Yehova Ahimbarela Yesu

Emahiyu dhaala, alobwana yakala wolapela nuwIzarayeli woona waara odhulu wakala ninga waara wa thendderi. Aliwa yorumedha wihina thendderi dhowakavihera ni dhowasogolela. Bumwahaya, aliwa obajha ohara thendderi ele wayeliwa. “Thendderi” ele wathukulela oJeruzale. Nuufiya, aliwa waakoha athu yegi: ‘Mwaana anafuna okala mwene amaJudewu ali waani? Nnafuna ninvahe mwana mukono.’

Erodi, mwene ooJeruzale, kaadhiveliwe nuwiwa ewogiwaga wodhela mwene mmodhaya. Vano, wawithana anamakutha ni wakoha wodhela mburo waabaliwe mwene oyo. Anamakutha ale owoga wihina aabaliwe oBele. Erodi wawithana alobwana ale yaadhele wolapela ni owoga naliwa egi: ‘Mudhowe oBele mwamusayele mwaana oyo, mwanfwanya mudhe mugaaddele wiliye, mwaha nimiyoya ginoofuna wihina gidhowe gamoone.’ Mbwenye Erodi eera woota.

Nukuma vevale alobwana ale odidelave ohara “thendderi” ele, ofiyedha oBele. Nuwindo, “thendderi” ele wimela vadhulu va nyumba. Alobwana ale ovolowa ni onfwanya Yesu agaali ni amaye Mariya. Aliwa okokora vamentoni va Yesu ni onvaha mukono dhokwima. Nerege di Yehova aarumile alobwana ale wihina edhowe waali Yesu? Naari.

Emahiyu yele, Yehova owoga ni Juze murohani egi: ‘Erodi anafuna ampe Yesu. Omuthukule Mariya vamodha ni Yesu muthawele Wijipitu. Wafiya mudhidhi wihina muhogolowe, miyo ginere wuwaddelani.’ Juze othukula emudhaye othawela Wijipitu.

Teto Yehova ahiwoga ni alobwana ale yaadhele wolapela wihina enahogolowele wa Erodi. Erodi nuwoona wi alobwana ale yahimuleketha, otakaleliwa vanlubale. Vano woona wi kaanda onfwanya Yesu, Erodi okumiha nlamulo nawoga wihina ahima aatene aanalobwana ooBele yanna yaka modhave ni Yesu epiwe. Mbwenye Yesu aali oobareleyene Wijipitu.

Nuuvira mudhidhi, Erodi okwa. Yehova owoga ni Juze egi: ‘Vano podi ohogolowela wIzarayeli.’ Nuwindo, Juze, Mariya vamodha ni Yesu ohogolowela wIzarayeli ni okalaga luwani yoNazare.