Nlogo Na Yehova Enodhivela Opama

1. Yoweha baani ya nroromelo yanfwanye Juze, ki oliye erile ddi?

MWAANA, a Jako ahifwanyiwa makathamiho oorusa. ‘Ogigonihe,’ siyeyo mwihiyana ole awogiliye dila dhowinjhivadhene ni Juze. Mwihiyana ola ari mwadha Potifare nabwiya a Juze. Mbwenye Juze kaarumedhe yowehele podi wera athu owinjhiva peeno enowikoha: “Mwahaya bwaddi Juze adhe ahirumedhege ogona ni mwihiyana ole?” Potifare ahivenyavo vade. Ohiya eyo Juze ali mudhaari; mwebaribarene mwadha Potifare ere wadhana makathamiho mwigumini mwa Juze ahere akoodda. Mbwenye naarive dhigari ndo Juze ahikoodda omugoniha. Mwahaya? Oliye onowoga egi: ‘Ki-to ginande addi werana yothega enlubale ni omuthegela Mulugu?’ — Gén. 39:7-12.

2. Juze anonne addi wihina mararuwo yothega enlubale vamentoni va Mulugu?

² Ki Juze anone addi wi agona ni mwihiyana ola yakale “yothega enlubale vamentoni va Yehova”? Nlamulo na Moyizes nawoga wodhela mararuwo, naalebiwe nuuvira yaka duzento. Nlamulonna ‘nawoga kuraruwe’. (Êxo. 20:14) Naarive dhigari ndo Juze ahikanna mubuwelo wa Yehova wodhela ogonihana. Motajhiha, Juze ahinona wihina Yehona apaddusile matelo wihina ekale athu abiili mulobwana ni mwihiyana. Teto podi wera oliye ahiwa thalako ya avwaye Sara wodhela makalelo Yehova ambareliye mudhidhi athu yafuniwa omurarusa, ethu yooligana, yahipadduwa ni Rabeka mwadha Izaki, mudhidhi Yehova ambareliye. (Gén. 2:24; 12:14-20; 20:2-7; 26:6-11) Juze ahipendda dhatedhene dhendha ofiyedha wonelamo ethu eli yapama ni yabure vamentoni va Yehova. Juze omudhivela Yehova ni oofuna opama waye, bumwaya oliye asakule werana efunelo ya Yehova.

3. Va yohudhera ela nnaasuze ddi?

³ We onodhiveliwa opama? Mwebaribarene. Mbwenye iyo aatene nili athu ohilogomana, bumwahaya nahikala pasope, mubuwelo wa elabo wodhela ele eli yapama ni eli yabure podi onivolowela. (Isa. 5:20; Rom. 12:2) Bumwahaya va yohudhera ela nnere woona, enatapulela ddi okala muthu apama vamento va Yehova ni ki eyo enaanikavihere ddi mwigumini mwehu. Vasogolova nnere woona dhikalelo tharu nnahowelihu werana wihina nnenjhedhedhe odhivela wehu wodhela malagano a Yehova.

OPAMA DDI?

4. Mubuwelo baani wabure athu enniwana wodhela ele enatapulela okala apama?

⁴ Nawogaga wodhela muthu apama, athu owinjhiva enamubuwela muthu owithukula anatoriha athu amodha ni aniwona ninga da thima wakwaranya athu amodhaya. Mbwenye Mulugu kannadhiveliwana muthu anna ekalelo yeyo. Yesu agali veelabo yavati, oliye ahasumulula anamaholela gereja a mudhidhi yole wodhela ekalelo yela. (Ecl. 7:16; Lucas 16:15) Mwaha aliwa yowapadda malagano ewa wodhela eli yapama ni yabure.

5. Ninga anasoriha Bibiliya opama ddi? Owoge yotajhiha.

⁵ Ekalelo ela yopama sathima vanlubale. Wihina niwoge ni makalelo ookweya, muthu apama duule anerana dhithu dhapama vamentoni va Yehova. Ninga anawogela Bibiliya madhu ala owi opama, enatapulela waparihedha mabasa malagano a Mulugu mwigimini mwehu. Motajhiha, Yehova waruma anameeddiha malondda wihina elabihedhege ‘mpimo dhororomeleya.’ (Deut. 25:15) Ni ewogelo yobajha ewogiwe ewogelo ela madhu ala owi “opama” podi otapulelaga okala muthu “orolomeleya.” Obe nere mukiristawu anafuna okala apama vamentoni va Mulugu onohoweleya akale ororomeleya omabasani obe aweragana malondda. Muthu anadhiveliwa opama onotakaleliwa awonaga athu amodha yonaga goyi. Mwebaribarene muthu apama afunaga werana yothoma onowubuwelela monelo wa Yehova wodhela muselu yoyo ni onowerana ndo mwaha anafuna amuhagalase Yehova.— Col. 1:10.

6. Mwahaya bwaddi niga roromelaga wihina Yehova baahi, dinafwanelela othoma ele eli yapama ni yabure mwigumini mwehu? (Isaías 55:8, 9)

⁶ Bibiliya onowoga Yehova wi di nipara wa opama webaribari. Bumwahaya oliye aginthaniwaga ‘mburo wa opama.’ (Jer. 50:7) Yehova dipaddusile dhatedhene dhiliwo, bumwahaya oliye dinonne ele eli yapama ni yabure. Ebaribari wi mwaha iyo okala athu ohilogomana enorusa wonelamo ele Yehova anobuweliye wodhela ele eli yapama ni yabure, mbwenye woona wi Yehova muthu owogowa nihinona wihina oliye onunona dhinanipadduwela. (Pro. 14:12; omwileri Isaías 55:8, 9.) Naarive nigaali athu ohilogomana nipaddusiwe ni makalelo oligana ni mulugu, bumwahaya nihikanna ekalelo yokalawo ni malagano oliye ananivahiye. (Gén. 1:27) Teto iyo nnowilibihera vanlubale wihina nerena efunelo ya Mulugu mwaha nnomudhivela. — Efé. 5:1.

7. Mwahaya bwaddi ekala ethu yapama ohara dholaga dha Yehova wodhela ele eli yapama ni yabure? Owoge yotajhiha.

⁷ Ohara dholaga dha Yehova wodhela ele eli yapama ni yabure sapama ni enere onikavihera mwigumini mwehu. Onofuna wonelamo mwahaya? Kubuwela yotajhiha ela, yahere anameeddiha karo eharaga dhoholela dhewa oohiya dha Polisia obe yahere kadda amediku esasanyaga makalelo aye owakavihera aredda dhithudha kadheddege pama ni podi wera athu owinjhivene yerege okwa. Dhotajhiha ndha dhinonikavihera wonelamo wihina ohara dholaga dhinonibarela. Ni makalelo mamodhave ohara dholaga dha Yehova wodhela ele eli yapama ni yabure enoonibarela vanlubale.

8. Mareeliho baani enawakele osogolo ale enerana ele eli yapama?

⁸ Yehova onowapaganya wareliha ale enakalawo yaharaga malagano aye. Oliye ohupaganya egi: ‘Athu owoma murima enere ovahiwa elabo yavati wihina ekalegemo malabo amatene.’ (Sal. 37:29) Onowanda wubuwela makalelo nnakalihu owiwanana ni ohagalala mudhidhi athu aatene anakaligiwawo malagano a Yehova? Yehova onofuna wihina we okanne agumi yohagalala. Bumwahaya iyo aatene nnohowela odhivela opama wa Yehova! Mbwenye nnade addi woniha odhivela wodhela ele Yehova anawogiye wihina sapama? Kabeni noone dhithu tharu nnahowelihu wera.

ONANDE ADDI WEJHEDHEDHA ODHIVELA WAWO WODHELA MALAGANO A YEHOVA

9. Enaanikavihere ddi wadhivela malagano a Yehova?

⁹ Ethu 1: Omudhivele ole ananivaha dholaga wodhela ele eli yapama ni yabure. Nuwindo negi nadhivela malagano a Yehova nnohowela wenjhedhedha odhivela wehu nuliye. Namudhivela Yehova nnere wanda okalawo ni makalelo omuhagalasa. Motajhiha: Adawu ni Eva yahere emudhivela vanlubale Yehova kiyamukule. — Gén. 3:1-6, 16-19.

10. Yamukavihere Abarawu wonelamo mubuwelo wa Yehova ddi?

¹⁰ Mwebaribarene iyo kanafuna werana yothega emodhave erilena Adawu ni Eva. Wihina eyo yahipadduwe nnohowela wilibihera wahudhera madhu a Yehova ni otikina dhopadduwa dhaye ni wilibihera okanna monelo wa Yehova. Werana ndo winere onikavihera wenjhedhedha odhivela wehu ninnihuna ni Yehova. Kabiha wubuwela yotajhiha ya Abarawu, oliye omudhivela Yehova ni murimaye wamutene, Naarive oliye ahoonelagamo dhothoma dha Yehova oliye kunanyanyuwege. Ohiya eyo oliye owilibihera wihina wonelamo dhothoma dha Yehova. Eyo enowoneleyamo pamadhene mudhidhi Yehova nuuthoma ogujhula luwani ya Sodoma ni Gomora, Abarawu nuwiwa muselu yoyo oliye obajha woova vanlubale, oovaga wihina ‘namatorihaya a elabo yatene’ eere wapa athu abure. Vamodha ni athu abure Abarawu ahinona wihina Yehova kerena ethu niga yeyo. Bumwahaya nuwiyeviha oliye wawerana makoho owinjhiva, Yehova nuuvilela wawakula makoho matene Abarawu. Ofiyedha Abarawu wonelamo wihina Yehova ohunona mubuwela wa kadda muthu, ni Yehova kanadha amutolosaga mutho apama vamodha ni muthu abure. — Gén. 18:20-32.

11. Abarawu onihe addi wihina omudhivela Yehova ni omuroromela?

¹¹ Muselu ndha athapanyedhe Abarawu ni Yehova wodhela ogujhuliwa wa Sodoma ni Gomora wihimururumusa vanlubale mudhaari ola owiyeviha. Obajha mudhidhi yole odhowa osogolo oliye othabwagave omuriha ni omuthithimiha Yehova. Nuuvira yaka dhowinjhiva nroromelo Abarawu anniyena ni Yehova wehiwa. Yehova omuloba wihina amukuthe mwanaye amudhiveliye Izaki, mbwenye Abarawu ahimunona pamadhene Mulugu aye Yehova. Bumwahaya mudhidhi yole oliye kerilena newene nikoho nimodha, oliye werana dhatedhene Yehova amulobiliye. Ohiya eyo iyo nnowanda wonelamo makalelo yoloba ele yampihiliwa mbani Abarawu. Podi wera Abarawu ahubuwela vanlubale dhithu ahudheriye wodhela Yehova, naarive dhigari ndo oliye ahinona wihina Yehova kerena ethu eli yabure obe yohifwanelela. Teto Bibiliya onowoga egi: Abarawu owubuwela wihina Yehova eere onvenyiha mwanaye Izaki. (Heb. 11:17-19) Oliye ahikanna ebaribari eyo mwaha Yehova ahimuroromeliha mwanaye Izaki wi eere okala babi amalogo. Mbwenye mudhidhi yoyo Izaki ari ahinathi okanna mwana. Abarawu omudhivela vanlubale Yehova, bumwahaya oliye ahinona wihina Yehova eere werana ele eli yapama, naarive dhigari dhorusa Abarawu ahiiwelela.— Gén. 22:1-12.

12. Nnaamutajhihe aavi Abarawu? (Salmos 73:28)

¹² Nnande addi omutajhiha Abarawu? Ndo ninga Abarawu iyo nnohowela ohudheragave wodhela Yehova. Iyo nerana ndo nnere othabwa onfiyedha Yehova teto odhivela wehu winerege wenjhedhedheya. (Omwileri Salmos 73:28.) Mubuwelo wehu winere oxagihiwa wihina nubuwelege ndo ninga Yehova anubuweliye. (Heb. 5:14) Ni makalelo ayo yakumelela yoweha nnere owedha ogonjhiha. Iyo nnere orabela mubuwelo wabure yanthukulele werana ethu yabure yamukule Yehova ni yatakalihe wandana wehu ni oliye. Ethu baani nnahowelihu werana wihina noonihe wihina nnodhiveliwa opama wa Yehova?

13. Nnande addi odhowagave neragana opama? (Provérbios 15:9)

¹³ Ethu 2: Wilibihere vanlubale wihina odhivelege opama. Akala nnofuna okanna egumi yapama nnohowela weragana ezersisiyo malabo amatene. ni makalelo mamodhave, negi nadhivelege malagano a Yehova nnohowela wilibihera vanlubale, teto wilibihera ngo wikale wa malabo amatene. Ebaribari wi Yehova Mulugu okweya mwaha oliye kananiloba werana eli nahinandihu. (Sal. 103:14) Teto ononirolomeliha egi: ‘Oliye onomudhivela ole anasayela opama’. (Omwileri Provérbios 15:9.) iyo nakanna dholuba mmabasani mwa Yehova nnowerana dhatedhene wihina nakwanelihe yoluba yehu. Si yeyo nnahowelihu weragana nilibiheraga werana opama. Yehova ni ovilela waye anerege onikavihera wunuwelagavove epaddi yomuzimuni. — Sal. 84:5, 7.

14. Yowithithana yapama ddi, ki mwahaya bwaddi niga owelaga?

¹⁴ Yehova ni odhivela waye anonubusedha wi werana ethu anaalobiye kahiyo ethu yorusa. (1 João 5:3) Ohiya eyo, ananilobiye dhinanibarela, Teto iyo nihinona wihina nnofuna obareliwa malabo amatene. Kubuwela yowithithana yamutoropa amusorihile murumiwi Pawulo. (Efé. 6:14-18) Epaddi baani ya yowithithana ele yabareliwa murima wa mutoropa? Yaali ‘yowithithana ya vamurimani ya opama’, enatapulela malagano owogowa a Yehova. Ni makalelo mamodhave yowithithana enabareliwa murima wa munyakoddo, malagano a Yehova enobarela murima wehu wodhela dhithu dhabure. Bumwahaya werena ethu sithu wihina yowithithana yawo ya opama yukavihere wibarelana epaddi yomuzimuni! — Pro. 4:23.

15. Ni makalelo baani nnalabiherihu yowibarelana ya opama?

¹⁵ Onande addi olabihera yowithithana ya opama? We onolabihera yowithithana ya opama waaparihedhaga mabasa malagano a Yehova mwigumini mwawo wafunaga othoma ethu sithu. Wathoma wodhela muselu baani munafuninyu othapanyedha, jhibo onavuruwaniwe, porogarama onafuniwe omwasistiri, obe livuru onafuniwe wileri, yere okala yapama wabihe wikoha: ‘Ethu baani yavolowele egumaaga? Ki Yehova anonamo aavi? Dhithudha dhinogithukulela wawerana mararuwo, okala mpanga owali, anrima — dhithu Yehova aniddiye?’ (Fil. 4:8) Akala dhosakula dhawo dhinowiwanana ni efunelo ya Yehova, mwebaribarene murima wawo winere obareleya wa dhithu dhabure.

16-17. Ninga enawogela yolebela ya Isaías 48:18 enaanikavihere ddi okalagawove naparihedhaga mabasa malagano a Yehova mwigumini mwehu ni mukalakala?

¹⁶ Malabo mamodha onothabwa othuwathuwa wubuwelaga wihina kunadha wowanda wawakwanihedha malagano a Yehova mwigumini mwawo? Kasugwa yoladdaniha ya Yehova, enafwanyeya va Isaías 48:18. (Omwileri.) Yehova onopaganya wihina opama wehu onaligana ninga ‘manjhe enatekuma muniya.’ Motajhiha, kabiha wubuwela ogimenle sere-sere ya niya, osugwaga niya yatene wasugwaga manjhe etekumaga, edhowaga, ewelaga yahimalaga. Mudhidhi ola woriya, werege wubuwela wihina labo nimodha otekuma wula wa manjhe were omala? Naari! We ohunona wihina otekuma wule wa niya wineresa ndale, ni kunadha omalaga.

¹⁷ Ni makalelo mamodhave opama wawo podi oliganaga ninga otekuma wa niya! Ni makalelo baani? Wafunaga werana yothoma wabihege wubuwela makalelo Yehova afuniye wihina werena ethuyeyo, nuwindo werena ninga onafuneliwe. Bumwahaya kuselele, naarive yothoma yawo egaali yorusa babihu odhivela Yehova anakale epaddi yawo. Okaviheraga okala txithi ni akopolo, ovahaga kopolo ni nikavihero onahoweliwe wihina wande werana ele eli yapama kadda labo mowiwanana ni malagano owogowa aye. — Isa. 40:29-31.

18. Mwahaya bwaddi sapama ohatoriha amodha ni dholaga dhehu?

¹⁸ Ethu 3: Omwihiye Yehova eeddihege dhithudha. Iyo nnowilibihera vanlubale waparihedha mabasa malagano a Yehova mwigumini mwehu. Mbwenye nnohowela okala pasope wihina nahiladdanihege ni mudha wodhela nde nnerihuna niwubuwelaga wihina iyo nili athimaya okwaranya aliwa. Teto kanatorihege amodha ni dholaga dhehu. Ni kaniddiwale wihina Yehova dili ‘namatoriha a elabo yatene’. (Gén. 18:25) teto Yehova kanivahile ofuru yowatoriha ethu amodha. Bumwahaya Yesu ohuwoga egi: ‘muhitorihiwe, muselele otoriha.’ — Mat. 7:1.b

19. Juze onihe addi wihina ororomela otoriha wa Yehova?

¹⁹ Kasugwa yotajhiha ya Juze. Oliye katorihile ale yamonihile goyi, addibile yahimoniha goyi ofiyedha omuguliha ninga mudhaari ni omuleketha baabiwa Jako wihina Juze ohukwa. Nuuvira yaka dhowinjhiva Juze ahigumana ni amudhaaye. Mbwenye vano Juze ahikanna owedha yowatoriha athu amodha mbwenye oliye kerilena ndo, naarive aganna kopolo yowatoria ni wawoniha goyi. Teto addibile Juze yowoova Juze anawonihe goyi naarive aliwa egahiye obure ole yanniwana. Mbwenye oliye ahafwaseyiha addibile egi: ‘Kamoove. Miyo gili vamburoni va Mulugu.’ (Gén. 37:18-20, 27, 28, 31-35; 50:15-21) Juze ahinona wihina Yehova dinna mutholo wowatoriha athu.

20-21. Ethu baani nihinafunihu werana, ki mwahaya bwaddi?

²⁰ Ndo ninga Juze iyo nnafuna nimwihiye Yehova wihina atorihegwe dhithudha. Mwaha Iyo kannanda woona dhili mmurimani mwa kadda muthu. Motajhiha, iyo kannafuna owoga ethu emuthukulele ddibila obe murogola werena ethu nahinonelihumo pama. Mwaha ‘Yehova ddinanda woona murima wa kadda muthu.’ (Pro. 16:2) Oliye onowadhivela athu aatene a mwilaboni, Yehova ononikongomedha iyo ‘onfugulela murima wehu.’ (2 Cor. 6:13) Iyovano nnowilibihera vanlubale wadhivela addibilihu, ohiya watoriha.

²¹ Teto kannafuna watoriha ale yahili addibilihu. (1 Tim. 2:3, 4) We were omutoriha amudhi awo owogaga wegi: “we kunadha ohudhera ebaribari”? Naari, mwaha eyo yakale withukula epaddi yawo. Teto Yehova onowavaha athu aatene ofuru wothwaruwa. (Atos 17:30) Kuddiwale ale eniwona ninga bathima waapitha athu amudha, vamentoni va Yehova aliwa kinna thima.

22. Mwahaya bwaddi we odhe othomege odhivela opama?

²² Odhivela ninnihuna ni malagano opama a Yehova enonivaha murenddele ni enowahagalasa athu amodha, teto enonikavihera onfiyedha Yehova ni wakavihera athu amodha werana emodhave. Iyo kannafuna okanna, ‘dala ni nthona wopama’. (Mat. 5:6) We podi okanna ebaribari wihina wilibihera wawo wamutene oneriwena wihina werena efunelo ya Yehova, oliye kanadha addiwala. Athu amwilaboni enna othabwave walapela malagano a Yehova. Teto kuddiwale wihina ‘Yehova onowadhivela athu apama.’ — Sal. 146:8.