Mwaha Wavamwangoni

Nuumala wasakula arumiwi aye 12 Yesu woona wi yahikalawo athu owinjhiva yamujheha. Aliwa yadhela dhilabo dhohiyana-iyana ninga: Ogalileya, oJudeya, oTiru, oSidoni ni oSiriya. Athu amodha yadhile mwaha yaali aredda amodhaya mwaha yavoloweliwe naademoniyu. Mbwenye Yesu wavulumusa aatene, nuwindo oliye okarati ni obajha owoga mwaha othambwe ononiwa peeno ninga Mwaha wa vamwangoni. Muwari mwa mwaha ola Yesu anowoga ethu nnahowelihu werana neegi nandane ni Mulugu, teto oliye ohudhiha wi kinandeya okalawo nihiholeliwaga ni Mulugu ni nnohowela omudhivelaga. Mbwenye kinandeya iyo owoga wi nnomudhivela Mulugwihu wula nihadhivelaga athu. Teto Yesu owoga wi nnohowela odhowagave naaweddihaga athu amodha nuupama.

Ohiya eyo, Yesu ahiwoga eegi: Kamwadhivelege baahi akwinyu mbwenye mwadhivelege naamwiddaninyuya ni mwalevelege athu. Muthu ukuuwa mwaha ethu omwereliwe, mohulegela odhowe wathapanye nuliye ni omulobe nikurumuwelo. Waweeddihege athu amodha ninga munafuneliwe wihina yuweddihege.’

Teto Yesu ahiwoga wodhela muselu wa korowa egi: ‘Sathima vanlubale okanna wandana woliba ni Yehova ohiya okanna korowa dhowadda mwaha wihina mbava podi wiiya korowa dhawo mbwenye kaavo ananda wiiya wandana wawo ni Yehova. Kamuthuwathuwelege dhithu munafuninyu ojha, ong’wa obe owara. Musugwe balame Mulugu anowavaha ele enahoweliwa wihina ejhe. Othuwathuwa kawinenjhedhedha egumi ya muthu, kamuddiwale wi Yehova ohunona ethu munahowelinyu.’

Muthithi ole waathu kuniwege dhithu Yesu aahudhihiliye. Anamaholela gereja yanna mutholo wowahudhiha athu wodhela Mulugu kiyahudhiha ndhe Yesu aahudhihiliye. Ddiniyani yamuthukulela Yesu okala namahudhiha apama? Yowakulaya sowihina Yehova damwaddela Yesu dhithu oliye ahoweliye ohudhiha.