2. Dhithu baani dhinapadduwa okuma yaka ya 1914?

Anamahara a Yesu yahimukoha wihina enone mudhidhi waabajhe othonga Omwene wa Mulugu ni omabajho wa malabo ala okuthula. Aliwa omukoha yegi: ‘Dhego ndha dhinereye alini, yintelelo yothonga wawo ni omakuthulo wa dhithu dhatedhene sivi?’ (Mateus 24:3) Mudhidhi Yesu aakulaga ahisoriha dhithu dhowinjhiva dhaapadduwege oliye abajha othonga mumweneni wa Mulugu. Dhithu ndho sindha koddo, dala ni oddiginya wa elabo. (Omwileri Mateus 24:7.) Bibliya anasoriha makalelo yakale athu ‘malabo okuthula’ ni mwaha wa yeyo, okalawo ‘kayakalege ethu yokweya.’ (2 Timóteo 3:1-5) Okuma yaka ya 1914 ofiyedha peeno, dhithu dha dhinothabwa.

3. Mwahaya bwaddi Omwene wa Mulugu nubajha othonga dhithudha mwilaboni dhigathabwa orusa?

Yesu nuumala othomiwa wihina akale Mwene a Omwene wa Mulugu, ethu yobajha eriliyena fuuwana ni Saddana vamodha ni ademoniyu aye odhulu. Vano Saddana ogonjhihiwa. Bibliya anihina ‘oliye ohuvokeriwa elabo yavati, vamodha ni angero aye.’ (Apocalipse 12:9, 10, 12) Saddana ohuthabwa onyanyuwa mwaha ohunona wihina anere otolosiwa mowaguva. Bumwahaya, oliye anowatota makathamiho ni goyi mwilaboni yatene. Bumwahaya dhithu ndha dhithabwa orusa! Mbwenye Omwene wa Mulugu onere wamariha makathamiho amatene.