Yesu Onodhowa oTempulu

Juze ni Mariya yakalesa oNazare ni Yesu vamodha ni anaaye amodha anaalobwana ni anahiyana. Juze alaba ninga karapintero ni ohudhiha emudhaaye wodhela Yehova ni malamulo aye. Emudhi ya Juze yodhowesa osinagoga wihina yamwebedhe Mulugu teto yaka dhaatedhene yoweddesa olenddo wolapela edhowaga oJeruzale wihina yaajhe mathanga a Paskwa.

Yesu nuukanna yaka 12, oliye vamodha ni emudhaaye weedda olenddo ola woolapela odhowa oJeruzale. Luwani ele yaatene wahidhaala athu mwaha yadhowile yaajhe mathanga a Paskwa. Mathanga a Paskwa ale nuumala, Juze ni Mariya ohogolowelaga vaade ni amudhi amodha yanniwana muulenddoni. Aliwa yubuwela wi Yesu aali vamodha naaliwa. Mbwenye nudhowa omusayela Yesu, kiyanfwanyile.

Nuwindo, Juze ni Mariya ohogolowela oJeruzale ni omala malabo mararu emusayelaga Yesu mbwenye kiyamonile. Nuumala, othoma ohogolowela otempulu. Aliwa onfwanya wewule. Oliye aali ni anamahudhiha, aavuruwanaga dhithu yahudhihiwa wodhela Mulugu wula aakohaga. Anamahudhiha ale yomutikina vanlubale Yesu ofiyedha omukohaga. Teto dhowaakula dha Yesu dhowahagalasa! Aliwa yowanda woona wi Yesu owawonelamo pamadhene malamulo a Yehova.

Juze ni Mariya yaali oothuwathuwene. Mariya owoga egi: ‘Mwanaga, nihusayela mburo waatene! Waali waani?’ Yesu waakula egi: ‘Miyo gaali vevala, vaade va Ababa.’

Nuwindo, Yesu ohogolowela oJeruzale ni makolo aaye. Nuufiya, Juze omuhudhiha mabasa ookarapintero. Yesu oodhowave unnuwaga ni othabwaga okanna thotho. Athu yaamoonaga Yesu yohagalala vanlubale, teto Yehova oohagalala vanlubale ni dhithu eerana Yesu. Onowanda wuubuwela makalelo Yesu aaliye mudhidhi yoole?