Wodhela Omwene waye, Yehova mohilegela anere wamarihana makathamiho ehu. Muthenga ola bwapama ni nnofwanelela wawaddela athu amodha. Yesu afuna wi anamahara aye yawaddele athu aatene muthenga ola! (Mateus 28:19,20) Anamona a Yehova eniwelela addi ele awogile Yesu?

1. Yolebela ya Mateus 24:14 enakwanela aavi peeno?

Yesu ohuwoga egi: ‘Muthenga ola wapama wOmwene, ommadha olaleyiwe mwilaboni yatene yavati.’ (Mateus 24:14) Anamona a Yehova eri ohagalalene mwaha wapara mabasa ala oofuneya. Ninna olaleya muthenga ola wapela elabo yatene ni dhiwogelo dhokwaranya 1000! Mabasa ala manlubale enohowela wiwegeredha ni wilibihera. Kinande wapara mabasa ala nahinna nikavihero na Yehova.

2. Dhithu baani nnerihuna wihina nalaleye athu?

Nnolaleya mburo bi mburo nnafwanyihu athu. Ninga makiristawu a nsaka noobajha, nnolaleya ‘nyumba ni nyumba.’ (Atos 5:42) Makalelo ala owapara mabasa enonikavihera walaleya matxikwi ni matxikwi aathu kadda yaka. Malabo mamodha kinnafwanya athu mmavaade mwewa nnolaleya mburo vinakala athu owinjhiva. Nnopatha mudhidhi bu mudhidhi wihina nthapanye naathu wodhela Yehova ni mpaganyo dhaye.

3. Anna mutholo wolaleya muthenga dhapama baani?

Makiristawu eebaribari aatene ehikanna mutholo wolaleya muthenga dhapama waathu aatene. Nnovaha thima mutholo wehu. Nnowilibihera olaleya mowiwanana ni egumi yehu mwaha athu enohowela onona wi ehitolosiwe. (Omwileri 1 Timóteo 4:16) Kannalivihiwa wihina napare mabasa ala, mwaha Bibliya anowoga egi: ‘Mwakenle mwamahala, bumwahaya mweregena mwamahala.’ (Mateus 10:7, 8) Naarive athu ehifunaga wiwa muthenga nnalaleyihu, nnodidelave olaleya mwaha enowerela epaddi ya omwebedha Yehova ni enomuhagalasa.

OHUDHERE DHITHU DHIMODHA

4. Nnolaba mooviheya wihina naafwanye athu aatene

VIDIYU: Olaleya muthenga “ofiyedha winagomela elabo” (7:38)

• Enuthukula murima ddi wodhela wilibihera wa Anamona a Yehova wihina elaleye?

Mmwileri Mateus 22:39 ni Romanos 10:13-15, mwamala muthapanyedhe makoho enaharela:

• Mabasa nnaparihu enooniha aavi wi nnowadhivela amwanddamanihu?

• Yehova anawoona aavi ale enalaleya muthenga dhapama? (Musuguwe versu 15)

5. Nnalaba mwimodhani ni Mulugu

Dhopadduwa dhowinjhiva dhinowoniha wi Yehova anoweddiha mabasa ehu. Motajhiha, o Nova Zelandiya ddibila dhala anithaniwa Paul alaleyaga nyumba ni nyumba mutana, omunona muhiyana dhala. Emambesi ya labo nenne muhiyana ole ahilobela wa Mulugu alabihedhaga ndina naaye Yehova, alobaga wihina ahudhihiwe wodhela Yehova. “Nuuvira mawora mararu Paul ofiya vaade vaye.”

Mmwileri 1 Coríntios 3:9, mwamala muthapanyere nikoho nnaharela:

• Yopadduwa yo Nova Zelandiya enooniha aavi wi Yehova anoweddiha mabasa oolaleya?

Mmwileri Atos 1:8, mwamala muthapanyere nikoho nnaharela:

• Mwahaya bwaddi nigahowela nikavihero na Yehova wihina napare mabasa oolaleya?

We wahinona?

Sumana dhatedhene, omutugumanoni dha vaari va sumana, nnoxagihiwa wihina nande wapara mabasa oolaleya. Akala ohoona mutugumano, onoona aavi dhoxagiha nnakelihu?

6. Nnowiwelela malamulo a Mulugu wodhela wapara mabasa oolaleya

Nsaka noobajha, amwiddani yowawadeliha anamahara a Yesu olaleya. Makiristawu oobajha yahakihera ofuru wewa wolaleya ‘elabihedhiwaga malamulo . . . wihina muthenga dhomwene dhinoniwe.’ (Filipenses 1:7) Anamona a Yehova enowerana emodhave peeno.a

VIDIYU: Elabihedhiwaga malamulo wihina muthenga dhapama dhinoniwe (2:28)

Mmwileri Atos 5:27-42, mwamala muthapanyere nikoho nnaharela:

• Mwahaya bwaddi kanidha niselela olaleya? (Musugwe versu 29, 38 ni 39.)

OVIRISEDHA

Yesu ohaxagiha anamahara aye wihina elaleye muthenga dhapama malogo amatene. Yehova anookavihera nlogo naaye wapara mabasa ala.

Ogwaddela

• Muthenga dhapama dhinalaleyiwa mwilaboni yatene nimakalelo baani?

• Mabasa nnaparihu enooniha aavi wi nnowadhivela amwanddamanihu?

• Onoonamo wi mabasa oolaleya podi wuhagalasa? Mwahaya bwaddi?

WEGI ONONE DHITHU DHIMODHA

Osugwe makalelo Anamona a Yehova enakala luwani dhinlubale enalaleyiwa athu.

Olaleya wavayekiwa elabo yo Paris (5:11)

Anamona a Yehova enasayela aavi marefujiyadu?

Ekaviheraga epaddi yomuzimuni yarefujiyadu (5:59)

Woone makalelo mabasa a mudhidhi wamutene enahagalasiwa.

Gihagalala mwaha othoma wapara mabasa ala (6:29)

Onone wodhela muselu dha otorihiwa dhinenjhedhedhiwa mabasa oolaleya.

“Anamalaleya Oomwene enothukulela muladdu dhewa otiribunale wihina dhawogiwe” (O Reino de Deus já Governa!, musolo 13)

Yesu ohuwoga wi makiristawu enofwanelela obaddiziwa. (Omwileri Mateus 28:19, 20.) Obaddiziwa ddi? Ethu baani muthu anahoweliye werana ahinabaddiziwe?

1. Obaddiziwa ddi?

Madhu owi “obaddiza” ni egeregu enatapulela “obwiniha ethu.” Siyeyo epadduwe ni Yesu abaddiziwaga muhinjhe wo Jordawu, mwiili waye watene wahibwinihiwa. Nnonne eyo mwaha nuumala obaddiziwa, oliye ‘okuma mmanjheni.’ (Marcos 1:9, 10) Ninga Yesu, makiristawu eebaribari enobaddiziwa, mwiili waatene onobwinihiwa.

2. Muthu abaddiziwaga anoniha ddi?

Muthu abaddiziwaga anoniha wi ohupeleka egumaye wa Yehova. Ki anipeleka aavi? Ahinathi obaddiziwa, anolobela wa Yehova, amwaddelaga wi anafuna amulabelege oliye malabo amatene. Oliye anapaganya wihina anamulabele Yehova baahi ni wi werana efunelo yaye enakale ethu yofuneya mwigumini mwaaye. Oliye anothoma ‘wikoodda yeka ni . . . anohara’ dhohudhiha dha Yesu ‘malabo amatene.’ (Mateus 16:24) Enamuthukulela muthu okanna wandana wapama ni Yehova vamodha naale enamulabela oliye, fuwipeleka ni obaddiziwa.

3. Enahoweleya were ddi ohunabaddiziwe?

Ohunathi obaddiziwa, sofuneya ohudhera wodhela Yehova ni okanna nroromelo nooliba. (Omwileri Hebreus 11:6.) Wakanna nroromelo ni enonelo, odhivela wawo ni Yehova winere wunnuwa. Mohanganyedha onere okanna efunelo yolaleya wodhela oliye, teto onerege weddela ndhe dhiri dhapama ni orabela ndhe dhiri dhabure. (2 Timóteo 4:2; 1 João 5:3) Muthu ooniha wi ‘onofuna omuhagalasa’ Yehova, onothoma opeleka egumaye wooliye ni obaddiziwa.— Colossenses 1:9, 10.a

OHUDHERE DHITHU DHIMODHA

4. Nnohudhera dhithu dhowadda nubaddiziwa wa Yesu

Mmwileri Mateus 3:13-17 wihina muhudhere dhithu dhimodha wodhela obaddiziwa wa Yesu. Mwamala muthapanyedhe makoho enaharela:

• Yesu abaddiziwaga aari mwaana?

• Oliye abaddiziwe aavi? Ere oddonyihedhiwa manjhe vamusoloni?

Nuumala obaddiziwa, Yesu obajha wapara mabasa athima Mulugu anvahiliye. Mmwileri Lucas 3:21-23 ni João 6:38, mwamala muthapanyedhe nikoho nnaharela:

• Yesu nuumala obaddiziwa, mabasa baani asogolihiye?

5. Obaddiziwa yoluba onandiwe wakwanihedha

Wipeleka wa Yehova ni obaddiziwa enakala ninga mutholo munlubale. Mbwenye wahudheraga wodhela Yehova ni oparihedhaga mabasa ele anawogiye onere okanna kopolo yowakwanihedha yothoma ela. Wawone athu amodha yerilena emodhave. Musugwe VIDIYU.

VIDIYU: Nnaalibihe aavi wandana wehu ni Yehova? (1:11)

Mmwileri João 17:3 ni Tiago 1:5, mwamala muthapanyedhe nikoho nnaharela:

• Enaamukavihere muthu wiwegeredha wi abaddiziwe ddiniyani?

1. Nnipeleka wa Yehova namwaddelaga wi nnofuna omulabela oliye malabo amatene

2. Naabaddiziwaga, nnowawoniha athu aatene wihina nihipeleka egumihu wa Mulugu

6. Nabaddiziwa nnokosa epaddi yemudhi yinlubale ya Yehova

Nabaddiziwa, nnokosa epaddi yemudhi yowiwanana ya elabo yatene. Naarive egaari adhilabo obe mweddelo dhohiyana-hiyana, Anamona a Yehova ebaddiziwe enarumedha dhithu dhimodhave ni enowawiwelela malamulo mamodhave a Mulugu. Mmwileri Salmos 25:14 ni 1 Pedro 2:17, mwamala muthapanyedhe nikoho nnaharela:

• Muthu abaddiziwa, wandana baani anaakanniyena ni Yehova vamodha naale enamwebedha oliye?

OVIRISEDHA

Yesu ohuhudhiha wi makiristawu enohowela obaddiziwa. Wihina muthu abaddiziwe, anohowela okanna wandana woliba ni Yehova, oparihedha mabasa ndhe Yehova Mulugu aneriye sapama ni wipeleka wooliye.

Ogwaddela

• Obaddiziwa ddi? Ki mwahaya bwaddi ekala yofuneya?

• Wipeleka oniwanana aavi ni obaddiziwa?

• Dhithu baani muthu anahoweliye werana ahinapeleke egumaye wa Yehova ni obaddiziwa?

WEGI ONONE DHITHU DHIMODHA

Ohudhera yotapulela ya obaddiziwa ni ethu ehiniwanana ni obaddiziwa.

“Obaddiziwa ddiniyani?” (Epaddi ya jw.org)

Wileri dhithu muthu anahoweliye werana wihina abaddiziwe.

“Odhivela ni omutamalela Yehova winere wuthukulela obaddiziwa” (Namasugwera, Março a 2020)

Woone makalelo wipeleka ni obaddiziwa wa mulobwana dhala oonihiliye wi kathukulele marulu.

“Aliwa yafuna goone ebaribari gamwiinya” (A Sentinela, 1.º a Fevereiro a 2013)

Ohudhere mwahaya bwaddi obaddiziwa ekala yothoma yapama ni makalelo oniwegeredhiwe wi obaddiziwe.

“Gibaddiziwe?” (Os Jovens Perguntam — Respostas Práticas, Volume 2, kapitulu 37)