Peduru Onomukoodda Yesu

Yesu nuwoga ni anamaharaye wihina emahiyu yele aliwa yere omuthawa, Peduru owoga wihina kerena eyo. Mbwenye Yesu omwaddela Peduru egi: ‘Mutubi ahinunle we onere ogikoodda dila tharu.’

Vasogolova anyakoddo numuthukulela Yesu wa Kayifaji anamahara amodha yahithawa. Mbwenye namahara mmodha ni Peduru bamuhara Yesu wolapelawene. Peduru nufiya vade va Kayifaji oliye waddamela mburo vathubanyiwe mootho. Vano waara wa mootho nuumoneya wintoni wa Peduru, namwali dhaala ali mudhaari a Kayifaji omoona Peduru ni wawaddela athu aatene yaali vevale wihina Peduru eeddesa ni Yesu.

Mbwenye Peduru omwakula egi: ‘Kahiyo miyo, podi wera onoganganyedha ni muthu mmodhaya!’ Vano Peduru nuwaddamela mulago, mudhaari mmodhaya amuhiyana omoona ni wawaddela athu aatene yaali vevale wihina Peduru eeddesa ni Yesu. Peduru wakula dila yanabili egi: ‘Miyo newene kagimunonne Yesu yoyo!’ voharela mulobwana dhaala owoga egi: ‘Mwebaribarene we oli namahara aye, mwaha wi mawogelo awo enowoniha wihina oli muGalilewu ndala ninga Yesu.’ Vano Peduru omukodda Yesu dila yanatharu egi: ‘Miyo kagimunonne!’

Mudhidhi yoole mutubi wunla, Yesu orugunuwa ni omusugwa Peduru. Vano Peduru wubuwela ele Yesu awogiliye. Peduru ovenyavo ni obajha wunla vanlubale.

Vano namakutha munlubale ni alobwana amodha otugumana vaade va Kayifaji wihina emutorihe Yesu. Aliwa yahithoma ompa Yesu, Mbwenye yohowela ofwanya ethu-sithu yoniha wihina Yesu aherana ethu yabure. Mbwenye kiyandile ofwanya mwaha wihina Yesu kerilena newene ethu yabure. Nuwindo Kayifaji omukoha Yesu akala oliye aali Mwaana a Mulugu. Yesu numwakula wi gili Mwaana a Mulugu, Kayifaji: owoga egi: ‘Kannahowela ethu emodha enoniha wihina oliye oherana ethu yabure mwaha wi oliye ohumuruwana Mulugu. ‘Vano aatene orumedha ni owoga wihina Yesu oofwanelela opiwa, aliwa onvada Yesu, omutapera mara, omukunela wintoni ni empwadulaga owoga yegi: ‘Akala we oli namavuhulela kawoga uvadile baani?’

Vati nuusa Kayifaji vamodha ni alobwana amodhaya otugumana ni ohogolowela omukoha Yesu akala oliye aali Mwaana a Mulugu. Yesu wakula egi: ‘Anawoga dinyu wihina gili Mwaana a Mulugu.’ Vano alobwana ale owoga wihina Yesu apiwe mwaha womuruwana Mulugu. Voharela aliwa omuthukulela wa Ponsiyu Pilatu aali namathonga aaRomanu. Ddiniyani yapadduwe voharela ni Yesu? Nnere woona ohudhera winaharela.