Jozuwe Naajibiyonita

Athu aatene ooKana onona dhithu dhaapadduwile oJeriko. Vano, mamwene ooKana othoma wihina ewane naamwaana Ezarayeli. Mbwenye athu dhaala a luwani yoKanaa yithaniwa aJibiyonita, wisinjhedha okalaga ninga kiyaali Akananewu. Wihina yalekethe amwaana Ezarayeli, aliwa waruma alobwana wihina yaaware masaala ni ewoge ni Jozuwe yegi: ‘Iyo nnadha woolapela. Nere wiiwa dhithu Yehova uwereliyeni mugaali Wijipitu ni oMowabe. Mwapaganya wihina kamunagujhule luwani yehu iyo nnere okala adhaari enyu.’

Jozuwe orumedha dhawogile alobwana ale, vano wapaganya wihina kagujhule luwani yewa. Nuuvira malabo mararu, Jozuwe onona wihina kiyaali awolapela mbwenye yaali ooKana. Jozuwe waakoha aJibiyonita mwahaya bwaddi edhe yootege. Aliwa wakula yegi: ‘Iyo neera woova mwaha nihinona wi Yehova anna wukaviherani wi muhalena elabo yaatene yoKana. Kamwerena, nnaloba wihina muhunipe!’ Vano, Jozuwe wakwanihedha mpaganyo waye wohaapa aJibiyonita.

Nuuvira mwanamudhidhi, amwene atanu ooKana odhowa owana aJibiyonita. Mbwenye Jozuwe naanyakoddo aye wakavihera aJibiyonita. Aliwa weedda emahiyu yantero, vano labo noharela, mambeseene aliwa obajha owana. Akananewu osegedheya, aliwa othamagaga bure-bure. Vano, Yehova wamorihela maralala manlubale. Nuwindo, Jozuwe omuloba Yehova wihina iimese nduwa. Mbwenye Jozuwe kanonege nduwa nigimenle. Ki mwahaya bwaddi adhe alobege wi nduwa niimele? Mwaha oomuroromela Yehova. Nduwa omala labo nantero nihimorelemo. Vati vaaribile amwaana Ezarayeli nuwagonjhiha amwene aatene ooKana vamodha ni anyakoddo ewa.