Mwaana Aapaganyiwe!

Dhahivira yaka dhowinjhivadhene Abarawu ni Sara egatelanne. Aliwa ohiya nyumba yapama vano odhowa okalaga muddammwani. Sara ahinona wihina omwiwelela Yehova yaali ethu yapama, bumwahaya kunliha dhammurimani.

Woona wi Sara owunlela okanna mwaana owoga ni Abarawu egi: ‘Ogone ni Agari wihina ambale mwaana, miyo ginamoonege ninga mwanaga.’ Nuuvira mudhidhi Agari ombalela Abaraawu mwaana. Oliye ithaniwa Esmayeli.

Nuuvira mudhidhi Abarawu aganna yaka 99 teto Sara 89, aliwa wawakela alobwana dhaala araru. Abaraawu waloba wihina ekarati vamuruntini wihina ejhe. Ohanona alobwana ayo? Yaali angero! Mmodha waaliwa owoga ni Abarawu egi: ‘Yaka enadhawo munere okanna mwaana.’ Sara eera ovuruwana agaali muddammwani, nuumwiwa mungero ole awogaga Sara obajha oteya ni wubuwela egi: ‘Miyo gihimala wuluvala, dhinenyeye aavi miyo okanna mwaana?’

Mbwenye nuuvira yaka, Sara okanna mwaana ninga mwawogele mungero ole. Vano Abaraawu onvaha ndina na Izaki, nnatapulela “Oteya.”

Izaki aganna yaka 5, Sara omoona Esmayeli amweddihaga nuubure. Sara afuna ambarele mwanaye, bumwahaya odhowa owoga ni Abarawu amulobaga wihina amwigare Agari vamodha ni Esmayeli. Omambelelo Abarawu kafuna wawigara. Mbwenye wihina ambarele Izaki, Yehova owoga ni Abarawu egi: ‘Werena ethu yulobile Sara. Kuthuwathuwe miyo ginere omusamalela Esmayeli. Mbwenye mpaganyo waaga onaakwanele ni mwanawo Izaki.’