Muthenga Alaleya Juwawu Namabaddiza

Juwawu, mwaana a Zakariya ni Elizabeti wunnuwa ofiyedha okala namavuhulela. Yehova daamusakule Juwawu wihina aalaleye athu wodhela odha wa Mesiya. Juwawu kaahudhiha musinagoga newene nyumba ni nyumba. Oliye ahudhiha wolapela ni muluwani. Athu ooJeruzale ni ooJudeya yomusayela wihina ehudhihiwe nuliye. Oliye oohudhiha wihina athu yegi emuhagalase Mulugu yohowela ohiya werana dhithu dhabure. Vano athu owinjhiva yoothwaruwa ni yobaddiziwa ni Juwawu.

Juwawu ahikanna egumi yokweya. Dhowara dhaye dhaali dha thebe na kamelu ni dhoojha dhaye yaali enwi ni kwaakwa. Athu owinjhiva yofuna omunona. aFarizewu ni aSadusewu yaali owithukula yodhowa owoga nuliye. Mbwenye Juwawu oowoga naliwa egi: ‘Kamubuwelege wihina Mulugu onothabwa wudhivelani wapitha athu amodha. Munohowela osaddula ekalelo yenyu ni othwaruwa.’

Athu owinjhiva yomukoha Juwawu ethu yahoweliwa werana yegi emuhagalase Mulugu. Oliye owawakula egi: ‘Mwakanna dhoowara biili, modha munvahe ole ahinna.’ Ohunona ethu yamuthukulela Juwawu owoga ndo? Oliye afuna aahudhihe wihina yegi emuhagalase Mulugu, enohowela wadhivela athu.

Mbwenye ni anamakukusa musoko, Juwawu oowoga egi: ‘Mukale oororomeleya kammwiyelege muthu.’ Teto Juwawu oowoga ni anyakoddo egi: ‘Kamootege ni kamwawiyelege athu korowa.’

Anamakutha ni malevita yamukoha Juwawu yegi: “We oli aani? Mwebaribarene oliye owaakula egi: ‘Miyo gili ole anaathukulela athu onfiyedha Yehova. Namavuhulela Izayiya ohuwoga wodhela miyo.’

Athu yodhiveliwa ndhe ahudhiha Juwawu. Owinjhiva yowikohesa akala Juwawu aali Mesiya. Mbwenye oliye owaakula egi: ‘Onoodha muthu athima ogikwaranya miyo. Newene kaginafwanelela otapula mungohi dha sandaliya dhaye! Miyo ginubaddizani ni manjhe, mbwenye anadha mundduli mwaaga anubaddizegeni ni muzimu wotxena.’