Anamahara a Yesu Elaleyaga Nuuliba Murima

Ahikalawo mulobwana dhaala ooragala, akiratesa otempulu malabo aamateene alobaga korowa. Labo dhaala Peduru ni Juwawu odhowa otempulu. Vano mulobwana ole waloba korowa. Peduru owoga nuliye eegi: ‘Miyo ginere wuvaha ethu yathima okwaranya korowa, mu ndina na Yesu miyo ginolamula wihina ovenye ni weeddege!’ Vano mohilegela mulobwana ole ovenya ni wambela weedda! Athu owinjhiva yamoone mulobwana ole eeddaga yahitikina vanlubale ni othoma okala anamahara a Yesu.

Mbwenye anamakutha ni aSadusewu otakaleliwa vanlubale, nuwindo omuthukulela Peduru ni Juwawu otiribunale. Nuwafiyana otiribunale aliwa wakoha, baani aavahile kopolo wihina envulumuse mulobwana ole. Vano Peduru wakula egi: ‘Anivahile kopolo di Yesu Kiristu, mulobwana yoole mwampilinyu.’ Nuwindo anamakutha ni Asadusewu omukoddiha Peduru ni Juwawu wihina ehiwogege wodhela Yesu. Mbwenye Peduru ni Juwawu wakula yegi: ‘Iyo kannaaselele nnerege owogave wodhela Yesu.’

Vano Peduru ni Juwawu nuutapuliwa odhowa wawaddela anamahara amodha dhithu dhapaddunwe. Nuwindo anamahara aatene olobela elobaga wihina Yehova aakavihere, vano Yehova wavaha muzimu wotxena wihina edidele olaleya ni wavulumusa athu nuuliba murima. Teto athu yarumedha wihina ekale anamahara a Yesu odhowagave yenjhedhedheyaga. Mbwenye Asadusewu kiyadhiveliwa yoonaga dhithu ndhe dhipadduwaga. Bumwahaya aliwa wamaga anamahara a Yesu ni wavokedha mukambura. Mbwenye vaari va mahiyu mungero a Yehova ofugula musiwo dha kambura ni owoga naliwa egi: ‘Muhogolowele otempulu.’

Vano vati nuusa, Asadusewu wiwa wihina anamahara a Yesu yahikumamo mukambura ni yanna ohudhiha mutempulu. Vano anamahara a Yesu omagiwa dila yanabili ni othukuleliwa otiribunale. Nufiya otiribunale namakutha munlubale wakoha egi: ‘Iyo kanukoddiheni olaleya wodhela ndina na Yesu?’ Mbwenye Peduru wakula egi: ‘Nnohowela omwiwelela Mulugu ninga namathonga wahiya athu.’

Athu yafwanyeya otiribunale otakaleliwa vanlubale ni ofunaga wapa. Mbwenye mFarizewu dhaala ithaniwa Gamaliyeli owoga egi: ‘Pole-pole ni alobwana ala, podi wera Mulugu ali epaddi yewa, nyu munafuna muwane ni Mulugu?’ Vano alobwana ale yafwanyeya otiribunale orumedha ndhe awoga Gamaliyeli ni wahiya wihina edhowege, mbwenye ehinathi wahiya, aliwa orajhiha waavada ni waruma wihina eselele olaleya. Mbwenye naarive dhigaali ndo, anamahara a Yesu kiyaselele olaleya, aliwa odidela olaleya nuuliba murima. Teto yolaleya malabo aamatene muthenga dhapama mutempulu vamodha nyumba ni nyumba