Yesu Anonvenyiha Lazaro Muukwani

Yesu ahikanna akwaye araru yakala luwani yoBetaniya, yithaniwa: Lazaro, Mariya ni Marta. Nlabo dhaala Yesu agaali wolapela ni luwani yoBetaniya oliye wakela muthenga wa Mariya ni Marta wawoga wegi: ‘Lazaro muredda vanlubale. Kamwerena mudhe mowaguva!’ Mbwenye Yesu ahilegela oyawo. Vano nuuvira malabo menli, oliye owoga ni anamahara aye egi: ‘Kabeni nidhowe oBetaniya. Lazaro onogona teto miyo ginaya wengo wihina ganvenyihe.’ Anamahara aye owoga yegi: ‘Akala oliye anoogona aneere okala apamene.’ Vano Yesu wonelamo wihina aliwa kayawoonelemo madhu oliye aawogiliye, bumwahaya oliye wawaddela egi: ‘Lazaro ohukwa.’

Mbwenye Yesu afiyile oBetaniya egavinre malabo mannayi Lazaro agakwile. Yesu nuufiya aafwannye athu owinjhiva emutodolaga Marta ni Mariya. Vano Marta nuunona wi Yesu ohufiya, oliye omuthamagela ni owoga egi: ‘Nabwiyani, mwahakale vevala murogolaga kaakwe.’ Yesu omwaakula egi: ‘Murogoliyo aneere ovenya. We onorumedha yeyo?’ Marta wakula egi: ‘Hee Nabwiya, miyo ginorumedha wihina oliye aneere ovenyihiwa osogolo. Yesu wenjhedhedhave egi: ‘Miyo gili ovenyiha ni egumi.’

Nuwindo Marta odhowa omwaddela Mariya wihina Yesu ohufiya. Mariya omuthamagela Yesu teto athu amodha omuhara. Oliye obajha wunla vanlubale ni omukokorela Yesu nuwindo owoga egi: ‘Nabwiyani, mwahakale vevala murogolaga kaakwe.’ Yesu numoona Mariya unlaga vanlubale, nuliyeya obajha wunla. Teto athu amodha yaali vevale numoona Yesu unlaga, aliwa owoga yegi: ‘Kasugwani makalelo Yesu amudhiveliye Lazaro!’ Mbwenye athu amodha obajha owoga mwahaya bwaddi Yesu adhe aheregena ethu wihina anvulumuse Lazaro. Ki vano ddiniyani Yesu afuniye werana?

Yesu odhowa omahame waakoyiwe Lazaro ni oloba wihina nivenyihiwewo nibwe ninlubale nafuga mulago wa mahame ale. Mbwenye Marta owoga egi: ‘Nabwiya ehivira malabo mannayi oliye agakwile! Podi wera vano ohambela onukwa.’ Naarive dhigaali ndo nibwe nne ovenyihiwavo. Vano Yesu olobela egi: ‘Babani ginowutamalelani mwaha ogivuruwana. Miyo gihinona wi Nyu munogivuruwanesa. Mbwenye ginawoga dhithu ndha wihina athu ala eli vala enone wi Nyu digirumile wi gidhe velaboni yavati.’ Nuwindo Yesu owoga ni ndhu nootaama egi: ‘Lazaro, kakumela ode! Nuwawoga madhu ale opadduwa ethu yootikiniha: Lazaro okumela ode! Numala Yesu oruma wihina Lazaro atapuliwe.

Athu owinjhiva yawonile matikiniho ale obajha omuroromela Yesu. Mbwenye athu amodhaya odhowa wawaddela Mafarizewu dhithu dhapadduwile. Mafarizewu otakaleliwa vanlubale ni osayelaga makalelo oompa Yesu vamodha ni Lazaro. Vano moviteya, Judasi Iskariyoti, aali mmodha wa anamahara a Yesu odhowa wakoha mafarizewu egi: ‘Munagivahe korowa ngasi wihina guwaddeleni mburo wili Yesu?’ Afarizewu ompaganya wihina yere onvaha korowa dhowakwana 30 dha parata. Vano okuma mudhidhi yoole odhowa osogolo, Judasi osayelaga makalelo oomuguliha Yesu.