Nnande addi olibiha nroromelo nehu wodhela mpaganyo wa elabo exa?

1-2. Nahowela neere ddi wula njhehaga elabo exa?

SAPAMA onona wi Yehova ononipaganya wi elabo ela enere ovira ni naakele elabo exa. (2 Ped. 3:13) Ebaribari wi kannonne nlabo elabo ela enaafiyiwa omakuthulo. Mbwenye nihikanna dhithu dhinoniha wi elabo exa ehaaddamela. — Mat. 24:32-34, 36; At 1:7.

² Naarive dhigaali ndo, iyo aatene nnohowela olibiha nroromelo nehu wodhela mpaganyo wa elabo exa, kinapwatha akala nli mwibaribarini yakadhene obe naari. Mwahaya bwaddi? Mwaha naarive nroromelo nehu nigaali nooliba, podi oridha. Kahi ebewene murumiwi Pawulo awogiliye wi ohikanna nroromelo ‘yothega enanikwakwathusa.’ (Heb. 12:1) Wihina nroromelo nehu nihiridhe, nnohowela opendda malabo aamatene dhithu dhinanthukulele okanna ebaribari wi elabo exa mohilegela eneere ofiya. — Heb. 11:1.

3. Dhithu baani nnafunihu woona ohudhera wula?

³ Ohudhera wula nnere woona dhithu tharu dhinanikavihere olibiha nroromelo nehu wodhela mpaganyo anivahile Yehova wa elabo exa: (1) Opendda wodhela woboliwa, (2) wubuwela kopolo anna Yehova ni (3) wapara mabasa omuzimuni. Namala nnere woona makalelo muthenga Yehova anvahiliye Abakuki onalibihiwa nroromelo nehu peeno. Mbwenye vobajha, nnere woona wi nnohowela okanna nroromelo nooliba wihina naande wagonjhiha makathamiho enanifwanya peeno.

MUDHIDHI NNAHOWELIHU OKANNA NROROMELO NOOLIBA

4. Nnohowela okanna nroromelo nooliba wihina nerena dhothoma dhapama?

⁴ Malabo aamatene nnohowela werana dhothoma, dhimodha sokweya, mbwenye dhimodha dhinlubale. Ethu enanikavihera werana dhothoma dhapama, fuudhela okanna nroromelo nooliba. Motajhiha, malabo aamatene nnowerana dhothoma wodhela wandana, waredha, makalelo oolela, matelo, okanna ahima ni mabasa. Yere okala yapama wikoha. “Dhosakula dhaaga dhinowoniha wi gihikanna ebaribari wihina elabo ela enere ofiya omakuthulo? Obe dhosakula dhaaga dhinoniha wi ginorumedha monelo waathu amwilaboni enihina athu kinadha akalagawo ni mukalakala?” (Mat. 6:19, 20; Luc. 12:16-21) Nalibiha nroromelo nehu wodhela orumedha wi elabo exa ehaaddamela, nnere wanda werana dhothoma dhapama.

5-6. Mwahaya bwaddi nigahowela okanna nroromelo nooliba nafwanyiwaga makathamiho? Owoge yotajhiha.

⁵ Iyo nnohowela okanna nroromelo nooliba wihina naande owanana dhoweha. Podi weera ninna ofwanyiwa makathamiho wodhela oharahariwa obe nihikanna oredda wahinna murombwe ni dhithu dhimodha dhinanuukula. Omabajhowene iyo podi wubuwelaga wi nnere wanda owanana. Mbwenye makathamiho ala yahimalaga nnere ohowela okanna nroromelo nooliba wihina naande ovilela ni odhowagave nimparelaga mabasa Yehova nuuhagalala. — Rom. 12:12; 1 Ped. 1:6, 7.

⁶ Naafwanyiwaga dhoweha dhorusa owanana, iyo podi wubuwelaga wi elabo exa apaganye Yehova kinadha efiya. Nerege eyo enatapulela wi nroromelo nehu neere oridha? Podi wera naari. Kabiha wubuwela yotajhiha ela: Vaari va mweri dhooridha we podi wubuwelaga wi elimwe kinadha efiya. Mbwenye elimwe enofiyesa yaka dhatedhene. Mwamakalelo mamodhave, nathabwa wukuuwa, iyo podi wubuwelaga wi elabo exa kinadha efiya. Mbwenye nroromelo nehu nakala nolibanene, nnere okanna ebaribari wi mpaganyo dha Yehova dhinere wakwanela. (Sal. 94:3, 14, 15; Heb. 6:17-19) Nakanna ebaribari ela, omwebedha wehu Yehova wineere okala wathima mwigumi mwehu.

7. Mubuwelo baani wabure nnahowelihu okala pasope?

⁷ Nnohowela okanna nroromelo nooliba wihina nilaleye. Athu owinjhiva nnalaleyihu enubuwela wihina “muthenga dhapama” dhinawoga wodhela elabo exa, dhihithabwa owoma, bumwahaya kadhinadha dhaakwanela. (Mat. 24:14; Eze. 33:32) Mbwenye kanihiye mubuwelo waathu onivolowela. Vano wihina mubuwelo waathu wahinivolowele, nnere ohowela olibiha nroromelo nehu. Kabeni noone makalelo mararu owerana eyo.

OPENDDEGE WODHELA MUKUTHO

8-9. Mwahaya bwaddi opendda wodhela mukutho ogalibiha nroromelo nehu?

⁸ Makalelo oobajha oolibiha nroromelo nehu fupendda wodhela mukutho. Mukutho ethu enanivaha ebaribari wihina Mulugu anere wakwanihedha mpaganyo dhaye dhatedhene. Wubuwela ethu emuthukulele Yehova onivaha mukutho ni dhithu dhatedhene oliye eriliyena, enere olibiha nroromelo nehu nowihina Mulugu anere wakwanihedha mpaganyo waye wonivaha egumi yohimala mwilaboni yavati. Mwahaya bwaddi nigubuwela ndo?

⁹ Wihina Yehova anivahe mukutho, oliye omuruma mwanaye athabwiye omudhivela wihina abaliwe mwilaboni yavati ninga muthu oologomana. Yesu agaali mwilaboni yavati, ahifwanyiwa makathamiho oorusa. Nuwindo, oliye okwa vantxikwani na goyi. Mwebaribarene, Yehova ohuliva muthengo munlubale! Yehova Mulugu keenye wihina mwanaye oonihiwe goyi, ofiyedha okwa vantxikwani wihina nikanne mwanegumi ya malabo vang’onove. (João 3:16; 1 Ped. 1:18, 19) Woona wihina Yehova ohuliva muthengo munlubale, oliye anere werana dhatedhene wihina nikanne egumi yohimala mwilaboni yavati.

OPENDDE WODHELA KOPOLO DHA MULUGU

10. Mowiwanana ni Efésios 3:20, Yehova anna kopolo dhowerana ddi?

¹⁰ Ethu yanabili nnahowelihu werana wihina nlibihe nroromelo nehu fupendda wodhela kopolo dha Yehova. Oliye ohukanna kopolo dhowakwanihedha dhatedhene anapaganyiye. Ebaribari wihina monelo waathu kinandeya okanna egumi yohimala mwilaboni exa. Teto Yehova anapaganyesa dhithu athu ehinandiwa werana. Mbwenye, oliye podi werana dhatedhene anafuniye. (Jó 42:2; Mar. 10:27) Kunahagalala onona wi Yehova ononipaganya dhithu sapama! — Omwileri Efésios 3:20.

11. Kawogamo mpaganyo Mulugu aakwanihedhiye, monelo waathu wakala ninga kadhinandeye. (Osugwe kaxa “Mpaganyo dhimodha dhotikiniha dhakwanenle.”)

¹¹ Kabeni noone dhithu Yehova aapaganyiliye nlogo naaye dhakala ninga kadhinandeye wakwanela. Oliye ahimpaganya Abarawu ni Sara wihina naarive eguluvale, yere ombala mwaana. (Gén. 17:15-17) Teto, owoga wihina eere ovaha odhuulu wa Abarawu elabo yoKana. Mpaganyo oyo wakala ninga kuwakwanele, woona wihina amwaana Ezarayeli yaali odhulu wa Abarawu, yaali adhaari elabo Yowijipitu muwari mwa yakadhene. Mbwenye, naarive dhigali ndo, mpaganyo ola wahakwanela. Nuuvira yaka, Yehova owoga wihina muhiyana dhaala owuluvala ithaniwa Elizabeti eere okanna mwaana. Teto, opaganya wihina Mariya, namwali aali ahinagonege ni mulobwana, eere ombala mwaana a Mulugu. Nuwindo, wakwanihedha mpaganyo Yehova eeriliyena yaka dha mundduli, omunddani wo Ideni—ela yovuhulela emodha yakwanenle — Gén. 3:15

12. Yolebela ya Josué 23:14 ni Isaías 55:10, 11, enoniha ddi wodhela kopolo dha Yehova?

¹² Naapenddaga wodhela mpaganyo aakwanihedhe Yehova, nnokanna ebaribari wihina mpaganyo eeriliyena wodhela elabo exa onere wakwanela. (Omwileri Josué 23:14; Isaías 55:10, 11.) Ndo, nnere okala owiwegeredhene wihina nakavihere athu amodha wonelamo wihina mpaganyo wa elabo exa bwebaribari. Mwinnyene Yehova ohuwoga wodhela elabo yavati ni odhulu wixa egihina: ‘Madhu ala boororomeleya ni beebaribari.’ — Apo. 21:1, 5.

OJHEGE MUDHIDHI NI DHITHU DHOMUZIMUNI

13. Mutugumano dhinalibiha aavi nroromelo nehu?

¹³ Ethu yanatharu enanikavihere olibiha nroromelo nehu fuujha mudhidhi ni dhithu dhomuzimuni. Motajhiha, kubuwela wodhela mutugumano dhehu. Murogola dhaala anithaniwa Ana, aakavihere mabasa oohiyana-hiyana a mudhidhi watene anowoga egi: “Mutugumano dhili ninga ankora, dhinalibiha nroromelo naaga ni dhinagikavihera okala mento. Naarive ddibila anawoga mwaha ehimukweyelaga ohudhiha mwamakalelo okweya obe ahiwogaga dhithu dhixa, dhikalawo dhithu anasorihiye dhinaagikavihera omoonelamo Bibiliya, eyo enolibiha nroromelo naaga.”b Teto, nroromelo nehu nnooliba ni dhowakula dha addibilihu.— Rom. 1:11, 12; 10:17.

14. Mabasa oolaleya enanikavihera aavi olibiha nroromelo nehu?

¹⁴ Wapara mabasaya oolaleya enolibiha nroromelo nehu. (Heb. 10:23) Murogola dhaala anithaniwa Bárbara, anamulabela Yehova muwari mwa yaka 70 anowoga egi: “Wapara mabasa oolaleya, winolibiha vanlubale nroromelo naaga. Gaawogaga naathu amodha wodhela mpaganyo dhohagalasa dha Yehova, nroromelo naaga nnakala nolibanene.”

15. Ohudhera wavayeka winalibiha aavi nroromelo nehu? (osugwe fotu.)

¹⁵ Ethu emodha enalibiha nroromelo nehu fuhudhera wavayeka. Murogola dhaala anithaniwa Susan ohanona malabo anahudheriye. Motajhiha, oliye anihina: “Domingu, ginegeredha ohudhera wa Namasugwera wa sumana enaharela. Txiposi ni Txipili, ginegeredha ohudhera wa vaari va sumana. Malabo mamodha a vasumanani, gihikanna ohudhera wavayeka.” Mwaha wawegeredha malabo oohudhera, murogola Susan anolibiha nroromelo naaye. Murogola dhaala anithaniwa Irene anakavihera o Sede Mundiyale muwari mwa yakadhene, anowoga wihina ohudhera wodhela dhovuhulela dha mBibiliyani winolibiha nroromelo naaye. Oliye anowoga egi: “Ginotikina vanlubale makalelo dhovuhulela dha mBibiliyani dhinakwaneliwa ni dhithudha dhing’ono.”c

“MOHANGANYEDHA, ENERE WAKWANELA”

16. Mwahaya bwaddi nigawoga wihina madhu Yehova amwaddenliye Abakuki enonikavihera ni iyowa peeno? (Hebreus 10:36, 37)

¹⁶ Adhaari amodha a Yehova enna ojheha omakuthulo wa dhithu ndha dhabure muwari mwa yakadhene. Monelo waathu, podi okalaga ninga mpaganyo ndha dhinna olegela wakwanela. Mbwenye Yehova ohunona makalelo eli adhaari aye. Oliye ohuwoga nnamavuhulela Abakuki egihina: “Mwaha dhowoona, dhinere wakwanela mudhidhiya wafiya. Mudhidhiya onna othamagela omakuthulo wa dhithu dhatedhene, kunalegele ofiya. Podive verege olegela, odhowegeve ojhehaga! Mwebaribarene dhinere wakwanela mohihiyedhedha. Kunaagonela ofiya!” (Hab. 2:3) Yehova aawonge madhu ala wihina amulibihe baahi Abakuki? Obe enonikavihera ni iyowa peeno? Murumiwi Pawulo, ahalebela madhu mamodhave makiristawu enna ejhehedho yodhowa mwilaboni exa. (Omwileri Hebreus 10:36, 37.) Bumwahaya, naarive ekalaga ninga mpaganyo ndha dhinna olegela wakwanela, nikanne ebaribari wihina “mohanganyedha enere wakwanela. Kinalegele!”

17. Murogola dhaala anaparihedha aavi yolaga Yehova anvahiliye Abakuki?

¹⁷ Addibila owinjhiva, enna oparihedha mabasa yolaga ya Yehova yojheha wakwanela wa mpaganyo dhaye muwari mwa yakadhene. Motajhiha, murogola dhaala anithaniwa Louise, abanjhe omulabela Yehova okuma yaka ya 1939 anowoga egi: “Mudhidhi yole miyo gubuwela wihina Armajedo eere odha gahinamarihe ohudhera oskola. Mbwenye kahiyene epadduwe. Ethu enathabwa ogikavihera muwari mwa yaka ndha dhivirile fupendda dhopadduwa dha mBibliyani dhinawoga wodhela athu yahowela ojheha wihina Yehova aakwanihedhe mpaganyo dhaye — ninga Nowe, Abarawu, Juze naathu amodha. Odidelave ojheha winogikavihera ni winowakavihera athu amodha okanna ebaribari wihina elabo exa ehaddamela.” Mohanganyedha, addibila enamulabela Yehova okuma kale enowarumedha madhu aawogile murogola ola!

18. Osugwa dhopaddusa winalibiha aavi nroromelo nehu nowihina elabo exa enere okalawo?

¹⁸ Ebaribari wihina elabo exa kinathi okalawo. Motajhiha, kubuwela wodhela dhithu dhiliwo — ninga thendderi, muthanko, anenyama naathuya. Kaavo anera dhithu ndha kadhiwo, mbwenye dhihinapaddusiwe kadhaliwo. Dhikalelewo mwaha Yehova dipaddusile. (Gén. 1:1, 26, 27) Mulugu ohupaganya odhana elabo exa, nihikanna ebaribari wihina anere wakwanihedha mpaganyo oyo. Aakwanihedha mpaganyo waye, athu enere okanna egumi yologomana ya malabo aamatene. Mudhidhi wa Yehova wafiya, elabo exa enere okalawo ninga dhithu dhimodha dhiliwo dhinaapenle. — Isa. 65:17; Apo. 21:3, 4.

19. Onaalibihe aavi nroromelo nawo?

¹⁹ Njhehaga elabo exa, nnohowela olabihedha pama mudhidhi ninnihuna wihina nlibihe nroromelo nehu. Otamalelege mukutho. Openddege wodhela kopolo dha Yehova. Teto, ojhege mudhidhi ni dhithu dhomuzimuni. Ndo, onere okala mwimodhani naale “mwaha wa nroromelo ni ovilela ehakela mpaganyo.” — Heb. 6:11, 12; Rom. 5:5.