Mmubuwele Mwaadha Loti

Loti akala ni titiyu aye Abarawu oKanaa. Nuuvira mudhidhi dhifuwo dhewa obajha winjhiva ofiyedha ohakwanaga okala mburo mmodhave. Bumwahaya Abarawu adhe awogege ni Loti egihina: ‘Kadhinenyeya iyo aabili okala mburo mmodhave. Onafuna odhowe epaddi baani? Podi osakula. Wadhowa epaddiila miyo ginadhowe epaddi emodha.’ Abarawu kafuna okala oobajha osakula epaddi afuniye odhowawo, mwaha kafuna osakula mburo wapamaya. Oliye aali muthu oodhivela! Kunoonelamo?

Vano Loti woona murudda dhaala wowoma waali sidadi yoSodoma. Waali mburo wanyethihiwa ni manjhe ni wahithabwa okanna mpodda. Vano Loti naamudhaye otamela wengo.

Mbwenye athu ooSodoma yaali abure, teto yahikalawo sidadi emodha yowaddamela yithaniwa Gomora, yaalimo athu abure. Athu yafwanyeya sidadi dhendha yahithabwa okala abure, bumwahaya, Yehova adhe athomege watolosa aatene. Mbwenye oliye oofuna onvulusa Loti vamodha ni emudhi yaye. Siyeyo yamuthukulele waruma angero abiili wihina yawaddele yegihina: ‘Mukume musidadi muna mowaguva! Mwaha Yehova anafuna agujhule.’

Mbwenye Loti kiwelele mowaguva. Vano angero ale ohiddela nlada na Loti, mwariye vamodha ni anaaye abiili wihina yakumihedhe ode. Angero ale okuwa yegi: ‘Muthamage! Nvuluse egumi yenyu, kamusugwe mundduli. Mwasugwa, munere okwa!’

Loti nufiya sidadi dhaala yithaniwa Zowari, Yehova omothiha mootho odhulu wihina apahe sidadi yoSodoma ni yoGomora. Sidadi dhaabilidhene oja. Mowukuula, mwadha Loti kamwiwelele Yehova, oliye osugwa mundduli! Ohunona ethu yapadduwile? Oliye osadduwa okala eruwa ya mwinnyu. Loti ni anaaye yahithabwa wukuuwa. Vano onowonelamo mwahaya bwaddi sapama omwiwelela Yehova?