Muthupo Wavayekiwa

Yaka dhaatedhene maJudewu yowajha mathanga a paskwa labo na 14 mweri wa nisa. Mathanga ale yowakavihera aliwa wubuwela makalelo Yehova awoboliye Wijipitu Yaka ya 33 M.W., Yesu ni anamahara aye yaali oJeruzale yajhaga mathanga a Paskwa, Yesu owoga wihina mmodha wa anamahara aye eere omuguliha. Anamahara aye egaali ootikinene aliwa omukoha baani eerena ndhodha? Vano Yesu wawakula egi: ‘Di yoole ginaanvahimi pawu ela.’ Voharela Yesu onvaha pawu Judasi Iskariyoti. Nuwindo Judasi ovenyavo.

Voharela Yesu werana nlobelo ni ogwaddanya pawu ni wavaha anamahara aye yaali nuliye ni owoga egi: ‘Mwatakunaga pawu ela mubuwelege mwiili waaga ginafunimi wuvahani.’ Nuwindo Yesu werana nlobelo nimodha, othukula kopo mwaali vinyu ni wavaha anamahara aye ni owoga egi: ‘Mwamung’waga vinyu ola mubuwelege nikame naaga ginafunimi okuthula wihina Yehova alevelele dhoothega dhaathu aatene. Teto miyo ginowupaganyani wihina munere othonga ni miyo ni miyo odhulu. Mweregena muthupo ola yaka dhaatedhene mugubuwelaga miyo.’ Muthupo oyo onithaniwa wubuwela okwa wa Yesu.

Vano muthupo ole numala anamahara a Yesu wambela okangana wodhela baani aali athima. Yesu wawaddela egi: ‘Muthu athima duule ahinivaha thima vaari va athu amodha.’

Ohiya eyo Yesu wawaddela egi: ‘Nyu muli akwaaga mwaha ginowuwaddelani dhaatedhene ababa enafuniwa. Mohulegela ginere odhowa wili Ababa, teto nyu munere ohala velaboni yavati. Wihina athu aatene enone wi nyu muli anamahara aaga mudhivelanege mmodha ni mukwaye ndala ninga miyo ginudhivelimini.’

Nuwindo Yesu werana nlobelo nimodha oliye omuloba Yehova wihina aabarele anamahara aye aatene ni aakavihere olaba mowiwanana. Teto oliye oloba wihina athu aatene enone ndina na Yehova. Numala olobela Yesu ni anamahara aye wiba jhibo nuwindo aliwa odhowaga. Mbwenye Yesu aali nenaa wihina amagiwe.