OHUDHERA 12
Enuukavihere ddi wihina odhowegeve omuhudheraga Bibliya?
Mohanganyedha omuhudhera Bibliya ethu yunlubale yofwanelela werana. Ebaribari wihina kinakweya omuhudhera Bibliya. Malabo mamodha podi wanganyedhaga akala ommadidela omuhudhera Bibliya obe naari. Mwahaya bwaddi sapama odidela omuhudhera Bibliya? Enuukavihere ddi odidela omuhudhera Bibliya naari ofwanyiwaga makathamiho?
1. Mwahaya bwaddi sapama omuhudhera Bibliya?
‘Madhu a Mulugu ehikanna egumi ni ehikanna kopolo.’ (Hebreus 4:12) Omuhudhera Bibliya ethu yofuneya. Mwaha ononikavihera woonelamo makalelo owubuwela a Yehova ni makalelo ananoniye. Nnikavihero na Bibliya, nnere ohudhera dhithu dhixa, nnere okala athu athotho ni nnere okanna ejhehedho ya osogolo. Yinlubaleya: onere wandana ni Yehova. Wamuhudheraga Bibliya, onahiya wihina kopolo dhinniyena dhisaddule egumawo.
2. Mwahaya bwaddi ekala yofuneya ovaha thima ndhe onahudheriwe?
Ebaribari ya mBibliyani eri ninga muhaku. Bumwahaya egawoga yegi ‘nigule ebaribari teto nihigulihe.’ (Provérbios 23:23) Naavahaga thima dhithu dhinahudhiha Bibliya, nnowilibihera wihina nnahiye omuhudhera naari nifwanyiwaga makathamiho. — Omwileri Provérbios 2:4, 5.
3. Yehova anukavihere avi odidela omuhudhera Bibliya?
Yehova di Namapaddusa a Kopolo-dhatedhene ni dimukwawo. Oliye ohunona pamadhene wapitha athu atene, teto anofuna wihina omunone. Yehova onere wuvaha ‘efunelo ni kopolo dhowerana ethu-sithu.’ (Omwileri Filipenses 2:13.) Bumwahaya, malabo mamodha wunyonyaga omuhudhera Bibliya obe wonaga okala yoorusa werana ndhe onahudheriwe Yehova podi wukavihera. Wahowelaga kopolo wi wagonjhihe makathamiho ni dhoweha, oliye anakale epaddi yawo. Olobelege wa Yehova wihina adidele wukavihera omuhudhera Bibliya. — 1 Tessalonicenses 5:17.
OHUDHERE DHITHU DHIMODHA
Woone makalelo oodidela omuhudhera Bibliya naari athu amodha ehidhiveliwaga, obe ogaali oopinyaminyeyene ni mabasa. Woone makalelo Yehova onukaviheriye odidela omuhudhera Bibliya.
4. Woonihe wihina ethu yunlubale omuhudhera Bibliya
Malabo mamodha nnothabwa opinyaminyeya okalaga ninga kaninna mudhidhi womuhudhera Bibliya. Ki enaanikavihere ddi? Mmwileri Filipenses 1:10, mwamala muthapanyedhe makoho enaharela:
Ononamo avi, ‘dhithu dhathima’ mwigumini mwawo ddi?
Onoonihe avi wihina omuhudhera Bibliya ethu yathima mwigumini mwawo?
Wabajha odhaliha baldi ni mutxesa, windo onowahelamo mabwe kinayamo
Mbwenye wabajha wahelamo mabwe, winere okala mburo wohelamo mutxesa. Emodhave, wasogoliha ‘dhithu dhofuneya’ mwigumini onere okanna mudhidhi wowerana dhithu dhimodha
Omuhudhera Bibliya onere onikavihera wakwanihedha dhofuna dhehu dha omuzimuni, obe efunelo ninnihuna yomunona Yehova. Mmwileri Mateus 5:3, mwamala muthapanyedhe nikoho nnaharela:
Ohudhera wa Bibliya wakala wathima mwigumini mwehu, mareeliho baani nnawakelihu?
5. Kuwenye wihina athu amodha yuhihe omuhudhera Bibliya
Malabo mamodha athu amodha podi ofunaga wuhiha omuhudhera Bibliya. Woone yopadduwa ya Fransisku. Osugwe VIDIYU, mwamala muthapanyedhe makoho enaharela.
Mvidiyuni muna, Fransisku nuwawaddela akwaye ni amudhaaye ndhe ahudheriye, yonelemo aavi?
Ovilela waye wirelihiwe aavi?
Mmwileri 2 Timóteo 2:24, 25, mwamala muthapanyedhe makoho enaharela.
Amudhawo ni akwawo enoonamo aavi wamuhudheraga Bibliya?
Ninga dhinawogela versu ndha, muthu afunaga wuhiha omuhudhera Bibliya onere ddi? Mwaha waddi?
6. Ororomele wihina Yehova anere wukavihera
Naathabwaga wandana ni Yehova, nnofuna omuhagalasa. Naari dhigaarive ndo, podi okala ethu yorusa osaddula egumihu wihina nimwiwelelege. Akala onona ndo, kuselele. Yehova anere wukavihera. Osugwe VIDIYU, mwamala muthapanyedhe makoho enaharela.
Mvidiyuni muna, Jim asaddule aavi egumaye wihina amuhagalase Yehova?
Ethu baani yuddiginye murima ni yopadduwa yaye?
Mmwileri Hebreus 11:6, mwamala muthapanyedhe makoho enaharela:
Yehova anawerele ddi ale ‘enamusayela ni murima watene,’ obe, ale enilibihera wihina emunone ni emuhagalase?
Ononamo aavi, Yehova anakala aavi oonaga wilibihera wawo wihina omuhudhere Bibliya?
KI MUTHU UKOHA EGI: “Mwahaya bwaddi ogamuhudhera Bibliya?”
Onamwakule aavi?
OVIRISEDHA
Ebaribari wihina omuhudhera Bibliya kinakweya. Mbwenye, winere wukavihera ofwanya ohagalala wa mukala-kala. Odidele omuroromela Yehova, oliye anere wureeliha.
Ogwaddela
Mwahaya bwaddi ogoona ebaribari ya mBibliyani ninga muhaku?
Onoonihe aavi wihina onovaha thima ‘dhithu dhofuneya?’
Mwahaya bwaddi ekala yapama oloba nikavihero na Yehova wihina odidele omuhudhera Bibliya?
WEGI ONONE DHITHU DHIMODHA
Wileri wodhela dhithu nayi dhakavihere athu amodha olabihedha pama mudhidhiwa.
“Makalelo oopurelamo mudhidhi” (Despertai!, Fevereiro a 2014)
Mamune Grasi konelamo mwahaya bwaddi mwariye agamulabela Mulugu. Woone makalelo Yehova amukaviheriye Grasi.
Yehova ononivaha kopolo wihina niwanena makathamiho-bimakathamiho (5:05)
Woone makalelo mulobwana dhala akaviheriwiye mwaha ovilela wa mwariye.
Malabo mamodha Anamona a Yehova enowotedhiwa wihina enogawa murala. Eyo ebaribari?
“Anamona a Yehova enogawa obe enowiwananiha murala?” (Epaddi ya mu jw.org)