Mungero Gabiriyeli Onompaada Mariya

Luwani yoNazare, oGalileya, ahikalawo namwali dhaala ithaniwa Mariya. Aali a emudhi ya Elizabeti ni aaveviwe ni karapintero dhaala ithaniwa Juze. Elizabeti aganna wari ya mweri 6, mungero Gabiriyeli odhowa owoga ni Mariya. Oliye owoga egi: ‘Murenddele okale ni we, Mariya! Yehova ohuusakula wihina efunelo yaye yakwanele ni we.’ Mariya koonelamo dhithu ndhe awoga mungero. Vano mungero ole omoonelihamo egi: ‘We onere okanna mwaana. Ni onvahe ndina na Yesu. Oliye anaakale Mwene a Omwene onakalewo ni mukalakala.’

Mbwenye Mariya ahithuwathuwa mwaha aali ahinagonege ni mulobwana. Ki dhandeye aavi oliye okanna mwaana? Mungero ole owoga egi: ‘Mariya, kaawo ethu enamurusa Yehova. Ni kopolo dhaaye we onere okanna mwaana. Teto mmudhaawo Elizabeti, ohukanna wari.’ Nuwindo Mariya omwaakula mungero ole egi: ‘Dhihikala. Yereye ni miyo ninga munafuneliye.’

Vano Mariya odhowa ompaada Elizabeti. Mariya numulojhela Elizabeti, mwaana aali mbani mwaaye olupa nuuhagalala. Vano Elizabeti owoga egi: ‘Mariya, we oli muhiyana oorelihiwa ni Yehova. Oneti munlubale waredheliwa ni mayi a Nabwiyaga.’ Voharela Mariya owoga egi: ‘Ebaribari, Elizabeti. Ginomutamalela vanlubale Yehova!’ Mariya omala mweri miraru agaali vaade va Elizabeti, nuwindo ohogolowela owaniwa oNazare.

Juze nunona wihina Mariya ahikanna wari, ofunaga omuhiya moviteya. Mbwenye murohani mungero a Yehova owoga ni Juze egi: ‘Kuwoove omutela Mariya. Oliye kerilena ethu yabure.’ Vano, Juze omutela Mariya ni omuthukulela vaade vaye.