OHUDHERA 37
Omuroromele Yehova, ndala ninga Sansawu
‘Nabwiya Yehova, namathonga Munlubale, kamwerena, gubuweleni ni givaheni kopolo.’ — JUÍ. 16:28.
JHIBO 30 Mulugu aaga, mukwaaga ni babi
DHITHU NNAAHUDHERIHUa
1-2. Mwahaya bwaddi ekala yapama ohudhera wodhela Sansawu?
ETHU baani onubuweliwe wiwaga ndina na Sansawu? Mohanganyedha, ethu yobajha enadha mmubuweloni mwawo sowihina Sansawu aali mulobwana akopolo. Eyo ebaribari, mbwenye oliye aherana dhothoma dhabure. Mwaha wa yeyo ahifwanyiwa makathamiho. Mbwenye naarive dhigaali ndo, Yehova aapwasendhe osugwa dhithu dhapama erilena Sansawu. Yehova ohenya wihina yopadduwa yaye elebiwe mBibiliyani wi enikavihere.
2 Yehova ahimulabihedha Sansawu wi eerena dhithu dhotikiniha wihina aakavihere amwaana Ezarayeli. Nuuvira yakadhene Sansawu agakwile, Yehova onvethela murumiwi Pawulo oleba ndina na Sansawu va listani naathu yonihile nroromelo nooliba. (Heb. 11:32-34) Yopadduwa ya Sansawu podi onlibiha. Oliye ahimuroromela Yehova naarive afwanyiwaga makathamiho owinjhiva. Nnere woona makalelo yopadduwa ya Sansawu enanilibihiwa ni dhithu nnafunihu ohudhera ni yopadduwa yaye.
SANSAWU AHIMUROROMELA YEHOVA
3. Mutholo baani aakenle Sansawu?
3 Sansawu aabaliwe mudhidhi mafilistewu yawonihiwa goyi amwaana Ezarayeli. (Juí. 13:1) Mafilistewu yaali athu abure, bumwahaya amwaana Ezarayeli yothabwa woona goyi. Yehova ahimusakula Sansawu wihina awobole amwaana Ezarayeli mmadani mwaafilistewu. (Juí. 13:5) Eyo kiyakale ethu yokweya! Wihina Sansawu ande wakwaneliha mutholo ole, oliye ohowela omuroromela Yehova.
Sansawu ahimuroromela Yehova ni aherana dhithudha mowaguva. Oliye ahilabihedha ele anniyena wihina akwanihedhe efunelo ya Mulugu (Osugwe ddima 4-5)
4. Yehova aamukavihenre aavi Sansawu ovuluwa mmadani mwaafilistewu? (Juízes 15:14-16)
4 Kabeni noone yopadduwa enoniha wi Sansawu oomuroromela Yehova ni aanda werana dhithudha mwaha wa nikavihero na Yehova. Nlabo nimodha, atoropa amafilistewu odhowa oLeyi, elabo yooJuda, wihina emmage Sansawu. Alobwana ooJuda obajha woova, mwaha wa yeyo aliwa othoma ompeleka Sansawu mmadani mwaafilistewu. Nlogo naye ommaga ni kabala biili dhixa ni ompeleka mmadani mwaafilistewu. (Juí. 15:9-13) Mbwenye ‘muzimu wa Yehova onvaha kopolo’ ofiyedha oliye wanda opadha kabala ndhe biili. Naali labo nenne Sansawu aathukunliye nikuva nikiti na mulomo wa buru ni waapana mafilistewu owakwana 1 000! — Omwileri Juízes 15:14-16.
5. Sansawu oonihile aavi wihina oomuroromela Yehova mwaha olabihedha nikuva na mulomo wa Buru?
5 Mwahaya bwaddi Sansawu adhe alabihedhege nikuva na mulomo wa buru? Mwaha oliye ahinona wi ethu-sithu aalabihedhiye ninga futhi, Yehova eere omukavihera wihina dhaye dhimwedele pama. Mulobwana ola oororomeleya ahilabihedha ethu anniyena mudhidhi yole wihina aakwanelihena efunelo ya Yehova. Mwebaribareene Sansawu ahireelihiwa labo nenne ni ahanda wagonjhiha mafilistewu ale mwaha omuroromela Yehova.
6. Yopadduwa ya Sansawu enanivaha ebaribari baani?
6 Yehova podi onivaha kopolo wihina nande wakwaneliha mutholo bu mutholo ni ndhedha dhinakala ninga dhorusa wakwaneliha. Teto Mulugu podi werana eyo mwamakalelo enanitikiniha. Bumwahaya omuroromele Yehova. Ndala ninga anvahiliye kopolo Sansawu, Oliye aneere wukavihera wakwaneliha efunelo yaye wamuroromela ni waloba nikavihero naye. — Pro. 16:3.
7. Owoge yopadduwa enoniha wihina sathima osayela dhoholela dha Yehova.
7 Addibila ni arogola owinjhiva enaapara mabasa oomaga a nikuru na Yehova, enowoniha wi enomuroromela Yehova. Kale, addibila yamaga yekiwa nyumba dhomwene ni perediyu dhimodha dha munikuruni. Mbwenye nuuvira mudhidhi nikuru na Yehova wunnuwa vano ohowelaga wawerana masadduwo. Addibila enaaholela mabasa ala oomaga, osayela dhoholela dha Yehova ni waaxixa makalelo mamodha, ninga motajhiha, ogula perediyu dhimagiwe ni owomihedha. Ddibila Robert, aapanre mabasa ala oomaga yaka ndha dhogomihedha wapela elabo yatene, anowoga egi: “Omambelelowene kiyaali yokweya warumedha masadduwo ala, mwaha dhithudha dhahithabwa ohiyana ni ndhe neerihuna kale. Mbwenye addibila yahirumedha ni murima wewa wamutene okavihera masadduwo ala. Nnowanda woona wi Yehova anna wakavihera masadduwo ala.” Ela yotajhiha modha enoniha wi Yehova anna oholela nlogo naye wihina nerena efunelo yaye. Malabo mamodha sapama wikoha: ‘Ginosayela dhoholela dha Yehova ni ginoofuna wawerana masadduwo wihina gimulabele Oliye mwamakalelo apama?’
SANSAWU AHILABIHEDHA NDHE YEHOVA AANVAHILIYE
8. Ddiniyani erilena Sansawu nuukanna nthona?
8 Podi wera onowubuwela wi Sansawu aherana dhithu dhowinjhiva dhotikiniha. Motajhiha, ahanda ompa poddogoma ni mada aye ahilabihendhe futhi, teto vasogolova oliye ahanda waapa alobwana owakwana 30, luwani yowAskalon. (Juí. 14:5, 6, 19) Sansawu ahinona wi ahere ahikanna nikavihero na Yehova oliye kaande werana dhithu dhatedhene ndhe. Eyo yahoneya pamadhene mudhidhi Sansawu anniyena nthona numala waapa mafilistewu owakwana 1 000. Ddiniyani eeriliyena? Ohiya wasayela manjhe, obe oxixa wamariha makathamihoya yeka, Sansawu aalombe nikavihero na Yehova. — Juí. 15:18.
9. Yehova eerile ddi Sansawu numuloba nikavihero? (Juízes 15:14-16 ni nota)
9 Yehova ahaakula nlobelo na Sansawu. Mwamakalelo ootikiniha, Yehova onfugula nedduddu a manjhe, nuwindo Sansawu wang’wa manjhe ale. Nuumala wang’wa manjhe ale, oliye ohogolowela okanna kopolo. (Omwileri Juízes 15:19 ni nota.) Enakala ninga nedduddu ole a manjhe ahikalawove ofiyedha mudhidhi namavuhulela Samuweli alembiye livuru nna na Juízes. Mudhidhi wateene amwaana Ezarayeli yaamoonaga nedduddu ole, aliwa yowubusedhiwa wi yamuroromela Yehova, Oliye eere wakavihera yafwanyiwaga makathamiho bi makathamiho.
Sansawu ahihogolowela okanna kopolo nuumala wang’wa manjhe Yehova anvahiliye. Ni makalelo mamodhave, iyo podi okala oolibeene epaddi yomuzimuni nalabihedha dhithu dhatedhene Yehova ananivahiye (Osugwe ddima 10)
10. Ethu baani nnahowelihu werana wihina naakele nikavihero na Yehova? (Osugwe fotu.)
10 Ni iyoya nnohowela osayela nikavihero na Yehova, naarive niganonne werana dhithu dhowinjhiva obe nimulabelaga Yehova muwari mwa yakadhene. Nnohowela wanona manddile ehu ni orumedha wi nnande werana ele Yehova ananirumiye, namuroromela oliye. Ndala ninga Sansawu ahogoloweliye okanna kopolo mwaha wang’wa manjhe avahiwiye ni Yehova, ni iyoya podi okala ooliba epaddi yomuzimuni naalabihedhaga dhithu dhatedhene Yehova ananivahiye. — Mat. 11:28.
11. Aleksey onihile aavi wihina oomuroromela Yehova, ki iyo nnaamutajhihe aavi?
11 Kasugwa yopadduwa ya Aleksey, ddibilihu mmodha anaharahariwa vanlubale anakala elabo yoRusiya. Ethu baani emukavihere oliye okala oolibeene naarive afwanyiwaga makathamiho oorusa? Oliye vamodha ni mwariye yahiweegeredha pamadhene epaddi yomuzimuni. Oliye anowoga egi: “Ginowilibihedha ohujhombela werana ohudhera waaga wavayeka ni omwileri Bibiliya malabo amatene. Kadda mambesi miyo ni mwaraga nnothapanyedha wodhela yolebela ya kadda labo ni nnolobela vamodha.” Nnahudhera ddi ni yopadduwa ya Aleksey? Ohiya wiroromela nannya nnohowela omuroromela Yehova. Mbwenye nimakalelo baani? Wodhela ohujhombela ohudhera wehu wavayeka ni oviheyana mabasa mamodhaya oomuzimuni enaalibihe nroromelo nehu. Neerana ndo, Yehova aneere oreeliha wilibihedha wehu womulabela. Oliye ahimulibiha Sansawu, teto kannanganyedha wi aneere onilibiha.
SANSAWU KAASELENLE
12. Yothoma baani yabure erilena Sansawu, ki mwahaya bwaddi yothoma yaye yomutela Dalila kayiwanana ni efunelo ya Yehova?
12 Sansawu aali ohilogomana ninga iyo, bumwahaya aherana dhothoma dhabure. Ehikalawo yothoma emodha eriliyena yamutotenle makathamiho owinjhiva. Nuuvira mudhidhi wowinjhiva Sansawu alabaga ninga namatoriha, oliye obajha ‘onfuna namwali dhaala akala musalasala woSoreki, ithaniwa Dalila.’ (Juí. 16:4) Mbwenye ahinathi obajha onfuna Dalila, Sansawu ahinveva namwali dhaala aali mufilisteya. Yehova damurumme oliye onveva muhiyana ole aali mufilisteya. Mwaha wi eyo yere omukavihera oliye wagonjhiha mafilistewu. Mudhidhi mmodhaya Sansawu ahikala vaade va namararuwa dhaala aali mufilisteya akala elabo yoGaza. Mudhidhi yole Yehova ahinvaha kopolo Sansawu wihina athukulewo musiwo munlubale wafuga luwani yoGaza, eyo yaheriha wihina luwani ele ekale yohibareleyene. (Juí. 14:1-4; 16:1-3) Mbwenye yothoma Sansawu eriliyena yomutela Dalila, kayiwanana ni efunelo ya Yehova. Dalila aali mwana Ezarayeli, mwaha wa yeyo matelo aye kayanvahe ofuru wowana ni mafilistewu.
13. Ethu baani Dalila aamwereliye Sansawu?
13 Mafilistewu yahinvaha korowa dhowinjhiva Dalila wihina amulekethe Sansawu. Sansawu oonfuna vanlubale Dalila ofiyedha oliye ohanda woona ethu Dalila afuniye omwerela. Dalila oomuwadda Sansawu wihina amwaddele ethu yamuthukulela oliye okanna kopolo. Vano omagomihedhowa, Sansawu omwaddela Dalila ethu yamuthukulela oliye okala akopolo. Yowukulihaya sowihina Sansawu aatotile makathamiho ala yeeka. Yoviriganiha yaye yahimuthukulela oliye oyelela kopolo dhaye ni orumedhiwa waye vamentoni va Yehova mwana mudhidheene. — Juí. 16:16-20.
14. Makathamiho baani yanfwannye Sansawu mwaha omuroromela Dalila?
14 Sansawu ahifwanyiwa makathamiho owinjhiva mwaha omuroromela Dalila ohiya omuroromela Yehova. Mafilistewu ommaga Sansawu omutorola mento aye ni omudhowana elabo yoGaza. Kale Sansawu ahanyemula mafilistewu yakala elabo yele yoGaza, mbwenye vano duliyene anyemuliwa ni mafilistewu alabaga ninga namasila amukambura aavokedhiwiyemo. Teto onyemuliwa wa Sansawu kawagomenle vevale, mwaha labo dhaala mafilistewu nuwapandda mathanga ewa yaamwereliwa mulugu ewa Dagom, yahimuthukulelawo Sansawu wihina emunyemulege. Aliwa yubuwela wihina di mulugu yola owoota, Dagom, aakavihenre aliwa ommaga Sansawu. Teto wihina emunyemule pamadhene, aliwa omuthukulela omathangani wihina ‘emwaredhegena.’ — Juí. 16:21-25.
Yehova ahimulibiha Sansawu wihina aatolose mafilistewu (Osugwe ddima 15)
15. Sansawu onihile aavi wihina ahihogolowela omuroromela Yehova? (Juízes 16:28-30) (Osugwe fotu yavakapani.)
15 Ebaribari wihina Sansawu aherana yoviriganiha enlubale, mbwenye oliye kaaselele omulabela Yehova. Oliye ahisayela makalelo owerana efunelo ya Yehova, obe neere, owana ni mafilistewu. (Omwileri Juízes 16:28-30.) Sansawu ahimpigiriyela Yehova egi: ‘Mugeenye wawelihedha kunyawunya mafilistewu.’ Yehova ahaakula yoloba ya Sansawu wodhela onvaha kopolo dhohukala dha masika mwamakalelo ootikiniha. Mwaha wa yeyo Sansawu ahanda waapa mafilistewu owinjhiva nlabo nenne opitha ale andiliye waapa egumaye yaatene.
16. Nnahudhera ddi ni ethu erilena Sansawu nuviriganiha?
16 Ebaribari wihina Sansawu ohoowela wawanana makathamiho yakumelelevo mwaha wa dhoviriganiha dhaye. Naarive dhigaali ndo, oliye kahile werana efunelo ya Yehova. Emodhave enapadduwa ni iyo. Nerana yoviriganiha, vano ohowelaga osinyusiwa obe nayelela mutholo bu mutholo, kaniselele omulabela Yehova. Kudduwale wi Yehova kadha aninyanyalaga. (Sal. 103:8-10) Naarive niviriganihaga, Yehova podi ofunagave onilabihedha ndala ninga eriliyena ni Sansawu.
Podi wera Sansawu ahukuuwa nuviriganiha, mbwenye oliye kaaselele omulabela Yehova. Ni iyoya naarive niviriganihaga kaniselele omulabela Yehova (Osugwe ddima 17-18
17-18. Onahudhera ddi ni yopadduwa ya Michael? (Osugwe fotu.)
17 Kasugwa yopadduwa ya muzombwe dhaala anithaniwa Michael. Oliye owapara mabasa owinjhiva mmulogoni. Oliye alaba ninga mudhaari ookavihera ni aali piyonero a mudhidhi wamutene. Mbwenye mowukuliha oliye aherana yoviriganiha. Mwaha wa yeyo oliye oyelela mutholo anniyena mmulogoni. Oliye nowoga egi: “Dhithudha dhogeddela pama, gowapara mabasa owinjhiva munikuruni mwa Yehova. Mbwenye enakala ninga morurumusa miyo ononga dhithu dhatedhene. Miyo gahinona wi Yehova kaaginyanyale, mbwenye gowikohesa akala gere ohogolowela okanna wandana wooliba ni Yehova ninga gannimina kale, obe akala gere wanda wapara mabasa owinjhiva mmulogoni ninga gaaparesimi.”
18 Yohagalasaya sowihina Michael kaaselenle. Nuuvira mudhidhi, oliye ohogolowela okanna mutholo anniyena mmulogoni. Peeno analaba ninga namaholela mulogo teto, piyonero a mudhidhi wamutene. Oliye anowogave egi: “Miyo wilibihedha ohogolowela okanna wandana wapama ni Yehova wodhela onfugulela murima waaga Yehova ni nlobelo, ohudhera ni opendda. Mwaha wa nikavihero vamodha ni olibihiwa gaakenlimi thabwathabwa ni anamaholela mulogo, ginowanda wonelamo wihina nivanove Yehova onogidhivela. Vano ginowanda omulabela Yehova mmulogoni mubuwelo wahiginyemelaga. Teto gihudhera wihina Yehova onowalevelela athu yaale ethwaruwile ni murima wewa wamutene.” Nnahudheravo ddi? Nnahudhera wihina, naarive nigaviriganihe Yehova podi onilabihedhani onreeliha niilibihedha owomihedha dhoviriganiha dhehu ni nadidela omuroromela Oliye. — Sal. 86:5; Pro. 28:13.
19. Nuumala ohudhera yopadduwa ya Sansawu murima wawo oli aavi?
19 Ohudhera wula nihubuwela vang’ono wodhela dhithu dhotikiniha, dhipadduwile mwigumini mwa Sansawu. Ebaribari wihina oliye kaali oologomana, mbwenye naarive dhigaali ndo, oliye kaaselele wilibihedha wihina amulabele Yehova. Naarive nuviriganiha mwaha wa Dalila, Yehova kaamunyanyale Sansawu. Oliye ahihogolowela omulabihedha Sansawu mwamakalelo ootikiniha. Teto nivanove, Yehova anamoona Sansawu ninga mulobwana a nroromelo ninlubale. Bumwahaya ndina naaye nnoofwanyeya va listani naalobwana oororomeleya nnafwanyeya livuru na Hebreus kapitulu 11. Sohagalasa onona wihina nnamulabela baabi oodhivela anafuna onlibiha, thabwathabwa mudhidhi nnonihu wihina nihithabwa okwerebeya! Bumwahaya ndala ninga Sansawu nnafuna nimpigiriyele Yehova neegi: ‘Kamwerena, gubuweleni ni givaheni kopolo.’ — Juí. 16:28.
JHIBO 3 Murenddele, kopolo dhinadha wa nyu Yehova
a Sansawu ohuthabwa ononiwa ni athu owinjhiva naarive naaleya yahithambwe ohudhera dhithu dhowinjhiva wodhela Bibiliya. Thalako yaye ehiwogiwa muteyaturuni, mujhiboni ni mfilimeni. Mbwenye dhithu eriliyena mwigumini mwaaye, kahiyo thalako baahi dhoriya. Iyo podi ohudhera vanlubale ni mulobwana ola anroromelo ninlubale.