Yesu Anonvulumusa Muliba Ohoona

Afarizewu yomwidda vanlubale Yesu ni yosayela makalelo ommaga. Aliwa yomukoddiha Yesu wavulumusa athu nlabo na Sabadu. Nlabo dhaala na Sabadu Yesu omoona mulobwana dhaala ohoona alobaga korowa ni owoga ni anamahara aye wihina eere onvulumusa mulobwana ole ni kopolo dha Mulugu. Vano Yesu otapera vati othukula mathakaya omweeka mmentoni mwa mulobwana ole nuwindo owoga egi: ‘Kadhowa wasusule nthiya noSilowe.’ Voharela mulobwana ole werana ndhe Yesu aawogiliye. Mwaha wa yeyo, mulobwana ole wambela woona dila yobajha mwigumini mwaaye.

Athu owinjhiva kayarumedha wi mulobwana ole aali mulobwana yoole aabaliwe ahoonaga. Mbwenye akohiwa oliye oowoga wi dimiyene. Mwaha wa yeyo athu amodha ofunaga onona makalelo oliye ambeliye woona. Vano nuwawaddela makalelo ambeliye woona, aliwa omuthukulela waali aFarizewu.

Vano nufiya waali aFarizewu mulobwana ole wawaddela makalelo oliye aavulumusiwiye nlabo nne na Sabadu. Woona wi Nlamulo na Mulugu nowakoddiha wapara mabasa nlabo na Sabadu, aFarizewu amodha omukoha yegi: ‘Yesu uvulumuse labo na Sabadu? Eyo enowoniha wi kahi Mulugu ananvaha kopolo wihina aavulumuse aredda.’

Mbwenye aFarizewu mamodha yorumedha wi Yesu owanda wavulumusa athu mwaha Mulugu danvaha kopolo. Mwaha wa yeyo, aFarizewu wawithana ababi a mulobwana ole wi yaakohe makalelo mwaniwa ambeliye woona. Mbwenye ababi a mulobwana ole aavulumusiwe, kiyafuna wawakula makoho ale, mwaha yoova wigariwa musinagoga. Vano aFarizewu ohogolowela omukoha mulobwana ole aavulumusiwe, nukohiwa oliye wawakula aFarizewu ale egi: ‘Miyo gihuwaddelani makalelo gambelimi woona, mbwenye nyu kamunafuna orumedha.’ Vano Afarizewu otakaleliwa vanlubale ni omwigara mulobwana ole musinagoga.

Yesu nunona dhithu dhampadduwele mulobwana ole, odhowa owoga nuliye egi: ‘We onomuroromela Mesiya?’ Mulobwana ole omwakula Yesu egi: ‘Mesiya yoyo baani Nabwiyani?’ Yesu omwakula egi: ‘Miyo gili Mesiya!’ Mohanganyedha nuwiiwa ndhe Yesu aawogiliye, mulobwana ole obajha omuroromela. Ela enowoniha wi Yesu aali muthu apama! Teto ohiya baahi, onvulumusa mulobwana ole oliye oofuna omulibiha epaddi yomuzimuni.