1. Akwawo enavolowela aavi egumawo?

Najhaga mudhidhi ni muthu podi okala mwinternetini obe thootho, vang’ono vang’ono, iyo podi obajha omutajhiha. Eyo podi okala ethu yapama obe yabure. Bibliya anowoga egihina: ‘Muthu aneedda naathu athotho anere okala athotho, mbwenye ole anitaganyihedha ni ataduwa [obe ale ehinamulabela Yehova] dhaye dhinere omweddela bure.’ (Provérbios 13:20) Akwihu enamudhivela ni enamulabela Yehova podi onikavihera wandanagave nuliye ni othoma dhithu dhapama. Mbwenye ale ehinamudhivela Yehova podi onlapeliha ni Yehova. Bumwahaya, Bibliya aganikongomedha wasakula pama akwihu! Nandana naathu enamudhivela Mulugu, iyo vamodha naaliwa nnokavihereya. Ndo nnowanda ‘olibihana mmodha ni mukwaye.’ — 1 Tessalonicenses 5:11.

Yehova ohunivaha nvaho wathima: owoga. Makalelo nnalabihedhihu nvaho ola ononpatha oliye? Hee! (Omwileri Tiago 1:26.) Ki vano nnande aavi olabihera nvaho ola wihina nimuhagalase Yehova?

1. Nnaalabihedhe aavi madhu ehu?

Bibliya onihina ‘mudidele olibihana ni ovenyihana ninga munerinyuna.’ (1 Tessalonicenses 5:11) Onowanda omubuwela muthu anahowela olibihiwa? Ethu baani oneriwena wihina woonihe wihina wi onomudhivela? Omoonihe wihina onoompwatha. Podi werana eyo mwaha omwaddela dhikalelo dhapama onniyena. Onoonamo aavi olabihedha yolebela ya mBibliyani wihina omukavihere? Dhihikalawo dholebela dhowinjhiva wihina omulibihena. Wubuwele wihina makalelo awo owoga podi waddiginya murima athu amodha. Bumwahaya, owogege mwamakalelo apama ni odhivela. — Provérbios 15:1.

2. Dhithu baani nihinafwanelelihu owoga?

Bibliya onihina: ‘Vanlumini veenyu kavikumege madhu opiha mbani.’ (Omwileri Efésios 4:29, nota.) Eyo enatapulela wi kanawogege madhu ootakala newene kanithapanyedhege muselu dhinatakalela athu amodha. Ohiya eyo, orabele waaba ni woota. — Omwileri Provérbios 16:28.

3. Enaanikavihere ddi olabihedha ekalelo yehu yowoga?

Malabo mamodha dhithu nnawogihu dhinowoniha dhithu nnubuwelihu ni dhiri mmurimani mwehu. (Lucas 6:45) Bumwahaya, nnohowela wilibihera wubuwela dhithu dhebaribari ‘dhowogowa, dhoweela, dhodhivela, dhinawogiwa pama ni dhatedhene dhiri dhothithimiheya.’ (Filipenses 4:8) Wihina nande werana, nnohowela osakula pama yaredhelo yehu vamodha naakwihu. (Provérbios 13:20) Teto sapama wubuwela wahinathi owoga. Wubuwele makalelo madhu awo enapathiwa athu amodha. Bibliya onihina: ‘Wawoga madhu muthu ahubuwele enaligana ni wiiva wa supadda, mbwenye madhu a muthu a thotho enowavoliha makwadda.’ — Provérbios 12:18.

OHUDHERE DHITHU DHIMODHA

4. Pole-pole ndhithu onawogiwe

Malabo mamodha nnowoga dhithu nindo iyo wera, gawogela ddi? (Tiago 3:2) Mmwileri Gálatas 5:22, 23, mwamala muthapanyedhe makoho enaharela:

• Yolebela ela enowoniha dhikalelo dhowinjhiva dhinanikavihera osugwera dhithu nnawogihu. Ekalelo baani waamulobiwe Yehova? Dhikalelo ndha dhinukavihere aavi?

Mmwileri 1 Coríntios 15:33, mwamala muthapanyedhe nikoho nnaharela:

• Yaredhelo yehu vamodha ni akwihu enavolowela aavi makalelo ehu owoga?

Mmwileri Eclesiastes 3:1, 7, mwamala muthapanyedhe nikoho nnaharela:

• Mudhidhi baani wofwanelela omala ni mudhidhi baani wofwanelela owoga?

5. Wawogege opama athu amodha

VIDIYU: Owogege dhithu ‘dhinalibiha’ athu amodha (4:07)

• Nvidiyuni, ddibila woona wi ahikanna ekalelo yowatoriha athu amodha. Mwahaya bwaddi adhe asaddulege ekalelo ele?

• Erile ddi wihina asaddule ekalelo yaye yabure?

Mmwileri Eclesiastes 7:16, mwamala muthapanyedhe nikoho nnaharela:

• Akala nnafuna nimwabe muthu mmodhaya, dhithu baani nnahowelihu wubuwela?

Mmwileri Eclesiastes 7:21, 22, mwamala muthapanyedhe nikoho nnaharela:

• Yolebela ela enukavihera aavi ohutakaleliwa athu amodha yuwogaga obure?

6. Wawogaga namudhawo owogege mwamakalelo apama

VIDIYU: Odhivela ni nriho dhinowandaniha murala (3:08)

• Enuukavihere ddi owoga nuudhivela ni amudhawo?

Mmwileri Efésios 4:31, 32, mwamala muthapanyedhe nikoho nnaharela:

• Niwogege mwamakalelo enoniha wi nnowadhivela amudhihu. Ni makalelo baani?

Yehova ahiwoga wi oomudhivela mwanaye. Mmwileri Mateus 17:5, mwamala muthapanyedhe nikoho nnaharela:

• Onaamutajhihe aavi Yehova wawogaga ni amudhawo?

OVIRISEDHA

Madhu ehikanna kopolo. Sapama orajhiha wubuwela dhithu, mudhidhi ni makalelo nnawogihu.

Ogwaddela

• Onalabihedhe aavi ekalelo yawo yowoga wihina wakavihere amodha?

• Makalelo baani owoga onafuniwe orabela?

• Ethu baani enaanikavihere owoga mwamakalelo apama ni wakavihera athu amodha ndhithu nnawogihu?

WEGI ONONE DHITHU DHIMODHA

Enaanikavihere ddi owoga mwamakalelo apama?

Waatajhihege athu athotho (8:04)

Woone ethu enukavihere ohuwoga madhu oonyemula.

“Owoga madhu oonyemula ethu yabure?” (Epaddi ya mu jw.org)

Woone ethu enukavihere ohawoga obure athu amodha.

Pole-pole waaba! (2:36)

Woone makalelo Yehova amukaviheriye mulobwana dhaala ohiya wawoga madhu oonyemula.

‘Miyo obajha wubuwela dila gathukulimi’ (A Sentinela, 1.º a Agosto a 2013)