Okanne ejhehedhelo, kunaathukule manyazo

1. Mwahaya bwaddi Abarawu adhe akannege ebaribari wihina eere okanna mwaana?

YEHOVA ahimpaganya mukwaye Abarawu wihina oliye eere okanna mwana teto malogo aamatene a velaboni yavati yeere wawakela mareeliho wodhela oliye. (Gén. 15:5; 22:18) Abarawu ahikanna nroromelo nooliba ni Mulugu, bumwahaya oliye ahikanna ebaribari wihina Mulugu eere wakwanihedha mpaganyo dhaye dhatedhene. Mbwenye Abarawu anna yaka 100 teto Sara anna yaka 90. Naarive dhigaali ndo, aliwa yaali yahinathi okanna mwana. (Gén. 21:1-7) Teto Bibiliya anihina: ‘Mbwenye [Abarawu] oororomela wihina eere okala baabi amalogo owinjhiva, mowiwanana ni ele awogile Mulugu.’ (Rom. 4:18) Teto we ohunona wi dhithu Abarawu ajhehedhiye dhahipadduwa mwebaribareene. Oliye ombala mwaana amujhehedhiye, Izaki. Mbwenye ethu baani yamuthukulela Abarawu omuroromela Yehova nimakalelo yala?

2. Mwahaya bwaddi Abarawu ahikanna ebaribari wihina mpaganyo wa Yehova were wakwanela?

² Abarawu ahimunona pamadhene Yehova, bumwahaya oliye ahikanna ‘ebaribari yaatene yowihina ele [Mulugu] aapaganyiliye’ eere wakwanihedha. (Rom. 4:21) Yehova woniha wihina oomuroromela Abarawu ni owoga wi aali muthu owogowa mwaha wa nroromelo naye. (Tia. 2:23) Ninga munawogela Romanos 4:18, nroromelo ni ejhehedhelo anna Abarawu dhowiwanana. Vano kabeni noone ethu Pawulo awogiliye enafwanyeya va Romanos kapitulu 5 wodhela ejhehedhelo.

3. Ethu baani Pawulo awogiliye wodhela ejhehedhelo?

³ Pawulo onowoga mwahaya bwaddi nigahowela okanna ebaribari wihina ‘ejhehedho, kinanthukuliha manyazo.’ (Rom. 5:5) Oliye ononikavihera wonelamo makalelo oolibiha ejhehedhelo yehu. Kabeni nipwasedhe dhithu dhinafwanyeya va Romanos 5:1-5. Nahudheraga, wubuwelege makalelo ejhehedhelo yawo enakaliwa yoliba mudhidhi waviraga. Dhithu murumiwi Pawulo aalebeliye aRomano dhinere wukavihera woona makalelo oolibiha nroromelo onniwena peeno. Mbwenye vobajha kabeni noone ejhehedhelo yoriya murumiwi Pawulo awogiliye yahinantotele manyazo.

EJHEHEDHELO YEHU YORIYA

4. Ethu baani enawogiwa va Romanos 5:1, 2?

⁴ Omwileri Romanos 5:1, 2. Murumiwi Pawulo aalebenle madhu ala, addibila a mulogo wooRoma. Addibila a mulogo ola yahihudhera ebaribari wodhela Yehova ni Yesu ni yahikanna nroromelo ofiyedha okala makiristawu. Mwaha wa yeyo, Mulugu ‘owoga wi yaali athu owoogowa mwaha wa nroromelo’ ni wathikithela ni muzimu wotxena. Aliwa yahikanna oneti yoojheha omwaakela padamari ewa ooriya ni kiyanganyedha wihina yeere omwaakela mwebaribareene.

5. Ejhehedhelo baani makiristawu oothikitheliwa enniwana?

⁵ Vasogolova Pawulo walebela makiristawu oothikitheliwa owEfeso wodhela ejhehedhelo yakenliwa. Ejhehedhelo ela yovolowelavo wakela ‘yohiyedhiwa wa ele eli oweela.’ (Efé. 1:18) Vano aalebelaga akudda Kolosense, Pawulo woniha mburo makiristawu oothikitheliwa yaamwakeliwa padamari ewa. Pawulo owoga wi ‘ejhehedhelo mukoyeliwinyu odhulu.’ (Col. 1:4, 5) Bumwahaya ejhehedhelo enna makiristawu oothikitheliwa sowihina aliwa eneere ovenyihiwa muukwani wihina yakalege odhulu nimukalakala wewene winathongigiwa ni Yesu Kiristu. — 1 Tes. 4:13-17; Apo. 20:6.

6. Ddibila dhaala oothikitheliwa awogile ddi wodhela ejhehedhelo yaye?

⁶ Makiristawu oothikitheliwa enothabwa ovaha thima ejhehedhelo yewa. Mmodha wa addibila yala oothikitheliwa, ddibila Frederick Franz, ahiwoga makalelo aaliye mwaha wa ejhehedhelo aanniyena: “Ejhehedhelo yehu seebaribari ni eneere wakwaneleya pamadhene wa ale enakosa epaddi ya 144 000 a nikuru ning’ono ni mwamakalelo nahinandihu wubuwela.” Yaka ya 1991, numala omulabela Yehova nuuroromeleya muwari mwa yakadhene, ddibila Franz owoga egi: “Iyo kanihiile ovaha thima ejhehedhelo ela. . . . Mudhidhi waviraga nnothabwa ovaha thima ejhehedhelo ela. Mwebaribareene ejhehedhelo ela eneere onihagalasa, bumwahaya nnohowela ojheha nuvilela mwaha ejhehedhelo ela eneere onihagalasa vanlubale naarive ehoweleyaga oojheha muwari mwa yaka matxikwi ni matxikwi. Bumwahaya ginothabwa ovaha thima ejhehedhelo yaga peeno opitha kale.”

7-8. Ejhehedhelo baani adhaari owinjhiva a Yehova enniwana? (Romanos 8:20, 21)

⁷ Owinjhiva wa ale enamulabela Yehova peeno ehikanna ejhehedhelo yohiyana. Ejhehedhelo emodhave anna Abarawu, ejhehedhelo yokanna egumi yohimala mwilaboni yavati athongiwaga ni Omwene wa Mulugu. (Heb. 11:8-10, 13) Pawulo ohuleba wodhela ejhehedhelo ela yoriya. (Omwileri Romanos 8:20, 21.) Ethu baani yatwambwe wuthukula murima mudhidhi ohudheraga wodhela ejhehedhelo ela yoriya ya mBibiliyani? Nerege yaali mwaha onona wi nlabo nimodha onere okala oologomana? Obe wahithabwa ohagalala mwaha onona wi onere wawona amudhawo ekwile mparayizuni elabo yela yavati? Kannanganyedha wi nnere wakela dhithu dhowinjhiva dhoriya mwaha wa ejhehedhelo ela.

⁸ Naarive akala ejhehedhelo yehu sookalawo nimukalakala elabo yodhulu obe velaboni yavati, aatene iyo nikanna dhithu dhinanithukulela ohagalala. Ejhehedhelo ela yoriya podi okala yoliba vanlubale. Pawulo anowoga makalelo oolibiha ejhehedhelo ela. Ethu oliye alebiliye eneere onikavihera ororomela wihina ejhehedhelo yehu eneere wakwanela.

NNANDE AAVI OLIBIHA EJHEHEDHELO YEHU

9-10. Ninga enooniha yotajhiha ya murumiwi Pawulo, ethu baani makiristawu enahoweliwa? (Romanos 5:3) (Osugwe fotu.)

⁹ Omwileri Romanos 5:3, 4. Pawulo ohuwoga wihina makathamiho enanifwanya podi onikavihera olibiha ejhehedhelo yehu. Podi wera ela enonitikiniha, mbwenye ebaribariya sowihina anamahara aatene a Yesu podi ofwanyiwa makathamiho. Kasugwa yotajhiha ya Pawulo. Oliye ohuwoga ni makiristawu oTesalonika egi: ‘Mudhidhi nigaali ni nyu, iyo nowuwaddelani wihina nnere ofwanyiwa mahoso, teto ninga munonilinyu siyeyo enanipadduwela.’ (1 Tes. 3:4) Ni ahalebela akudda Korintiyu egi: ‘Nnafuna munone makathamiho nnafwanyiwihu . . . ofiyedha ohunivaha ejhehedho wi nnere odhawo ni egumi.’ — 2 Cor. 1:8; 11:23-27.

¹⁰ Ni iyowa peeno nnojheha ofwanyiwa makathamiho bi makathamiho. (2 Tim. 3:12) Ki we? Onooharahariwaga mwaha okala mukiristawu? Nerege akwawo obe amudhawo enowuteya ofiyedha wuweddiha mwamakalelo abure? Obe onofwanyiwa makathamiho omabasani mwaha okala oororomeleya. (Heb. 13:18) Podi wera Onooharahariwaga ni anamathonga mwaha wapara mabasa oolaleya. Mbwenye naarive ofwanyiwaga makathamiho bi makathamiho, Pawulo onowoga wihina iyo podi ohagalala. Mwaha wa ddi?

11. Mwahaya bwaddi nigahowela wiikoma wi nididele okala oovilela naarive nifwanyiwaga makathamiho bi makathamiho?

¹¹ Iyo podi ohagalala naafwanyiwaga makathamiho, mwaha enonikavihera okanna ekalelo yathima. Romanos 5:3 anihina ‘makathamiho enodhana ovilela.’ Makiristawu aatene enere ofwanyiwa makathamiho, bumwahaya iyo aatene nnohowela okanna ekalelo ela yovilela. Mwaha wa yeyo, nnohowela wiikoma okala athu oovilela naarive nifwanyiwaga makathamiho bi makathamiho. Nerana ndala, nnere wanda woona wakwanela wa ejhehedhelo yehu. Iyo kannafuna okala ninga ale Yesu aaliganihiye ni thanga dhinamothela va nibweni omabajhowene athu yala enorumedha ebaribari ni ohagalala mbwenye yakumelala “makathamiho obe oharahariwa” aliwa enokwerebeya ofiyedha ohiya ebaribari. (Mat. 13:5, 6, 20, 21) Ebaribari wihina oharahariwa obe ofwanyiwa makathamiho kahi ethu yapama. Mbwenye ovilela winodhana mareeliho apama. Ni makalelo baani?

12. Mareeliho baani nnawakelihu navilelagana makathamiho?

¹² Tiyagu ohuwoga wihina ovilela naafwanyiwaga makathamiho winodhana mareeliho mwigumini mwehu. Oliye ohuleba egi: ‘Mowindala muhiye wi ovilela weenyu wapare mabasa ewa, wihina mukale owakwanelene, apamene mwadhatedhene, ehuhalelagani ethu.’ (Tia. 1:2-4) Ninga awogile Tiyagu ovilela wehu podi onikavihera okala athu oojheha, okala athu a nroromelo ni omuroromela Yehova. Mbwenye ovilela wehu podi wadhana mareeliho mamodha athima.

13-14. Ethu baani enapadduwa navilelaga, ki eyo enapatha aavi ejhehedhelo yehu? (Romanos 5:4)

¹³ Omwileri Romanos 5:4. Pawulo ohuwoga wihina ovilela ‘winonthukulela orumedhiwa ni Mulugu.’ Eyo enatapulela wi wavilelega onorumedhiwa vamentoni va Yehova. Eyo kinatapulela wi waharahariwaga obe wafwanyiwaga makathamiho Yehova anohagalala, mbwenye enatapulela wihina Yehova anahagalala ni ekalelo yawo. Mwaha ovilela winonthukulela orumedhiwa ni Mulugu. Ala mareeliho ooriha vanlubale! — Sal. 5:12.

¹⁴ Kuddiwale wihina Abarawu ahivilela naarive afwanyiwaga makathamiho ohiyanahiyana teto eyo yahimuhagalasa vanlubale Yehova. Bumwahaya Yehova ahandana nuliye ni amoona ninga muthu owogowa. (Gén. 15:6; Rom. 4:13, 22) Nihiyoya podi onipadduwela emodhave. Orumedhiwa wehu vamentoni va Yehova kunadha mwaha wa mabasa nnandihu omparela obe mwaha wa mutholo nnakelihu. Yehova anonirumedha mwaha nnovilela ni nroromelo, teto aatene iyo podi wanda ovilela naarive niganna yaka dhohiyana-hiyana, dhithu dhinanipadduwela mwigumi mwehu obe akala nnowanda werana dhithu dhowinjhiva. We onna wavilelana makathamiho mudhidhi yola? Akala siyeyo enupadduwela kuddiwale wihina onomuhagalasa Yehova. Noonelamo wihina nnorumedhiwa vamentoni va Yehova ejhehedhelo ninnihuna wihina Oliye anere wakwanihedha mpaganyo dhatedhene enothabwa oliba.

EJHEHEDHELO YOTHABWA OLIBA

15. Ethu baani murumiwi Pawulo awogiliye enafwanyeya va Romanos 5:4, 5, ki nikoho baani nnakumelelavo?

¹⁵ Ninga muwogele murumiwi Pawulo, iyo nnorumedhiwa vamentoni va Yehova nakala oororomeleya wa oliye ni naavilelagana makathamiho. Kasugwa ethu murumiwi Pawulo awogiliye voharela mukartani mwaaye aalebenliye aRomano: ‘Vano orumedhiwa ni Mulugu winodhana, ejhehedho, teto ejhehedho, kinanthukuliha manyazo.’ (Rom. 5:4, 5) Eyo podi okala ethu yorusa wonelamo. Mwahaya bwaddi? Mwaha mundduli ninga munawogela Romanos 5:2, murumiwi Pawulo ahiwoga wihina makiristawu ooRoma yahikanna ejhehedhelo ya ‘munthithimihoni mwa Mulugu.’ Mwaha wa yeyo, podi wera muthu di muthu eere wikoha: ‘Akala makiristawu ala yahikanna ejhehedhelo, mwahaya bwaddi murumiwi Pawulo adhe ahogolowelege owoga wodhela ejhehedhelo?’

16. Ejhehedhelo yehu enenjhedhedheya aavi? (Osugwe fotu.)

¹⁶ Iyo podi wawonelamo madhu a murumiwi Pawulo, nubuwela wihina ejhehedhelo podi wenjhedhedheya obe wunnuwa. Motajhiha, we onowubuwela dila yobajha wiwaliwe wodhela ejhehedhelo yoriya vanlubale yOmwene wa Mulugu? Omabajhowene podi wera wowanganyedha wubuwelaga wodhela muselu ola wokalawo ni mukalakala mwilaboni yavati. Mbwenye nuuhudhera pamadhene wodhela Yehova ni mpaganyo dhaye dhinafwanyeya mBibiliyani, ejhehedhelo yawo yowihina Yehova anere wakwanihedha mpaganyo dhaye dhatedhene yahiliba vanlubale.

17. Ejhehedhelo yehu enunnuwa ni makalelo baani naarive nigivelenle wa Yehova ni obaddiziwa?

¹⁷ Naarive ogamanle obaddiziwa, onerege odhowagave ohudheraga wodhela Yehova, teto odhivela onniwena ni Oliye onere wenjhedhedheya, ndala ejhehedhelo yawo enere othabwa oliba. (Heb. 5:13–6:1) We onere wanda wonelamo ele anawoga Romanos 5:2-4. Podi wera we ohufwanyiwa makathamiho owinjhiva. Mbwenye, naarive dhigaali ndo, we uhanda ovilela ni ohumoona Yehova urumedhaga vamentoni vaye. Vano mwaha onona wihina Yehova onowudhivela, ohukanna ethu yathima enuthukulela ojheeha nuuvilela wihina Yehova aneere wakwanihedha dhatedhene apaganyiliye. Vano ejhehedhelo yawo ehithabwa oliba, opitha mudhidhi ohudheragawene ebaribari. Teto ejhehedhelo ela, vano sebaribari ni enotapulela ethu yathima mwigumini mwawo ni enovolowela egumawo yaatene. Ejhehedhelo ela enosaddula makalelo onaweddihiwe amudhi awo, dhothoma dhawo ni makalelo onalabihediwe mudhidhi wawo.

18. Ethu baani Yehova ananiroromelihiye?

¹⁸ Pawulo anowoga ethu emodha yoriya wodhela ejhehedho ninnihuna namala orumedhiwa vamentoni va Yehova. Oliye ononipaganya wihina ejhehedhelo yehu mwebaribarene eneere wakwanela. Ki mwahaya bwaddi nigarumedha ni murima wehu waatene wihina eyo eneere opadduwa? Murumiwi Pawulo waroromeliha makiristawu ni madhu ala: ‘Ejhehedho, kinanthukuliha manyazo, mwaha odhivela wa Mulugu ohuheliwa mmurimani mwehu wodhela muzimu wotxena, nivahiwihu.’ (Rom. 5:5) Dhihikalawo dhithu dhowinjhiva dhinanithukulela ororomela ejhehedhelo ananivaha Yehova — ejhehedhelo ela sehu.

19. Ethu baani wahinahoweliwe wanganyedha wodhela ejhehedhelo yawo?

¹⁹ Osayele mudhidhi wihina opendde mpaganyo Yehova aampaganyiliye Abarawu ni makalelo Yehova amurumedhiliye vamentoni vaye ninga mukwaye. Abarawu kajhehile ebewene. Bibiliya anowoga egi: ‘Abarawu, numala wooniha ovilela, ahakela mpaganyo ola.’ (Heb. 6:15; 11:9, 18; Rom. 4:20-22) Abarawu kaathukule manyazo mwaha ojheha. Ni weya kunathukule manyazo wakanna nroromelo, ejhehedhelo yawo sebaribari, sohagalasa ni kinuuthukulihe manyazo! (Rom. 12:12) Murumiwi Pawulo ohuleba egi: ‘Mulugu anavaha ejhehedho uureeliheni ni ohagalala vamodha ni murenddele wodhela omuroromela, wihina ejhehedho munninyuna yunnuwe wodhela kopolo dha muzimu wotxena.’ — Rom. 15:13.