Namasugwera Kambura Onokala Mukiristawu

Ofilipu ahikalawo namwali dhaala aanna demoniyu. Demoniyuya oomurohiha dhithu dhaapadduwe osogolo, apatarawaye yoojha korowa dhowinjhiva mwaha woliye. Pawulo ni Silaji nudhowa oFilipu oliye wowahara malabo owinjhivene ni akuwaga egi: ‘Alobwana ala adhaari a Mulugu oodhulu.’ Nuwindo, Pawulo owoga ni demoniyu ole egi: ‘Ni ndina na Yesu okumemo mmwilini mwaaye.’ Mudhidhi yoole demoniyu ole omuhiya.

Apatarawu aye nuwoona wihina kiyajhege korowa mwaha wa oliye, otakaleliwa vanlubale. Aliwa omuhidda Pawulo ni Silaji wadhowana waanamathonga ni wera: ‘Alobwana ala enna walupa malamulo ni enna onyonya luwani yaatene!’ Vano anamathonga ale oruma wihina yukuthiwe ni emagiwe. Namasugwera kambura omuthukula Pawulo ni Silaji wadhowana kambura dhaala mwaali yiihi enlubale, nuwindo wavolosiha mweddo dhewa mukuguluni.

Pawulo ni Silaji obajha wiba jhibo emwibelaga Yehova. Teto anyakambura aatene yowiwa jhibo ndhe. Morurumusa, vaari vamahiyu okalawo oddiginyeya weelabo waddiginye kambura yaatene. Mwaha wayeyo musiwo dhaatedhene ofuguwa ni makurenti yamagiliwana anyakambura aatene opadheya. Namasugwera kambura ole othamagela mukambura ni woona musiwo dhaatedhene dhigafuguwe. Woona wihina ubuwela wi anyakambura aatene ehithawa, oliye oweta supadda naye ofunaga wipa.

Mudhidhi yoole Pawulo okuwa: ‘Kawerena kuwipe, mwaha iyo aatene nili mwemuna!’ Namasugwera ole othamagela vaali Pawulo ni Silaji ni okokora vamentoni vewa ni wakoha egi: “Gere ddi wihina givuluwe?” Aliwa omwakula yegihina: “Omurumedhe nabwiya Yesu windo onere ovuluwa we, vamodha ni athu a vaade vaawo.” Aliwa omwaddela madhu a Yehova, vano oliye ni athu a vaade vaye okala makiristawu.