Nnahudhera ddi ni makarta menddi a Peduru?

1. Mulugu aamulabihendhe aavi murumiwi Peduru ahalaga neena nuukwa?

MURUMIWI Peduru ahinona wihina mohilegela eere okwa. Muwari mwa yaka dhatedhene amulabeliye Yehova nuroromeleya, oliye aheedda ni Yesu aaparaga mabasa oolaleya, ahawambela mabasa olaleya mburo dhohiyanahiyana ni ahikosa epaddi ya nikuru nolamulela. Mbwenye mabasa a Peduru yaali yahinathi omala. Muwari mwa yaka 62 ofiyedha 64 M.W., Murumiwi Peduru ahivetheliwa wihina aalebe makarta menddi, peeno eli malivuru amBibiliyani a 1 ni 2 Pedro. Peduru afuna wihina makarta aye yaakavihere makiristawu naarive oliye agakwile. — 2 Pedro 1:12-15.

2. Mwahaya bwaddi nigawoga wihina makarta a murumiwi Peduru yaalebiwe mudhidhi wofwanelela?

² Murumiwi Peduru aavetheliwe waleba makarta aye menddi mudhidhi addibila owinjhiva yaaliwa osegedheyene mwaha wa ‘makathamiho owinjhiva yaafwanya.’ (1 Ped. 1:6) Alobwana dhaala yanna efunelo yabure, yosayela otakaliha mulogo ni dhohudhiha dhowoota vamodha ni mweddelo wonyakavala. (2 Ped. 2:1, 2, 14) Ohiya eyo makiristawu yahinona wi ‘omakuthulo wa dhithu dhatedhene’ weere ofiya mohilegela, obe neere aRomano yeere ogujhula luwani yoJeruzale ni onamathonga waatene wa maJudewu were omala. (1 Ped. 4:7) Makarta a murumiwi Peduru yahakavihera makiristawu onona ethu baani yahoweliwa wera, wihina yaande wawanana makathamiho ale ni wawanana makathamiho yaadhege osogolo.b

3. Mwahaya bwaddi nigahowela wapwasedha wahudhera makarta a murumiwi Peduru?

³ Ebaribari wihina murumiwi Peduru aalebele makarta ala makiristawu a mudhidhi yole. Mbwenye Yehova ohenya wihina makarta ala elebiwe mBibiliyani. Bumwahaya ni iyoya podi ohudhera vanlubale ni makarta ala. (Rom. 15:4) Iyo nnakala elabo yonyakavala, teto naapeliwe ni athu ehinamulabela Yehova. Mwaha wa yeyo nnofwanyiwa makathamiho ohiyanahiyana, teto malabo mamodha podi okala yorusa omulabela Mulugu. Ohiya eyo, mohulegela nnere ofwanyiwa mahoso manlubale opitha ale yaanfwanye maJudewu mudhidhi luwani yoJeruzale egujhuliwaga. Bumwahaya dholaga dhinafwanyeya mmakartani a Peduru dhinonipatha vanlubale. Mwaha enonikavihera ojheha nlabo na Yehova, ogonjhiha wawoova athu ni wonihana odhivela webaribari mmodha ni mukwaye. Dholaga ndho podi wakavihera anamaholela mulogo wasamalela mambila a Mulugu.

ODIDELE OJHEHA

4. Mowiwana ni 2 Pedro 3:3, 4, ethu baani yaaridhihe nroromelo nehu?

⁴ Iyo naapeliwe naathu yahinarumedha dhovuhulela dha mBibiliyani. Amodha enoniteya mwaha nnowoga wodhela omakuthulo wa elabo muwari mwa yakadhene. Amodhaya enoninyoza ewogaga wi omakuthulo kunadha ofiya. (Omwileri 2 Pedro 3:3, 4.) Nroromelo nehu podi othikeya nawogeliwaga madhu ninga yaala nakala mmabasani oolaleya, ni mukwihu oomabasani obe naamudhihu. Mbwenye murumiwi Peduru anowoga ethu enanikavihera nawogeliwa madhu ninga yaala.

5. Ethu baani enaanikavihere ojheha nuuvilela omakuthulo wa elabo ela? (2 Pedro 3:8, 9)

⁵ Athu owinjhiva podi wubuwela wi Yehova anoothabwa olegela omariha obure onafwanyeya mwilaboni yavati. Mbwenye madhu a murumiwi Peduru enonikavihera okanna moonelo wapama, mwaha enonubusedha wi makalelo Yehova anooniye mudhidhi bohiyana ni makalelo athu enooniwa. (Omwileri 2 Pedro 3:8, 9.) ‘Wa Yehova, yaka txikwi enakala ninga nlabo nimodha. Mbwenye oliye onovilela ni nyu, mwaha kanafuna wi muthu di muthu agujhuliwe.’ Mbwenye wafiya mudhidhi wofwanelela, Yehova aneere omariha obure wateene. Iyo nihikanna gari enlubale yolabihedha mudhidhi ohanlewo wihina naalaleye athu eelabo yaatene yavati.

6. Nnahowela nere ddi negi nihidduwale nlabo na Yehova? (2 Pedro 3:11, 12)

⁶ Murumiwi Peduru anonikongomedha ohidduwala nlabo na Yehova. (Omwileri 2 Pedro 3:11, 12.) Nnande aavi werana eyo? Yandeyaga, sapama wubuwelelaga kadda labo mareeliho nnafunihu okanna elabo exa. Onowabihaga wubuwela ogaali mburo woriya vanlubale, nivumaga muya wa pama, nlawihaga yoojha yodhiva ni nawakelaga amudhihu naakwihu ekwile? Obe naahudhihaga matxikwi ni matxikwi aathu ekwile kale makalelo dhovuhulela dha mBibiliyani dhakwaneliwa? Wawubuwela mareeliho yaala, podi onikavihera iyo ojhehagave nlabo na Yehova ni okanna ebaribari wihina nihithabwa waddamela. Nanona ovanene mareeliho nnafunihu wawakela osogolo, kannapupurusiwe ni dhowoota dha elabo ela. — 2 Ped. 3:17.

OGONJHIHE WAWOVA ATHU

7. Wawoova athu winanipatha aavi?

⁷ Iyo nihinona wihina nlabo na Yehova nihithabwa waddamela. Bumwahaya nnafuna niilibihedhe werana ndhe nnandihu wihina naalaleye athu amodha muthenga dhapama. Mbwenye malabo mamodha iyo podi oyelela oliba murima. Mwaha waddi? Mwaha malabo mamodha iyo podi woovaga ndala ninga Peduru. Emahiyu Yesu atorihiwaga, Peduru ahova owoga wihina aali namahara a Yesu, teto ahimukodda dila tharu. (Mat. 26:69-75) Mbwenye Peduru ahanda ogonjhiha woova, teto vasogolova oliye oleba ni ebaribari yatene egi: ‘Kamwawove newene kamuthuwathuwe.’ (1 Ped. 3:14) Madhu a murumiwi Peduru enonivaha ebaribari wihina iyo podi wanda ogonjhiha wawoova athu.

8. Ddiniyani enaanikavihere ogonjhiha owoova athu? (1 Pedro 3:15)

⁸ Ethu baani enaanikavihere ogonjhiha wawoova athu? Murumiwi Peduru ohuwoga egi: ‘Mmuthithimihege Kiristu mmurimani mweenyu.’ (Omwileri 1 Pedro 3:15.) Eyo enovolowelavo wubuwela owedha anna Nabuya ehu Yesu Kiristu ali Mwene a Omwene wa Mulugu. Wakanna ofuru wowoga wodhela muthenga dhapama naathu amodha, onowambela woova obe ogurumela? Eyo yapadduwa, omubuwelege Yesu alamulaga odhulu agaapeliwe ni angero owinjhiva. Kuddiwale wihina oliye “ohuvahiwa onamathonga watene odhulu ni elabo yavati.” Teto oliye ohupaganya egi: “Gili ni nyu malabo aamatene, ofiyedha omakuthulo wa elabo.” (Mat. 28:18-20) Murumiwi Peduru anonikongomedha okala owiwegeredhene wihina nande obarela dhithu dhinarumedhihu. Weere odhiveliwa omulaleyela mukwawo oomabasani, ooskola obe muthu di muthu wanfwanyiwe mburo mmodhaya? Orajhihe wubuwela mburo baani wafuniwe werana eyo ni wegeredhe ethu onafuniwe owoga. Olobele wihina okale ooliba murima ni ororomele wihina Yehova aneere wukavihera wanda ogonjhiha wawoova athu. — Atos 4:29.

“MUDHIVELANEGE PAMADHENE”

9. Mudhidhi baani murumiwi Peduru aahiyiliye woniha odhivela naaddibila?

⁹ Peduru ahihudhera makalelo owoniha odhivela. Oliye ahikalavo Yesu nuwoga egi: “Ginowuvahani nlamulo nixa: Mudhivelanege mmodha ni mukwaye; ninga guudhivelimini, mudhivelanege ndala.” (João 13:34) Nuuvira mudhidhi, mwaha owaddihedhiwa Peduru koonihile odhivela. Oliye ahikoodda ojha ni makiristawu yahali maJudewu. Murumiwi Pawulo owoga wi ekalelo ele ya Peduru waali ‘ogwalagwambi.’ (Gál. 2:11-14) Peduru ahirumedha osumululiwa wule ni ohudhera ethu yathima. Mmakartani aye amenddene oliye ohuwoga wi iyo kannahowela owoga baahi wi nnowadhivela addibilihu, mbwenye nnohowela woniha ni dhowera dhehu wihina nnowadhivela.

10. Enaanikavihere ddi wooniha “Odhivela wooddibila wohikanna ogwalagwambi?” (1 Pedro 1:22)

¹⁰ Murumiwi Peduru ohuwoga wi nnohowela okanna ‘odhivelana wooddibila wohikala wogwalagwambi.’ (Omwileri 1 Pedro 1:22.) Wihina nikanne odhivela wula wooddibila nnohowela ‘wiwelela ebaribari.’ Ebaribari eyo enovolowelavo ohidduwala wi ‘Mulugu kanna nsakulo.’ (Atos 10:34, 35) Iyo kannande wiwelela nlamulo na Yesu wula naasakulaga addibilaya owawoniha odhivela. Ebaribari wihina iyo podi othabwa wandana naathu amodha, ndala ninga Yesu aathambwiye wandana ni arumiwi amodha. (João 13:23; 20:2) Mbwenye Peduru anonubusedha wi nnohowela wilibihedha wadhivela addibilihu ni arogolihu ndala ninga nnaadhivelihu amudhihu. — 1 Ped. 2:17.

11. Enavolowelavo ddi “wadhivela pamadhene athu amodha ni murima wamutene?”

¹¹ Murumiwi Peduru ohoniha wihina sathima ‘odhivelana pamadhene mmodha ni mukwaye ni murima wehu watene.’ Mowiwanana ni madhu yala, ‘odhivelana pamadhene’ enatapulela omudhivela muthu naarive erusaga omoniha odhivela. Motajhiha, weere ddi ahere ddibila awoga ethu obe aherena ethu yupihe mbani? Podi wera ethu yobajha wuubuweliwe yakale omuwelihedha kunyawunya ohiya wooniha odhivela. Peduru ahihudhera ni Yesu wihina makalelo yala owerana dhithudha kinamuhagalasa Yehova. (João 18:10, 11) Murumiwi Peduru ohuleba egihina: ‘Kuwelihedhe obure ni obure, newene oruwaniwa ni oruwana. Ohiya eyo, mwaareelihege.’ (1 Ped. 3:9) Naadhivelaga addibilihu ni arogolihu ni murima wehu wamutene, nnere wanda waweddiha athu aatene nuupama ni wanda wawonelamo naarive nigatakaleliwe.

12. (a) Wadhivela pamadhene athu amodha winanikavihera wera ddi? (b) Mowiwanana ni vidiyu Mantenha a União Cristã, ethu baani onahoweliye wilibihedha werana?

¹² Karta naye noobajha, murumiwi Peduru ohalabihedha madhu owi ‘mudhivelanege pamadhene.’ Odhivela wula winonikavihera olevelela ohiya yothega modha baahi, mbwenye ‘dhotega dhowinjhiva.’ (1 Ped. 4:8) Podi wera Peduru ubuwela ethu Yesu awogiliye yaka dha mundduli wodhela olevelela. Mudhidhi yole Peduru ubuwela wi owooniha opama nuwoga wi, ddibila oohowela omulevelela mukwaye dila “dhowakwana tanu nabiili.” Mbwenye Yesu omuhudhiha Peduru vamodha ni iyo aatene wihina naalevelege athu amodha “okunamo dila 77.” Obe neere, malabo amatene yahoweleyaga. (Mat. 18:21, 22) Akala enowurusa oparihedha mabasa yolaga ela, kuwukuwe! Iyo aatene enonirusa olevelela malabo mamodha. Yathimaya fuwilibihedha wihina omulevelele ddibilo wihina muhogolowele wandana.c

ANAMAHOLELA MULOGO MUSAMALELEGE PAMA MULOGO

13. Mwahaya bwaddi ekala ethu yorusa anamaholela mulogo opatha mudhidhi wihina yaalibihe addibila?

¹³ Mohanganyedha Peduru kanadduwalege ele Yesu aawogiliye nuvenyihiwa muukwani: ‘Waasamalele mambila aaga.’ (João 21:16) Akala we oli namaholela mulogo we ohunona pamadhene wihina madhu ala enowupatha, ebaribari wihina podi okala ethu yorusa namaholela mulogo opatha mudhidhi wihina akwanihedhe mutholo ola wathima. Anamaholela mulogo enohowela osamalela emudhi yewa epaddi yomwiilini, yomubuweloni ni yomuzimuni. Ohiya eyo aliwa enohowela okala yotajhiha yapama mmabasani oolaleya ni wegeredha pama dhipaddi dhewa dhomutugumanoni ni dhomusonkanoni. Amodha ehikanna mutholo wookavihera Komisawu enakavihera mabasa Oospitale, obe enokavihera Departamentu dhomaga Nyumba dha Omwene vamuruddani vewa. Mohanganyedha anamaholela mulogo alobwana oopinyaminyeya ni mabasa!

14. Ethu baani enaakavihere anamaholela mulogo wakukula mambila a Mulugu? (1 Pedro 5:1-4)

¹⁴ Murumiwi Peduru anowakongomedha anamaholela mulogo egi: ‘Mwaakukulege mambila a Mulugu.’ (Omwileri 1 Pedro 5:1-4.) Akala we oli namaholela mulogo, iyo nihinona wi onowadhivela vanlubale addibila ni onofuna wakavihera. Mbwenye malabo mamodha we podi okala oopinyaminyeya obe okala oogomene ofiyedha ohanda wakwaneliha mutholo wawo. Akala siyeyo enupadduwela onere ddi? Omwaaddele Yehova makalelo oliwe. Murumiwi Peduru ohuleba egi: ‘Muthu anavahiwa mabasa aaparege mabasaya ni kopolo anavahiwiye ni Mulugu.’ (1 Ped. 4:11) Addibila podi ofwanyiwaga makathamiho enaamale baahi navolowa elabo exa, mbwenye kudduwale wihina “namakukula munlubale,” Yesu Kiristu podi wakavihera addibila wupitha we. Oliye podi werana eyo mwilaboni yela obe mwilaboni exa. Ethu Yehova anafuniye wihina anamaholela mulogo yeregena fuwadhivela baahi addibila, wakukula ni okala “yotajhiha yapama vamentoni vewa.”

15. Ni makalelo baani namaholela mulogo dhaala anakukuliye mulogo? (Osugwe fotu.)

¹⁵ William, ali namaholela mulogo muwari mwa yakadhene, ohunona thima yowakukula addibila. Mutipa wa koronaviru nubajha, oliye vamodha ni anamaholela mulogo amodha yahilibihedha wihina emuligarige kadda ddibila a nikuru newa, oliye anowoga ethu yamuthukulela waligarela addibila ala egi: “Addibila owinjhiva yakala yekiwa vaade. Mwaha wa yeyo, yaali yokweya aliwa obajha okanna mubuwelo wabure.” Ddibila aafwanyiwaga makathamiho William anopwasedha onvuruwana wihina oonelemo pama makathamiho enanfwanya ni ethu anahoweliye, amala anowasayela malivuru obe vidiyu enafwanyeya musayitini wihina amulibihena ddibila ole anafwanyeya makathamiho. Oliye anowogave egi: “Vano enohoweleya vanlubale wakukula addibila. Iyo nnowilibihedha vanlubale wihina naakavihere athu wihina emunone Yehova, bumwahaya nnohowela wilibihedha ni makalelo mamodhave wihina naakavihere addibilihu okalave mwibaribarini.”

WEENYE WIHINA YEHOVA UXAGIHE

16. Nnaparihedhe aavi mabasa dholaga nnahudherihu ni makarta a murumiwi Peduru?

¹⁶ Ofiyedha vala, nihihudhera vang’ono wodhela makarta menddi a murumiwi Peduru. Podi wera ohona ethu onahoweliye owomihedha mwigumini mwawo. Motajhiha, were odhiveliwa wubuwelela dila dhowinjhivadhene wodhela mareeliho nnafunihu wawakela elabo exa? Were odhiveliwa okanna yoluba yowahudhiha akwawo ooskola, oomabasani ni athu amodha onaafwanyiwe mburo mmodhaya? Onowanda woona makalelo owadhivela pamadhene addibila ni arogola? Ki nyu anamaholela mulogo muhumala wiikoma wihina mwaakukule mambila a Yehova ni murima weenyu watene? Podi wera ehikalawo epaddi onooniwe wihina enohoweleya owomihedha mwigumini mwawo, naarive dhigaali ndo kuhiye eyo wukwerebeyiha. ‘Nabwiya dapama,’ Oliye anere wukavihera wawerana masadduwo enahoweleya. (1 Ped. 2:3) Murumiwi Peduru ohuniroromeliha egi: ‘Mulugu . . . onere omala wuhudhihani. Oliye anere wukaviherani okala owikomeene, oliye anere wulibihani, oliye anere wukaviherani okala txithi.’ —1 Ped. 5:10.

17. Mareeliho baani nnawakelihu navilela ni namuhiya wihina Yehova anixagihe?

¹⁷ Vobajhavene Peduru uubuwela wihina kafwanelela okala ni Yesu. (Luc. 5:8) Mbwenye nnikavihero ni odhivela wa Yehova vamodha ni mwanaye Yesu, Peduru ahivilela ni ahididela okala namahara a Yesu Kiristu. Yokumelelavoya sowihina Yehova ohenya wihina Peduru ‘akanne ofuru wovolowa Mumweneni wamukalakala wa Nabuyihu ni Nvulusi ehu Yesu Kiristu.’ (2 Ped. 1:11) Ala mareeliho manlubale! Wavilela ndala ninga Peduru ni warumedha oxagihiwa ni Yehova, ni weya onere wawakela mareeliho a egumi yohimala. Ni makalelo yala onere ‘wakwanihedha yoluba ya nroromelo nawo, wili ovulusiwa wa egumi yawo.’ — 1 Ped. 1:9.