Yesu Anowasakula Arumiwi 12

Nuulaleya muwari mwa yaka modha ni meya, Yesu werana yothoma yathima. Oliye oohowela wasakula athu aalaleyegiyena ni yasogolelege mulogo dhoobajha dheekiristawu. Yesu oohowela nikavihero na Yehova wi eerena yothoma ele. Bumwahaya oliye ovireliwa emahiyu yaatene alobelaga. Vigasile Yesu otugumana ni anamahara aye ni wasakulavo arumiwi aye 12. Onowawubuwela mandina ewa? Yithaniwa Peduru, Andere, Tiyago, Juwawu, Filipi, Natanayeli Tome, Matewuji, Tiyago (mwaana Alfewu), Tadewu, Simawu ni Judasi Iskariyoti.

Alobwana ayo 12 yeeddesa ni Yesu. Nuxagihiwa aliwa wambela olaleya yekiwa. Yehova ahavaha kopolo dhowigara muzimu dhabure ni wavulumusa aredda.

Yesu awoona arumiwi aaye ale 12 ninga akwaye. Yesu owaroromela. Arumiwi a Yesu yakalesa nuliye mudhidhi woofuneya, ahinakwe, nuukwa ni nuvenyihiwa. Ndala ninga Yesu, arumiwi aye owinjhiva yaali a murudda woGalileya. Teto amodha yahitela. Afarizewu kiyaavaha thima arumiwi ale 12 mwaha kalivo mmodha waaliwa aathabwile ohudhera. Mbwenye arumiwi yahixagihiwa ni Yesu wihina yapare mabasa oolaleya.

Arumiwi kiyaali oologomana. Bumwahaya malabo mamodha yoviriganiha. Yowoga ehubuwele pama, yothoma dhithu dhabure ni amodha kiyaali oovilela. Malabo mamodha yookangana wihina emunone baani aakale munlubale vaari vewa. Mbwenye yaali athu apama ni yomudhivela Yehova. Aliwa yeere okavihera wiita mulogo wekiristawu Yesu adhowa odhulu.