesa ojardi wule oJetisemani ni anamahara aye, Judasi ahinona wihina Yesu aali wewule, ni anamahara aye. Teto Judasi ahipangana ni anyakoddo ale wihina eere watonyihedha Yesu, vano nufiya waali Yesu oliye omwaddamela ni onvaha beju. Nuwindo Yesu omukoha egi: ‘We Judasi onamuguliha mwaana Mulugu ni beju?’

Voharela Yesu wakoha muthu yamusayeliwa. Vano aliwa wakula wi yamusayela Yesu. Nuwindo Yesu wakula egi: ‘Dimiyene.’ Anyakoddo ale yadhile ommaga otikina vanlubale ni oliba murima wa Yesu, ofiyedha ohogolowela mundduli ni omotha. Vano Yesu ohogolowela wakoha dila yanabili muthu yamusayeliwa. Aliwa numwakula wihina nnamusayela Yesu, oliye owoga egi: ‘Miyo gihuwaddelani wi dimiyene mwaahiye anamahara aaga.’

Vano Peduru nuwoona dhithu ndhe dhapadduwa, othukula supadda ni ogwadda nibaru namulobwana dhaala ithaniwa Malku, mbwenye Yesu ohidda nibaru na Malku ni onvulumusa. Nuwindo Yesu owoga egi: “Peduru ohogolosele supadda vamburoni vewa, mwaha aatene yaale enalabihedhe supadda enere opiwa ni supadda.” Vano anyakoddo ale ommaga Yesu, mbwenye anamahara aye othawa. Aliwa omuthukulela Yesu wa Anaji aali namasogolela aanamakutha. Anaji omukoha Yesu dhithu dhowinjhiva, nuwindo oruma wihina emudhowena wa Kayifaji aali namakutha munlubale. Ki ethu baani yapadduwele anamahara a Yesu?