Muselu wa mBibliyani mutomaya munlubale bi Omwene wa Mulugu. Yehova anere olabihedha Omwene oyo wihina asaddule elabo ekale parayizu. Omwene oyo ddi? Nnonne aavi wi ohubajha othonga? Dhithu baani dherilena Omwene wa Mulugu? Ki osogolo onerena dhithu baani? Yohudhera ela ni dhimodha biili dhinaharela nnere wawakula makoho ala.

1. Omwene wa Mulugu ddi, ki Mwene a Omwene ola baani?

Omwene wa Mulugu onamathonga opaddusiwe ni Yehova. Mweneya di Yesu Kiristu, oliye anathonga agaari odhulu. (Mateus 4:17; João 18:36) Bibliya anihina Yesu: ‘Anere othonga malabo amatene.’ (Lucas 1:32, 33) Mwaha okala Mwene a Omwene wa Mulugu Yesu anerege wathonga athu aatene amwilaboni yavati.

2. Baani anathongege vamodha ni Yesu?

Kanathongege yekaye. Athu ‘a mahimo, malogo ni dhiwogelo dhatedhene . . . enere othonga elabo vamodha ni Yesu.’ (Apocalipse 5:9, 10) Athu angasi enathongege vamodha ni Kiristu? Okuma kale Yesu agari mwilaboni ofiyedha matxikwi ni matxikwi aathu ehithoma okala makiristawu. Eyo enatapulela wihina makiristawu aamatene enadhowa yathonge vamodha ni Yesu? Naari. Enadhowa yathonge vamodha ni Yesu eri athu owakwana 144000. (Omwileri Apocalipse 14:1-4.) Mbwenye muthithi wamutene wa makiristawu enere okala nlogo na Mulugu mwilaboni yavati. — Salmos 37:29.

3. Mwahaya bwaddi Omwene wa Mulugu okala wapama opitha onamathongawatene wamwilaboni?

Naarive anamathonga amwilaboni exixaga werana dhithu dhapama, aliwa kinna kopolo dhowerana dhatedhene enafuniwa. Teto onofiya mudhidhi aliwa enahabiwiwa mpaddo ni amodhaya eniwubuwela yekiwa ni ehinafunana opama athu enathongiwa. Mbwenye Namathonga a Omwene wa Mulugu, Yesu, kadha ahabiwa mpaddo ni muthu mmodhaya. Mulugu ‘onere otikitera omwene ohunadha ogujhuliwa.’ (Daniel 2:44) Yesu anerege othonga wapela elabo yatene teto kanawonege athu amodha okala apama wahiya amodhaya. Oliye muthu oodhivela, apama, owogowa, anere wahudhiha athu wawonaga athu amodha ninga oliye anawoneliye — nuudhivela, nuupama ni wogowa.— Omwileri Isaías 11:9.

4. Omwene onna kopolo dholamulela elabo yatene

Kopolo dholamulela anna Yesu dhinopitha kopolo enna anamathonga aatene amwilaboni. Mmwileri Mateus 28:18, mwamala muthapanyedhe nikoho nnaharela:

• Ohiyana baani orivo wodhela kopolo anna Yesu dholamulela ni kopolo enna anamathonga amwilaboni?

Anamathonga amwilaboni enohabiwa omwene teto, kadda muthu analamulela epaddi vang’ono ya elabo. Ki Omwene wa Mulugu onalamulelege nimakalelo yayo? Mmwileri Daniel 7:14, mwamala muthapanyedhe makoho enaharela:

• Mwahaya bwaddi ethu yapama onona wi Omwene wa Mulugu ‘kunaagujhuliwe’?

• Mwahaya bwaddi sapama onona wi Omwene wa Mulugu onerege othonga elabo yatene?

5. Anamathonga amwilaboni enohowela ohabiwa mpaddo

Mwahaya bwaddi egahoweleya Omwene wa Mulugu ohaba mpaddo wa anamathonga amwilaboni? Musugwe VIDIYU, mwamala muthapanyedhe nikoho nnaharela

VIDIYU: Omwene wa Mulugu ddi? — Ogwaddela (1:41)

• Dhithu baani dhinereya mwaha onamathonga wamwilaboni?

Mmwileri Eclesiastes 8:9, mwamala muthapanyedhe nikoho nnaharela:

• Ononamo wi Omwene wa Mulugu onohowela wahaba mpaddo anamathonga amwilaboni? Mwahaya bwaddi?

6. Omwene wa Mulugu ohukanna anamathonga enonne dhithu dhinanipadduwela

Mwene ehu Yesu aari mwilaboni yavati ni mwili wemuthu, bumwahaya oliye anerege ‘wonelamo okwerebeya wehu.’ (Hebreus 4:15) Ohiya eyo, Yehova athomme athu owakwana 144000 wihina ethongege vamodha ni Yesu, athu ayo ba ‘malogo amatene dhiwogelo ni mahimo.’ — Apocalipse 5:9.

• Ononamo aavi onona wihina Yesu vamodha naale enathonge nuliye enowoonelamo yubuwelo dhehu ni makathamiho enanifwanya? Mwahaya bwaddi ogoona ndo?

7. Malamulo a Omwene wa Mulugu ehithabwa owomela ohiyana ni malamulo aanamathonga amwilaboni

Anamathonga enowakumiha malamulo wihina yakavihere wabarela athu. Emodhave ni Omwene wa Mulugu ohukanna malamulo. Mmwileri 1 Coríntios 6:9-11, mwamala muthapanyedhe makoho enaharela:

• Onoonamo aavi elabo yakale aavi athu aatene yiwelelaga malamulo a Mulugu?a

• Onoonamo wi Yehova anofwanelela athu aatene yawiwelelege malamulo aye? Mwahaya bwaddi?

• Enoniha ddi wi athu ehinawiwelela malamulo a Yehova podi osaddula mubuwelo wewa? (Musugwe versu 11.)

OVIRISEDHA

Omwene wa Mulugu onamathonga webaribari ori odhulu teto onere olamula mwilaboni yatene.

Ogwaddela

• Anamathonga a Omwene wa Mulugu baani?

• Mwahaya bwaddi Omwene wa Mulugu okala wapama opitha onamathonga waatene wamwilaboni?

• Dhithu Yehova anahoweliye wi athu yerena yegi ekale epaddi wa Omwene wa Mulugu siivi?

WEGI ONONE DHITHU DHIMODHA

Woone dhithu ahudhihe Yesu wodhela mburo onafwanyeya Omwene wa Mulugu.

“Omwene wa Mulugu ethu eri mmurimani mwehu?” (Epaddi ya mu jw.org)

Mwahaya bwaddi Anamona a Yehova yonaga wi sapama okala oororomeleya ni Omwene wa Mulugu ohiya onamathonga wamwilaboni?

Egaari epaddi ya Omwene wa Mulugu (1:43)

Woone dhithu Bibliya anahudhihiye wodhela a 144000 Yehova aasakuliye wihina yathonge vamodha ni Yesu.

“Baani anaya odhulu?” (Epaddi ya mu jw.org)

Emuthukulele ddi ativista dhala orumedhaga wi Omwene wa Mulugu ejhehedhelo yaathu aatene?

“Kaginonamo wihina ginohowela osaddula elabo” (A Sentinela, 1.º a Julho a 2013)

Yesu ahiwoga ni anamahara aye egi ‘ehikosege epaddi yelabo.’ (João 15:19) Ohukosa epaddi ya elabo enatapulela ohivolosiha mpulitikani ni mukoddoni dha elabo ela. Mbwenye owoga ebaribari kahi ethu yokweya ohukala epaddi yelabo. Malabo mamodha iyo podi oteyiwaga mwaha ohukosa epaddi yelabo. Nnande aavi ohukosa epaddi yelabo ni okala ororomeleya wa Yehova?

1. Makiristawu enawona aavi anamathonga?

Aliwa enowariha anamathonga. Ndo nnowerana ele anirumile Yesu, ‘onvaha Sezare dhithu dha Sezare’. Eyo enatapulela wawiwelela malamulo a kadda elabo ninga oliva musoko. (Marcos 12:17) Bibliya anahudhiha wihina anamathonga eri mwilaboni ekalelewo mwaha wihina Yehova deenyile. (Romanos 13:1) Bumwahaya iyo nnoriha othonga wewa. Teto nihinona wi onamathonga wewa kunapitha onamathonga wa Mulugu. Nihikanna ebaribari wihina Mulugu ni Omwene waye dinamarihe makathamiho mwilaboni.

2. Nnonile aavi wi kannakosa epaddi yelabo?

Ninga Yesu iyo kannivolosiha mpulitikani. Athu nuwawona matikiniho awerilena Yesu oxixa wi oliye akale mwene, mbwenye Yesu okoodda. (João 6:15) Mwaha waddi? Ethu aasoriheye vamentoni va Pilatu enonivaha yowakulaya, oliye wera: ‘Omwene waga kunakosa epaddi yelabo.’ (João 18:36) Mwaha okala anamahara a Yesu nnowoniha wihina kannakosa epaddi yelabo mwamakalelo ohiyana-iyana. Motajhiha, iyo kannadhowa okoddoni. (Omwileri Miqueias 4:3.) Iyo kannamusakula namathonga newene partidu, teto kannaakoddiha athu omusaku namathonga newene osakula partidu yewa. Iyo nnoriha elabo nnakalihu, mbwenye kannakokorela bandera newene kannerana dhithu dhiniwanana ni muselu yoyo dhinalupa malamulo a Mulugu. (1 João 5:21) Ayo makalelo owoniha wihina nnaroromela baahi Omwene wa Mulugu.

OHUDHERE DHITHU DHIMODHA

3. Makiristawu ebaribari kinakosa epaddi yelabo

Yesu naanamahara aye kayakosa epaddi yelabo ni iyowa ntajhihe mweddelo wewa. Mmwileri Romanos 13:1, 5-7 ni 1 Pedro 2:13, 14. Mwamala musugwe VIDIYU, mwamala mwathapanyedhe makoho enaharela:

VIDIYU: Makiristawu ebaribari kinakosa epaddi yelabo — Epaddi 1 (4:28)

• Ekalele ddi yapama warihaga anamathonga?

• Makalelo apama owoniha wi nnowariiha anamathonga baavi?

Wakala koddo malogo enihina kinakosa epaddi yelabo enokavihera makuru amenddi enawana koddoya. Mwebaribarene ohukosa epaddi yelabo enatapulela ddi? Mmwileri João 17:16. Mwamala musugwe VIDIYU ni muthapanyedhe nikoho nnaharela:

VIDIYU: Makiristawu ebaribari kinakosa epaddi yelabo — Epaddi 2 (3:11)

• Ohukosa epaddi yelabo enatapulela ddi?

Ki anamathonga yaniloba werana ethu enaalupa malamulo a Mulugu nere ddi? Mmwileri Atos 5:28, 29. Mwamala musugwe VIDIYU ni mwathapanyedhe makoho enaharela.

VIDIYU: Makiristawu ebaribari kinakosa epaddi yelabo — Epaddi 3 (1:18)

• Anamathonga yaniruma werana ethu wula nlamulo na Mulugu niwogaga wi niherena nimwiwelele aani?

• Onowanda wubuwela dhithu enasoriha anamathonga mukiristawu ahinafwaneleliye wiwelela?

4. Dhowera dhawo ni monelo wawo dhonihege wi kunakosa epaddi yelabo

Mmwileri 1 João 5:21. Mwamala musugwe VIDIYU ni mwathapanyedhe makoho enaharela:

VIDIYU: Mwahaya bwaddi makiristawu eebaribari egahowela oliba murima wi ehikose epaddi yelabo (2:49)

• Nvidiyuni, mwahaya bwaddi Ayenge adhe athomege ohivolosiha mpulitikani newene ohukokorela bandera?

• Ononamo wi ohuthoma dhithu dhapama?

Dhithu dhimodha dhehe yothoma yehu yohivolosiha mpulitikani ddi? Musugwe VIDIYU, mwamala mwathapanyedhe makoho enaharela.

VIDIYU: Dhithu nihudherihu nNamasugwera — Odidele ohukosa epaddi ya elabo ela eri yogaweyene (5:16)

• Akala elabo yehu enna owana ni elabo emodha nnere ddi wihina ndideleve ohukosa epaddi yelabo?

• Nnande addi ohukosa epaddi yelabo akala muthu di muthu anakosa epaddi ya pulitika ohuthoma ethu enapatha egumi yehu?

• Dhithu nnavuruwanihu munotisiyani obe naakwihu dhinapatha aavi yothoma yehu yohukosa epaddi yelabo?

OVIRISEDHA

Makiristawu enowilibihera vanlubale ohukosa epaddi yelabo wodhela mubuwelo wewa, madhu ewa ni dhowera dhewa.

Ogwaddela

• Dhithu baani nnafwanelelihu wavaha anamathonga?

• Mwahaya bwaddi egahoweleya ohukosa epaddi yelabo?

• Dhithu baani dhehe yothoma yehu yohukosa epaddi yelabo?

WEGI ONONE DHITHU DHIMODHA

Wihina nihikose epaddi yelabo dhithu baani nnahowelihu oleva?

Yehova kanannyanyalege (3:14)

Dhithu baani onahowela werana murala wihina wiwegeredhe wehiwaga mwaha wa yothoma yewa yohukosa epaddi yelabo?

Kamukale epaddi yelabo mudhidhi ori watene (4:25)

Mwahaya bwaddi obarela elabo kahi ethu yothabwa ofuneya muthu anahoweliye werana?

“Wa Mulugu dhatedhene dhinowenyeya” (5:19)

Wasayelaga ganyo woone makalelo ohukosa epaddi yelabo.

“Kadda muthu anaathukulege mutholo waye” (A Sentinela, 15 a Março a 2006)